Colosenses
Colosas markacho taq yärakuq mayinkunaman apóstol Pablo cartata apatsishqan
Carta qalaykunan
1 Colosas markacho salvashqa kaqkuna:
Noqa Pablo, Jesucristupa apostolnin kanäpaq Tayta Dios churamashqa kaptinmi wawqintsi Timoteo ishkanï kay cartata aparkaykätsimü. Qamkunaqa Tayta Diospana karmi pay munashqanno kawarkaykanki. Papänintsi Tayta Dios [y Señor Jesucristo] kuyapäshushpayki ali kawapäkunaykipaq yanapaykuläshunki. 2 -
Tayta Diosta Pablo manakushqan
3 Qamkunapaq manakur Señornintsi Jesucristupa Papänin Tayta Diostami imaypis agradëcikärï. 4 Jesucristuman shumaq yärakärishqaykita y yärakuq mayintsiwan kuyanakurkaykashqaykitami musyapäkushqä. 5 Tayta Dioswan gloriacho imayyaqpis kawanaykipaq kashqanta musyapäkushpaykimi tsayno kawarkaykanki. Jesucristupa wilakuyninta chaskikärishqaykipita patsami gloriacho kawapäkunaykipaq kashqanta musyapäkushqanki.
6 Jesucristupa ali wilakuynin qamkunaman chayamushqannömi maytsaymanpis chayaykan. Tsay ali wilakuyta chaskikurmi Tayta Dios munashqannöna kawarkaykan. Qamkunapis Jesucristupa ali wilakuyninta chaskikushqaykipita patsami Tayta Dios kuyapäkuq kashqanta tantiyakur pay munashqannöna kawarkaykanki.
7 Tsay wilakuyninta chaskikärinaykipaqqa wilakuq mayï kuyashqä Epafrasmi* wilapäshushqanki. Paypis Jesucristupa sirviqnin karmi shumaq tantiyatsishushqanki. 8 Epafrasmi wilapäkamashqa Espíritu Santu yanapashuptiki kuyanakur shumaq kawarkaykashqaykita.
9 Tsayno kawapäkushqaykita musyashqä junaqpita patsami imaypis Tayta Diosta manakurkaykä Espíritu Santu tantiyatsishuptiki Tayta Dios imata munashqanta shumaq musyapäkunaykipaq. 10 Tsaynöpami pay munashqanno kawar y imaypis alilata rurar waran waran payta *reqipäkunkipaq.
11 Tsaynöpis manakurkaykä munayninwan yanapashuptiki ima nakaycho karpis mana ajayaypa payman yärakärinaykipaq 12 y imaypis kushishqa agradëcikärinaykipaq. Paymi salvamashqantsi lapan salvashqan kaqkunawan herenciantsita chaskir gloriacho kawapäkunantsipaq.
13 *Satanáspa munayninpita jorqarkamashpantsimi* kuyashqan Tsurin Jesucristo *mandaykashqanmanna Tayta Dios churamashqantsi. 14 Jesucristumi [yawarninta jichar] rantimashpantsi jutsantsikunata perdonamashqantsi.*
Jesucristo lapanpitapis mas munayniyuq kashqan
15 Tayta Diosta mana rikarpis Jesucristuchömi pay imano kashqantapis tantiyantsi.
Payqa lapan kamashqankunapaq punta yuriqmi kaykan.*
16 Paywanmi Tayta Dios kamarqan lapan imaykatapis:
jana patsacho kaqkunata, kay patsacho kaqkunata,
rikakaqkunata, mana rikakaqkunata
y jana patsacho lapan poderniyuqkunatapis.*
Lapantapis kamarqan Jesucristuwanmi y paypa makincho kananpaqmi.
17 Imapis manaraq kaptinmi Jesucristuqa mayna kaykarqanna.
Lapan kamashqankunatapis munayninchömi tsararaykan.*
18 Jesucristuqa umantsimi kaykan.
Noqantsinami *iglesian kar cuerpun kaykantsi.*
Lapan wanuqkunapita Jesucristo mas puntata kawarimurmi pïmaypitapis mas munayniyuq kaykan.*
19 Tsayno munayniyuq kananpaqmi Jesucristucho Tayta Dios kaykan.
20 Jesucristo kayninpami kay patsacho kaqkunawan y jana patsacho kaqkunawan Tayta Dios amistarqan.*
21 Nawpataqa noqantsipis lutanta yarparmi Tayta Diospa contran karqantsi. Jutsata rurashqantsikunami paypita rakimarqantsi. 22 Tsayno kawaykaptintsimi cruzcho Jesucristo wanuyninpa Tayta Dios perdonamashqantsi. Tsaymi paypa nawpancho jutsaynaqna *santu kaykantsi.
23 Nawpanman chayanantsipaqqa Jesucristuman imaypis yärakushun. Ali wilakuynincho nimashqantsita imaypis wiyakushun. Tsay wilakuytaqa maytsaychöpis wilakurkaykanmi. Tsaynölami noqapis wilakuykä wilakuqnin kanäpaq Tayta Dios akramashqa kaptin.
Nakarpis Pablo wilakushqan
24 Mana Israel runakunata wilapashqäpita nakatsipäkamaptinmi Jesucristo *iglesianpaq nakashqankunata cumplï. Paypa iglesianqa cuerpunmi kaykan.* Tsaymi lakikunäpa trukan kushikü. 25 Iglesianta sirvinäpaq Tayta Dios churamashqa kaptinmi* qamkunatapis lapan wilakuyninta musyaykätsï.
26 Tsay wilakuyninta unay runakuna mana musyashqa kaptinpis kananmi itsanqa Tayta Dios musyatsimashqantsina. 27 Tsaymi musyantsi mana Israel runakunapaqpis tsay wilakuy pasaypa kushikuypaq kashqanta. Tsay wilakuyqa kaynömi niykan: Jesucristo qamkunachömi kaykan. Payman yärakurmi Tayta Diospa nawpanman chayankipaq.
28 Tsaymi Tayta Dios yachayta qomashqan tupu Jesucristupa wilakuyninta lapan runakunata wilapar shumaq tantiyatsipäkü. Tsayno wilakärï Jesucristuta pïmaypis chaskikur Tayta Diospa nawpanman jutsaynaqna chayapäkunanpaqmi. 29 Tsayno kananpaqmi Jesucristo yanapamaptin imano nakarpis wilakur puriykä.