Salmos
Libru 5
Nakarkaykaqkunata Tayta Dios jorqushqan
107 Alilata ruraq kashqanpita TAYTA DIOSTA agradëcikäriy.
Kuyapäkuyninqa manami imaypis ushakantsu.*
2 Salvashqa kaqkuna, TAYTA DIOS salvashqanta wilakäritsun.
Chikiqninkunapa makinpita jorqushqanta wilakäritsun.
3 Norti kaq lädupitapis, sur kaq lädupitapis, inti jeqamunan kaq lädupitapis y inti jeqanan kaq lädupitapis Tayta Dios shuntamushqankuna payta alabapäkutsun.
4 Wakinkunaqa markaman aywaq nänita mana tarirmi chunyaq jirkapa oqrakashqa puripäkurqan.
5 Fiyupa yarqanar y yakunarmi pasaypa almatakashqa karkaykarqan.
6 Lakikur Tayta Diosta manakäriptinmi nakarkaykaqta jorqamurqan.
7 Paymi ali nänipa pushar tänanpaq kaykaq markaman chayatsirqan.
8 ¡Kuyapäkuq kashqanpita TAYTA DIOSTA agradëcikäritsun!
¡Noqantsi rayku espantaypaq kaqkunata rurashqanpita agradëcikäritsun!
9 Paymi pasaypa yakunaqkunata yakuta kamaripan.
Pasaypa yarqanaqkunata mikuyta kamaripan.
10 Wakinkunaqa pasaypa lakikurmi kawapäkurqan.
Carcilcho wataraykaqnömi karkaykarqan.
11 Tsayno karqan poderniyuq Tayta Dios nishqankunata mana cäsukushqanpitami.
Paykunaqa Tayta Dios yätsishqankunata manami chaskikärirqantsu.
12 Tsaymi Tayta Dios churarqan nakar arupäkunanpaq.
Mayjina nakapäkuptinpis manami pipis yanaparqantsu.
13 Lakikur TAYTA DIOSTA manakäriptinmi nakarkaykashqanpita salvarqan.
14 Paymi jorqamurqan wanushqano y wataraykaqno karkaykaqta.
15 ¡Kuyapäkuq kashqanpita TAYTA DIOSTA agradëcikäritsun!
¡Noqantsi rayku espantaypaq kaqkunata rurashqanpita agradëcikäritsun!
16 Paymi bronci punkukunatapis pakir usharqan.
Fiërru trancakunatapis pakirmi usharqan.
17 Wakinkunaqa mana cäsukuq kashqanpitami pasaypa nakapäkurqan.
18 Mikuytapis shonqun pasaypami melanarqan.
Wanuy wanuytanami rikchakärirqan.
19 Lakikur TAYTA DIOSTA manakäriptinmi nakarkaykaqta jorqamurqan.
20 Tayta Dios nimuptinmi paykuna aliyarqan.
Wanunanpaq karkaykaptinmi aliyätsirqan.
21 ¡Kuyapäkuq kashqanpita TAYTA DIOSTA agradëcikäritsun!
¡Noqantsi rayku espantaypaq kaqkunata rurashqanpita agradëcikäritsun!
22 Tayta Diosta agradëcikur sacrificiuta rupatsitsun.
Alikunata rurashqanpita kushishqa wilakäritsun.
23 Wakinkunaqa juk lädu nacionkunapami negociunkunata *büquiwan apapäkuq.
24 Lamar chawpincho kaykarmi TAYTA DIOS espantaypaq rurashqankunata rikapäkurqan.
25 Tayta Dios mandaptinmi fiyupa löcu wayra qalaykurqan.
Lamarpis altutaraqmi sharkurqan.
26 Altuyaq lamar pulchaqyaptinmi büquikunapis talpukänanpaqna kaykarqan.
Kawananpaq kashqantapis manami yarpapäkurqannatsu.
27 Shinkashqano karmi ichiytapis ni puriytapis mana kamäpakurqantsu.
Manijayta yachaq kashqanpis manakaqlapaqmi karqan.
28 Lakikur TAYTA DIOSTA manakäriptinmi nakarkaykashqanpita salvarqan.
29 Löcu wayratapis walwalyaylamanna Tayta Dios tikratsiptinmi yakupis pulchaqyarqannatsu.
30 Yaku chawaqta rikarmi kushikärirqan.
Nirkurnami büquikuna chayakunanman Tayta Dios chayatsirqan.
31 ¡Kuyapäkuq kashqanpita TAYTA DIOSTA agradëcikäritsun!
¡Noqantsi rayku espantaypaq kaqkunata rurashqanpita agradëcikäritsun!
32 ¡Yärakuq mayinkunawan juntakaykur alabapäkutsun!
¡Mayor runakuna juntakashqanchöpis alabapäkutsun!
33 Tayta Diosmi mayukunatapis y pukyukunatapis tsakitsin.
34 Runakuna jutsata ruraptinmi ali chakrakunatapis qarayätsin.
35 Chunyaq jirkakunatapis oqumanmi tikratsin.
Tsaki chakrakunachöpis pukyukunatami pashtatsin.*
36 Markankunata sharkatsinanpaqmi tsay chakrakunaman waktsakunata churan.
37 Chakrata kicharkurnami üvata plantapäkun.
Cosecharpis atskatami shuntapäkun.
38 Tayta Diospa bendicionninwanmi atskaq karkaykan.
Uywankunapis atskamanmi mirarkaykan.
39 Contrankuna paykunata wanutsir walkayätsiptinmi 40 tsay wanutsiqninkunata Tayta Dios castigan.
Castigaptinmi tsay contrankunaqa chunyaq jirkapa pantakashqa puripäkun.*
41 Waktsakunatami itsanqa mana lakikärinanpaq Tayta Dios yanapan.
Paykunapa tsurinkunapis atskaman mirananpaqmi bendicionninta churan.
Uysha atskaman mirashqannömi paykunapis atskaman miran.
42 Bendicionninta churashqanta rikarmi ali runakuna kushikärin.
Fiyu runakunami itsanqa ima niytapis mana kamäpakuntsu.
43 Pipis tantiyakuq karqa tsaykunata tantiyakutsun.
Tsaynöpami cuentata qokunqa TAYTA DIOS kuyakuq kashqanta.