Job
34 Mastapis Eliú kayno nirqan:
2 “Yachaqkunapis tantiyakuqkunapis nishqäta shumaq mayapäkamay.
3 Qalluntsiwan mikuypa gustunta mayashqantsinömi rinrintsiwan mayantsi alita o mana alita rimaykashqantapis.
Tsaynöpami tantiyantsi rasun kaqta parlashqanta o manakaqkunata parlashqantapis.*
4 Tsayno kaykaptinqa shumaq yarpachakushun Job nishqankuna ali kashqanta o mana ali kashqantapis.
5 “Jobqa kaynömi nishqa: ‘Noqaqa jutsaynaq runami kä.
Tsayno kaykaptïpis Tayta Diosqa manami kuyapämantsu’.
6 Tsaynöpis kaynömi nishqa: ‘Jutsaynaq kaykar jutsayuq kashqäta nirqa lulakuykämanmi.
Jutsata mana ruraykaptïmi Tayta Dios castigaykäman.
Tsay castigamashqanqa flëchawan tuksishqanömi nanaykäman’.*
7 “¡Jobnöqa manami pipis lutanta parlantsu!
Payqa mana mantsakuypami Tayta Diosta manakaqman churan.
8 Payqa fiyu runakunawan y jutsa ruraq runakunawanmi juntakan.
9 Tsaynöpis kaynömi nimantsi: ‘¿Imapaqtaq Tayta Dios munashqanno kawashunpis?’
10 “Tantiyakuq runakuna, shumaq mayamay.
Lapanpaq munayniyuq Tayta Diosqa manami imaypis lutankunata rurantsu.
11 Jutsata rurashqanman tupumi pitapis castigan.
Tsaynölami alita rurashqanman tupu bendicionta churamun.*
12 Payqa manami imaypis lutanta rurantsu.
Manami manakaqkunata pitapis jitapantsu.
13 “Lapanpaq munayniyuq karmi kay patsata munaynincho tsararan.
Manami payno munayniyuq pipis kantsu.
14 Almantsita jorqur jämayniynaqta kacharamaptintsiqa 15 lapantsimi elaqpita wanur alpaman tikrashun.*
16 “Tantiyakuq karqa nishqäta shumaq mayamay.
17 Runa rurashqanman tupu mana juzgarqa kay patsatapis Tayta Dios manami munaynincho tsararanmantsu.
Ali mandaq kaykaptinqa ¿imanirtaq yarpanki munayniyuq Tayta Dios jananpaylapa pitapis juzgashqanta?
18 Tayta Diosqa mana jananpaypami pitapis juzgan.
Tsaymi reykuna y autoridäkuna mana alita ruraptin paykunatapis castigan.
19 Tayta Diosqa manami autoridäkunalapatsu favornin sharkun, sinöqa waktsakunapapis favorninmi sharkun.
Lapan runakunata kamashqa karmi waktsakunatapis rïcu runatano rikan.
20 Pay castigaptinqa elaqpitami pulan paqaspis runa pasarpun.
Siksikyaykälarmi wanurpun.
Pipis mana wanuykätsiptinmi mandaqkunapis elaqpita wanupäkun.
21 “Tayta Diosqa rikaykanmi runakuna imata rurashqantapis.
Payqa musyaykanmi imano kawashqantapis.
22 Fiyu runakuna yanawyaykaqman pakakuptinpis Tayta Dios rikaykanmi.
23 Manaraq juzgarpis maynami musyan imano kawashqanta.
24 Munayniyuqkunata qarqur trukanta churananpaq manami pitapis tapukuntsu.
25 “Munayniyuqkuna imata rurashqantapis Tayta Dios musyanmi.
Mana alita rurashqanta musyarmi tsakaypapis elaqpita ushakätsin.
26 Lapan runakuna rikaykaptinmi suwatano castigan.
27 Paykunaqa mana cäsukuq karmi Tayta Dios munashqanno kawapäkuntsu.
28 Mana kuyapaypami waktsakunatapis nakatsipäkun.
Tsay waktsakuna manakushqanta mayarmi Tayta Dios yanapan.
29 “Waktsakuna manakushqanta Tayta Dios mana cäsuptinpis ¿piraq ‘imanirtaq wiyamankitsu’ ninman?
*Pakakuptinpis ¿piraq tarinman?
Payqa lapan markakunata y runakunatami rikaykan.
30 Tsayno rikaykan fiyu runakuna mandaq kayman mana yaykunanpaqmi.
Payqa manami munantsu kuyashqan runakunata lulapänanta.
31 “Job, jutsaykikunata perdonashunaykipaq Tayta Diosta manakuy.
Lutankunata ama ruraynatsu.
32 Tayta Diosta manakuy jutsaykikuna ima kashqantapis musyatsishunaykipaq.
Payta promitiy jutsata yapay mana ruranaykipaq.
33 Tayta Diosta manakaqman churaykaptikiqa ¿munashqaykinötsuraq lapanta ruranman?
Nishqäkunata chaskikuy.
Mana chaskikurqa yarpashqaykikunata mä nimay.
34 “Mayamaqkuna, tantiyakuq kaykarqa 35 Job mana tantiyakuypa lutanta rimashqanta tantiyakäriy.
36 Manakaqkunata parlashqanpita Tayta Dios juzgatsun.
37 Jobqa jutsata rurashqan jananmanmi Tayta Diospa contran rimashqa.
Noqantsitapis manakaqmanmi churamashqantsi.
Tayta Diostapis manakaqmanmi churashqa”.