Gálatas

4 Pipis wamralaraq kaykarqa manami herencianta chaskinraqtsu. Chaskinanpaq kaykarpis ashmaynölami kaykan. 2 Tsaymi ashmaqninpa munaynilanchöraq kaykan papänin nishqan junaqyaq. 3 Tsaynölami noqantsipis wamrano kashpantsi *Moisés qelqashqan leykunapa munaynincho karqantsi.

4 Promitishqan tiempu chayamuptinnami Tayta Dios Tsurinta kachamurqan. Paymi noqantsino yurishqa kar tsay leykunapa munaynincho karqan. 5 Tsayno karqan leykunapa munaynincho kashqantsipita salvamänantsipaqmi. Tsaynöpami paypa wamrankunana kanantsipaq legitikamashqantsi. 6 Wamran kaptintsimi Tsurin Jesucristo promitishqan Espíritu Santuta* shonquntsiman Tayta Dios kachamurqan. Espíritu Santumi Tayta Diosta imaypis kayno nin: “¡Abba, Papä!”* 7 Tsaymi ashmaynönatsu kaykantsi, sinöqa Tayta Diospa wamrankunanami kaykantsi. Wamranna kashpantsimi promitimashqantsi herenciata [Jesucristo kayninpa] chaskishunpaq.*

Wawqi panikunapaq Pablo lakikushqan

8 Qamkunaqa Tayta Diosta manaraq *reqirmi mana rasunpa kaq dioskunata sirvipäkurqayki. 9 Kananmi itsanqa Tayta Diosta reqipäkunki y paypis reqipäkushunki. Tsayno kaykaptinqa ¿imanirtaq *Moisés qelqashqan leykunata cumpliyta munar ashmay kayman yapay kutirkaykanki? 10 Tsaymi qamkunaqa Israel runakuna respitashqan junaqkunata, killakunata, watakunata y fiestankunata respitarkaykanki. 11 Tsayno kapäkuptikimi pasaypa lakikü. ¿Manakaqlapaqtsuraq Jesucristupa wilakuyninta qamkunata yachatsishqä? 12 Noqapis mana Israel runakunanömi Moisés qelqashqan leykunapa munayninchönatsu kaykä.* Wawqi panikuna, qamkunata ruwakü noqa kashqäno qamkunapis kanaykipaqmi.

Qamkunaqa alimi chaskipäkamarqayki. 13 Musyapäkushqaykinöpis qeshyaynïpami* qamkuna kaqcho Jesucristupa wilakuyninta wilakurqä.* 14 Tsayno qeshyaptïpis qarqamänaykipa trukanqa *angiltanöraqmi y kikin Jesucristutanöraqmi ali rikapäkamarqayki. 15 Kananqa qamkuna ¿imanakäkushqankitaq? Nawpataqa kuyapämashpayki nawï trukatsina kaptinqa nawikitapis jorqurir churaparkamankimanmi karqan. 16 Kananqa ¿Jesucristupa wilakuyninta yachatsishqäpitaku conträ sharkapäkushqanki?

17 Lutan yachatsikuqkuna manami Dios munashqanno ali kawapäkunaykita munartsu yacharkaykätsishunki, sinöqa noqakunata manakaqman churamashpan kikinkuna yachatsishqanta chaskikärinaykita munalarmi. 18 Rasunpa ali kawapäkunaykita munar yachatsishuptikiqa alimi kanman. Itsanqa qamkunawan kaykaptïpis o mana kaykaptïpis tsaynöla yachatsipäkushunkiman.

19 Kuyay wamräkuna, Jesucristuno kawapäkunaykita munarmi wachay nanay tsariptin warmi lakikushqanno noqapis qamkunapaq fiyupa lakikuykä.* 20 Shumaq tantiyatsinäpaq ¡imanöparaq qamkuna kaqcho mayna kaykäman! Karucho karmi ima ruraytapis mana kamäpakütsu.

Agarman y Saraman tinkutsishqan

21 *Moisés qelqashqan leykunapa munaynincho kayta munarqa ¿pay qelqashqankuna imata nishqantapis tantiyapäkunkiku? 22 Tsaychömi niykan Abraham ishkay tsuriyuq kashqanta. Jukaq tsurin karqan ashmaynincho* y jukaq tsurinnami karqan legïtimu warmincho.* 23 Ashmaynincho kaq tsurinqa manami Tayta Dios promitishqan kaq tsurintsu karqan. Legïtimu warmincho kaq tsurinmi itsanqa Tayta Dios promitishqan karqan.

24 Tsay warmikunata ishkay *pactuman tinkutsiypami tantiyatsishayki. Abrahampa ashmaynin Agarqa Sinaí jirkanömi kaykan. Sinaí jirkachömi Israel runakunawan Tayta Dios pactuta rurar leyninkunata entregarqan. Tsaymi pipis tsay leykunapa munaynincho kar ashmayno kaykan. 25 Arabiacho kaykaq Sinaí jirkanömi Agar kaykan. Tsaynölami Jerusalénpis y wawankunapis karkaykan.* Tsayno kaykan Moisés qelqashqan leykunapa munaynincho kashpanmi. 26 Abrahampa warmin Saranami Tayta Dios rurashqan mushuq pactuno kaykan. Tsay pactuta Tayta Dios cumplir salvamaptintsimi noqantsipa markantsi jana patsacho kaq Jerusalén kanqa.

28 Wawqi panikuna, tsayno kaptinmi noqantsiqa Sarapa wawan Isaacno kar Tayta Dios promitishqanta cumplishqanpita paypa wamrankuna kaykantsi.

29 Espíritu Santupa munayninwan yuriq Isaacta Agarpa wawan chikishqannömi kananpis Moisés qelqashqan leykunata cumplitsiqkuna chikiykämantsi.* 30 ¿Manaku yarpapäkunki Tayta Diospa palabran imata nishqantapis? Tsaychömi qelqaraykan Sara kayno nishqan: “¡Tsay ashmaytaqa wawantinta jukla qarquy! Tsay warmipa wawanqa manami wawä Isaacwan herenciata rakipänakunqatsu”.*

31 Wawqi panikuna, noqantsiqa manami ashmay kaq warmipa wawannötsu kaykantsi, sinöqa Sarapa wawannömi.