Isaías
Tayta Diosta alabashqan
25 TAYTA DIOS, qamlami Diosnï kaykanki.
Pipis mana rurashqanta rurashqaykipitami jutikita joqarir imaypis alabashayki.
Unaypita patsa promitishqaykita imaypis cumplinkimi.
2 Chikimaqnï jäpa runakunapa markanta ranralatanami kachaykushqanki.
Amparakuna ali murallashqa markankunatapis raqälatanami kachaykushqanki.
Palaciunkunatapis juchutsir ushakätsiptiki manami imaypis sharkatsinqanatsu.
3 Tsayno rurashqaykita rikarmi juk nacioncho munayniyuq runakunapis munayniyuq kashqaykita wilakärinqa.
Juk marka kalpasapa runakunapis qamta *mantsakushunkimi.
4 Qamqa waktsakunapa favorninmi sharkunki.
Ayluynaq runakunatapis tsapankimi.
Löcu tamyapitapis qamqa tsapankimi.
Fiyupa shanaptinpis lantupankimi.*
Fiyu runakunaqa runa mayinta nakatsipäkunmi.
Löcu tamya tapiata juchutsiqnömi karkaykan.
5 Tsaynöpis chunyaq tsaki jirkacho shanay rupaqnömi karkaykan.
Jina kaqtami olquykaqtapis upälatsinki.
Pukutaywan intita tsapaqnömi upälatsinki.
Fiestata Tayta Dios rurananpaq nishqan
6 *Sión jirkanchömi lapanta mandaq TAYTA DIOS maytsay nación runakunapaq fiestata ruranqa. Tsay fiestachömi kanqa ali mikuy y ali vïnupis. Maypis mikukuypaqmi mikuypis kanqa y maypis upukuypaqmi vïnupis kanqa.
7 Tsay jirkancho lapan markakunata tsaparaq yana röpata y lapan nacionkunata tsaparaq mortäjata* ushakätsiptinmi 8 wanuypis mana kanqanatsu.* Waqaqkunatapis kikin TAYTA DIOSMI shoqashpan weqinta pitsapanqa.* Kuyashqan runakuna manami penqaycho kanqanatsu. Tsayno kananpaqmi TAYTA DIOS nin.
9 Tsay witsanmi runakuna kayno nipäkunqa:
“Kaychönami Tayta Diosnintsi kaykan.
Yärakushqantsinölami salvamashqantsi.
Paymi shuyarpashqantsi TAYTA DIOS kaykan.
Salvamashqantsipita lapan shonquntsiwan kushishqa payta alabashun”.
10 Sión jirkancho runakunata TAYTA DIOSMI ima desgraciapitapis tsapanqa. Moab naciontami itsanqa qanra jitakunacho oqshata jaruqno 11 ali chölu tukushqanpita ushakätsinqa. Qanra jitakunapita sharkuyta mana kamäpakuqnömi Moab nacionpis sharkuyta mana kamäpakunqatsu.* 12 TAYTA DIOSMI markapa altu murällankunatapis chipyaq juchutsir ushakätsinqa.*