1 Corintios
Wawqi panikunata yachatsinanpaq apóstol Pablo munayniyuq kashqan
4 Wawqi panikuna, Tayta Diospa wilakuyninta wilakur Jesucristupa sirviqnilan kashqäta tantiyakäriy. 2 Ali sirviqqa yärakuypaqmi kanman. 3 Tsaymi Jesucristuta mana sirvishqäta yarpaptikipis o wakin runakuna tsayno yarpaptinpis mana lakikütsu. 4 Noqapa yarpaynïpitaqa Jesucristuta alimi sirviykä. Tsayno kaptinpis manami ali sirvishqäta tantiyashqäpitatsu Tayta Dios “alimi sirvimashqanki” nimanqa, sinöqa ali sirvishqäta kikin musyarmi.
5 Tsayno kaykaptinqa manaraqpis hörancho pitapis ama juzgaytsu. Señor Jesucristo kutimurnami pakaylapa rurashqantsikunata y shonqulantsicho yarpashqantsitapis juzgamäshun. Tsay höraraqmi ali o mana ali sirviqnin kashqantsita nimäshun.
6 Wawqi panikuna, Tayta Diospa palabrancho qelqaraykaqta cäsukärinaykipaqmi Apoluspita y kikïpita kay cartacho niykämü. Cäsukurqa manami jukaq yachatsishuqnikipa favornin sharkur jukaqpa contran sharkunkimantsu.* Tsayno rurarqa yachaq tukurkaykankimi. 7 Yachatsishuqnikikunata tsayno juzganaykipaqqa ¿pitaq karkaykanki? Tantiyaq kashqaykipis ¿manaku Tayta Diospita kaykan? Tayta Diospitaraqmi lapantapis chaskipäkushqanki. Tsayno kaykaptinqa ¿imanirtaq kikilaykikunapita tantiyaq kashqaykita yarpar alabakurkaykanki?
8 Qamkunaqa lapan munashqaykita chaskipäkushqankinami ¿aw? Rïcunami karkaykanki ¿aw? Noqakuna manaraq chayamuptïpis Jesucristuwan mandarkaykashqaykitami yarpapäkunki ¿aw? Rasunpa mandapäkuptikiqa ¡alimi kanman noqakunapis mandäshinäpaq!
9 Tantiyaynïpitaqa *apóstol kanäpaq Tayta Dios churamashqa lapanpitapis mas nakanäpaqmi. Lutan ruraq runatanömi noqakunata wanutsimayta munapäkaman. Tsayno nakashqätaqa lapan runakunapis y *angilkunapis rikarkaykämanmi. 10 Qamkunaqa Jesucristuta sirvir yachaq y tantiyaq kashqaykitami nirkaykanki. Noqakunatami itsanqa Jesucristuta sirviptï runakuna upatano rikapäkaman. Qamkunaqa puëdiq kashqaykitami nirkaykanki. Noqakunatami itsanqa imatapis rurayta mana puëdiqtano rikapäkaman. Qamkunataqa alimi rikapäkushunki. Noqakunataqa mana väliq runakunatanömi rikapäkaman.
11 Kananyaqpis noqakunaqa mikanar, yakunar, qasätsikur y maqar ushashqami puripäkü. Wayïkunapis kikïkunapaqa manami kantsu. 12 Pishipakurpis kikïkunami utikashqäyaq arupäkü.* Runakuna ashlipäkamaptinpis Tayta Diostami manakärï bendicionninta qonanpaq. Chikipäkamaptinpis mana rabyapaypami puripäkü. 13 Wasäta rimaptinpis ali shimiläpami parlapä. Kananyaqpis pasaypa mana väliqtano y manakaqtanömi rikapäkaman. 14 Manami qamkunata penqayman churanäpaqtsu tsayno nir qelqamü, sinöqa kuyay tsurïtano yätsirmi.
15 Chunka waranqa (10,000) yachatsishuqnikikuna kaptinpis Jesucristuta chaskikunaykipaq juklaylami puntata wilapäshushqanki. Tsay wilapäshuqnikiqa noqami kaykä. Tsaynöpami qamkunapa taytaykino kaykä. 16 Tsaymi qamkunata ruwakü noqa kawashqäno qamkunapis kawapäkunaykipaq.* 17 Qamkuna kaqcho imano kawashqätapis yarpätsishunaykipaqmi Timoteuta kachamushqä. Kuyay tsurïnömi payqa kaykan. Tsaynöpis Tayta Dios munashqannömi payqa kawaykan. Lapan *iglesiakunacho yachatsishqänömi shumaq yachatsipäkushunki.
18 Wakinnikiqa mana kutimunäpaq kaqta yarparshi pasaypa yachaq tukurkaykanki. 19 Tsayno yarpaptikipis Tayta Dios munaptinqa watukuq shamushaqmi. Tsaychönami tsay yachaq tukuqkuna musyamanqa. Paykunaqa mä rasunpakush Tayta Diospa munayninwan rurarkaykan o kikinpa yarpaynilanpitakush parlarkaykan. 20 Tayta Dios *mandaykashqancho kawayqa manami yachaq tukur parlashqantsitsu, sinöqa pay munashqanta rurar kawashqantsimi. 21 ¿Imano chayamunätataq munapäkunki? ¿Rabyashqa chayamunätaku o kushishqa chayamunätaku?