Proverbios
11 Pësu pishiykaqta rantikuptinqa TAYTA DIOS rabyakunmi.
Pësu complëtuta rantikuptinmi itsanqa kushikun.*
2 Runa tukuqkunaqa mana ali rikashqami kaykan.
Humildi runaqa shumaqmi tantiyakun.*
3 Ali runaqa Diosta cäsukurmi kawan.
Fiyu runami itsanqa jutsata rurashqanpita ushakan.
4 Tayta Dios juzganan junaqqa rïcu kashqanpis manami välinqatsu.
Alita ruraq runaqa salvakunqapaqmi.*
5 Ali runaqa aläpa manami nakanqatsu.
Fiyu runami itsanqa lutanta rurashqanpita nakanqa.
6 Ali runapaqa manami pipis contran sharkuntsu.
Ambiciösu fiyu runapaqmi itsanqa pïmaypis contran sharkun.
7 Fiyu runaqa imaykayuqpis kananpaq yarpachakuykashqalanchömi ushakanqa.
8 Ali runataqa ima nakaypitapis Tayta Dios salvanmi.
Fiyu runatami itsanqa nakananpaq kachariykun.
9 Fiyu runaqa nanaq shiminpa rimarmi runa mayinta jaqayätsin.
Ali runami itsanqa tantiyakuq kashpan ali kawapäkunanpaq yätsin.
10 Ali runapa imaykanpis kaptinqa marka mayinkuna kushikärinmi.
Tsaynölami kushikärin fiyu runa wanuptinpis.
11 Ali runa bendicionta qoptinqa marka mayinkuna alimi kawan.
Fiyu runa shimita jatipaptinmi itsanqa rimanakur qarqunakun.
12 Mana tantiyakuq runaqa runa mayintapis manakaqmanmi churan.
Tantiyakuq runami itsanqa upälakun.
13 Tulu shimiqa* imata mayashqalantapis wilapakurmi purin.
Yärakuypaq kaq runami itsanqa imata wilapaptinpis upälakun.
14 Nación mandaq mana ali mandaptinqa pasaypami nakapäkun.
Yätsikuqkuna atska kaptinqa mandaqpis alimi mandan.*
15 Mana reqishqa runata garantizarqa jaqami rikakun.
Pitapis mana garantizarqa jawkami kawakun.
16 Ali shonqu warmitaqa pïmaypis alimi rikan.
Arukuq runaqa rïcuyanmi.
17 Kuyapäkuq runaqa kikinpis kushishqami kawan.
Mana kuyapäkuq runami itsanqa lakishqa kawan.
18 Fiyu runa gänashqanqa yakunölami ushakan.
Ali runa gänashqanmi itsanqa mana ushakantsu.
19 Ali runaqa jawkami kawan.
Fiyu runaqa manaraqpis aykätami ushakan.
20 Mana ali yarpayniyuq runataqa TAYTA DIOS manami rikaytapis munantsu.
Ali ruraq runata rikarmi itsanqa kushikun.
21 Fiyu runaqa imaylapis castigashqami kanqa.
Ali ruraq runami itsanqa salvashqa kanqa.
22 Mana tantiyakuq warmiqa kuyaylapaq karpis
kuchipa senqancho jatiraykaq qori sortëjanömi kaykan.
23 Ali runa yarpashqanqa lapanpis alimi kamakan.
Fiyu runa yarpashqanmi itsanqa pïmaytapis rabyanätsin.
24 Runa mayinta imalawanpis yanapaqkunaqa mastami tarin.
Mana yanapakuqkunami itsanqa muchuyman chayan.
25 Runa mayinta imalawanpis yanapaqkunaqa bendiciontami chaskipäkun.
Yanapakuq kashqanpita kikintapis yanapanqami.
26 Trïgun kaykaptin rantikuyta mana munaqtaqa pïmaypis maldicionanmi.
Rantikuptinmi itsanqa agradëcikärin.
27 Alita ruraq runaqa ali rikashqami kanqa.
Mana alita ruraq runami itsanqa chikipashqa kanqa.
28 Rïcu kashqanman yärakuq runaqa tsakishqa rapranömi ushakanqa.
Ali runami itsanqa yöra tsintsiqno ali kawanqa.*
29 Mana tantiyakuq runa aylunkunata inkaraptinmi jaqayar aywakärin.
Tsaymi kikilan rikakur tantiyakuq runapa ashmaynin rikakun.
30 Ali runaqa ali wayuq yöranömi kaykan.
Paytaqa pïmaypis respitanmi.
31 Tayta Diosta cäsukuq runaqa alita rurashqanpitami premiuta kay patsacho chaskin.
Tayta Diosta mana cäsukuq runami itsanqa jutsata rurashqanpita castigashqa kanqa.