Proverbios
28 Jutsa ruraq runaqa pipis mana qatikachaykaptinmi qeshpir aywakun.
Ali runami itsanqa leonno imatapis mana mantsakuntsu.*
2 May nacionchöpis mana ali kawapäkuptinqa atska autoridätaraqmi nistapäkun.
Autoridä tantiyakuq karqa lapantapis sitiunmanmi churan.
3 Waktsakunata nakatsiq fiyu runaqa poquraykaq mikuyta loqla apaqnömi kaykan.
4 Leykunata mana cäsukuq runaqa fiyu runatami alaban.
Leykunata cumpliq runami itsanqa fiyu runata mana chaskipantsu.
5 Fiyu runakunaqa alita rurananpaq kaqta manami tantiyapäkuntsu.
TAYTA DIOSTA *ashiqkunami itsanqa ali kaqkunata rurananpaq tantiyakärin.
6 Rïcu kaykar yatapakuq kashqanpitaqa mas ali kaykan waktsala karpis mana yatapakuq kashqanmi.*
7 Tayta Diospa leyninkunata cäsukuq runaqa tantiyakuqmi kaykan.
Aläpa mikuq runakunawan puriq runaqa taytanta penqaymanmi churan.
8 Qellayninpa wawalanwan rïcuyaq runaqa manami tsay qellayta probichanqatsu.
Tsaypa trukanqa waktsakunata kuyapaq runami probichanqa.*
9 Tayta Diospa leyninkunata mana cäsukuq runataqa manakushqantapis Tayta Dios manami chaskinqatsu.
10 Jawka kawakuq runata jutsa rurayman ishkitsiq runaqa kikinpis jutsa ruraymanmi ishkinqa.
Jutsata mana rurananpaq tantiyatsiq runami itsanqa ali kawanqa.
11 Rïcu runaqa tantiyakuq kashqantami yarpapäkun
Waktsala karpis tantiyakuq runami itsanqa tsay rïcu runa imano kashqantapis tantiyan.
12 Ali runa gänaptinqa fiestataraqmi pïmaypis ruran.
Fiyu runa gänaptinmi itsanqa pïmaypis mantsakur pakakun.*
13 Jutsata rurashqanpita mana reconöciptinqa manami ima rurashqanpis alitsu kanqa.
Jutsa rurashqanta reconöcir kachariptinmi itsanqa Tayta Dios perdonanqa.
14 Tayta Diosta imaypis *mantsakuq runaqa kushishqami kawan.
Mana cäsukuq runami itsanqa nakayman chayanqa.
15 Yarqanashqa ösuno y mikanashqa leonnömi mana ali autoridäqa waktsakunata nakaykätsin.
16 Mana tantiyakuq autoridäqa mandashqan runakunata mana kuyapaypami nakatsin.
Mana yatapakuq autoridäqa atska watami kawanqa.
17 Wanutsikuq runaqa qeshpi qeshpilami wanushqanyaq purinqa.
Tsay runapa favornin pipis ama sharkutsuntsu.
18 Ali runaqa ima desgraciapitapis salvakunqami.
Fiyu runatami itsanqa ima desgracialapis pasanqa.
19 Arukuq runapaqa mikuyninpis putsuy putsuymi kanqa.
Qela runakunawan talukaq runapami itsanqa mikunanpaqpis mana kantsu.
20 Yärakuypaq kaq runaqa alabashqami kanqa.
Jukla rïcuyayta munaq runaqa lutan ruraykunamanmi churakanqa.
21 Pitapis juzgarqa mana jananpaypa juzganki.
Wakin juzgaqkunaqa juk amuy tantalapaqpis jutsa ruraqpa favornin sharkun.
22 Ambiciösu runaqa rïcuyaylapaqmi yarpachakun.
Manami musyanraqtsu ambiciösu kashqanpita waktsayänanpaq kashqanta.
23 Wakinqa mana alita ruraptiki alabashunaykipa trukanqa corrigishunkimi.
Tsaypita jaqayarpis nirkurraqmi tantiyakunki alipaq kashqanta.
24 Taytanta y mamanta suwaparkur “manami ima jutsatapis rurashqätsu” niq runaqa wanutsikuq runapa cumpinchinnömi kaykan.
25 Imaykapaqpis ambiciösu runaqa pïmaywanpis rimanakularmi kawan.
TAYTA DIOSMAN yärakuqkuna imaykayuqmi rikakärin.
26 Kalpanman y yachaq kashqanman yärakuq runaqa mana tantiyakuqmi kaykan.
Tantiyakuq runaqa imapitapis salvakunqami.
27 Waktsakunata yanapaptinqa manami imapis pishinqatsu.
Waktsakunata mana yanapaptinmi itsanqa pïmaypis maldicionanqa.
28 Fiyu runakuna miraptinqa runakuna mantsakunmi.
Tsay runakuna ushakaptinqa kushikärinmi.*