Job

 2 “Nishqaykinöpis Tayta Diospa nawpanchöqa manami pipis ‘jutsaynaqmi kä’ ninmantsu.

 3 Lapan jutsa rurashqankunata niptinqa manami juklaylatapis ñëgayta kamäpakunqatsu.

 4 Tayta Diosqa yachaqmi y lapanpaq munayniyuqmi kaykan.

¿Piraq upälatsiyta munar payta ichipanman?

5 “Tayta Diosqa rabyashpan jirkakunatapis elaqpitami juchutsin.

 6 Paymi kay patsapa cimientunkunatapis siksikyätsin.

 7 Pay mana munaptinqa intipis manami jeqamunmantsu.

Qoylarkunapis tsaparkuptinqa manami atsikyantsu.

 8 Munayniyuq karmi jana patsatapis kamarqan.

Lamar pulchaqyaykaqtapis chawätsinmi.

 9 Tayta Diosmi kamarqan Osa qoylarkunata, Orión qoylarkunata, Pléyades qoylarkunata* y sur kaq läducho qoturaykaq qoylarkunatapis.

10 “Tayta Dios rurashqankunaqa mana tantiyaypaqmi kaykan.

Espantaypaq rurashqankunaqa yupaytapis mana atipaypaqmi kaykan.*

11 Mana rikakaypa puriptinmi nawpäpa pasaptinpis mana rikätsu.

Nawpäpita aywakuptinpis manami tantiyätsu.

12 Imata apakuptinpis ¿piraq ‘kutitsimay’ ninman?

Imata ruraptinpis ¿piraq ‘imanirtaq tsayta ruranki’ ninman?

13 Tayta Diospa rabyayninqa manami juklaqa pasantsu.

Paymi lamarcho jatusaq mantsariypaq uywakunatapis munaynincho tsararan.

14 “Tsayno kaptinqa ¿imanöparaq Tayta Dioswan rimanaküman?

15 Mayjina jutsaynaq kashqäta yarparpis paypa nawpanchöqa jutsayuq kashqätami tantiyaküman.

Jutsata rurashqäpita juzgamaptinqa kuyapämänanpaq ruwakümanchari.

16 Ni qayatsinäpaqpis manami valornï kanmantsu.

Ima niytapis manami kamäpakümantsu.

17 “Tayta Diosmi jutsaynaq kaykaptïpis fiyupa nakatsiman.

Qerïkunatapis pasaypami miratsin.

18 Fiyupa lakikuymanmi churamashqa.

Jämayta kachanaläpaqpis manami kachapämantsu.

19 “Tayta Diosqa pasaypa munayniyuqmi.

Quejakuptïpis ¿piraq apamunman?

20 Mayjina jutsaynaq kashqäta niptïpis shimilämi condenamanqa.

Alilata ruraq kashqäta niptïpis jutsayuq kashqätami nimanqa.

21 Jutsaynaq kashqäta ninäpaqpis manami valornï kannatsu.

Kawaytapis manami munänatsu.

22 “Tsaymi noqa kayno nï:

Tayta Diosqa ali runatapis y fiyu runatapis iwalmi ushakätsin.

23 Elaqpita jutsaynaq runa wanuptin Tayta Dios asikunmi.

24 Kay patsata fiyu runakunapa munayninmanmi churashqa.

Shumaq mana juzgananpaqmi juezkunatapis upatakätsin.

Tayta Dios munayniyuq karmi tsaykunatapis ruran.

25 “Yalinakur runa cörrishqannömi kawaynïpis rätula pasarin.

Kushikuytapis manami tarishqätsu.

26 Lamarpa *büqui fiwlayla pasaqno y chipshata anka fiwlayla apaqnömi vïdäpis ushakaykan.

27 Lakikunäpa trukan kushikuyta munarpis 28 mana aliyarmi pasaypa lakikü.

“Jutsayuq kashqätami Tayta Dios yarpaykan.

29 Jutsayuq kaykarqa ¿imapaqtaq aliyaytapis munashaq?

30 Jabonwan mayjina maylakuptïpis

y lijyawan makïta awikuptïpis

31 shonqü qanra kaptinqa asyaq mitumanchari jatimanqa.

Röpäpis pasaypachari melanämanqa.

32 “Tayta Diosqa manami noqano runatsu kaykan autoridäman quejanäpaq.

33 Quejakuptïpis manami ima juezpis kantsu payta juzgananpaq.

34 Juez kar imarqa castigamaptin michanmanmi.

Tsaynöpis mantsakätsimaptin tsapämanmanmi.

35 Tsayno kaptinqa mana mantsakuypami parläman.

Tsayno yarpaptïpis manami payta juzgananpaq juez kantsu.