Mateo
Apostolninkunata Jesús akrashqan
10 Tsaypitanami chunka ishkay discïpulunkunata qayaykur munayninta Jesús qorqan runakunapita *supaykunata qarqunanpaq y tukuy niraq qeshyakunawan qeshyaqkunata y ima nanaywan kaqkunatapis aliyätsinanpaq.
2 Tsay chunka ishkay *apostolkunami karqan Simón (paypa jukaq jutinmi karqan Pedro), Simónpa wawqin Andrés, Zebedeupa tsurinkuna Santiago y Juan, 3 Felipe, Bartolomé, Tomás, Romapaq impuestuta cobraq Mateo, Alfeupa tsurin Santiago, Tadeo, 4 *Zelote nishqan Simón y Jesústa rantikuq Judas Iscariote.
Apostolninkunata wilakärinanpaq Jesús kachashqan
5 Tsay chunka ishkay apostolninkuna wilakuq aywananpaq kacharmi Jesús kayno nirqan: “Ama aywapäkunkitsu mana Israel runakunapa markankunamanqa, ni Samariacho kaykaq markakunamanpis ama yaykapäkunkitsu. 6 Tsaypa trukanqa aywapäkunki Israel runakunalaman. Paykunami oqrakashqa uyshano karkaykan. 7 Paykunata kayno nipäkunki: ‘¡Tayta Dios *mandaykashqan chayamushqanami!’ 8 Qeshyaqkunata aliyätsipäkunki. Wanushkunatapis kawaritsipäkunki. *Leprawan qeshyaykaqkunata aliyätsipäkunki. *Supaykunatapis runakunapita qarqupäkunki. Munaynïta dembaldila chaskishqaykino pitapis dembaldila aliyätsipäkunki.
9 “Qellayta, qorita ni cobritapis ama apapäkunkitsu. 10 Tsaynöpis ama apapäkunkitsu mirkapaykita, trukakärinaykipaq röpaykikunata ni garrutikikunatapis. Jatirashqayki lanqilaykiwan aywapäkunki. Arupakuq runa päguta chaskinanpaq derëchun kashqannömi qamkunapapis qarashushqayki derëchuyki kaykan.*
11 “May markaman chayarpis tapukärinki mayqan ali runa kashqantapis. Tsay runapa wayilancho patsakärinki juk markaman pasanaykiyaq. 12 Wayinman chayar kayno nipäkunki: ‘Ali kaway qamkunacho kaykulätsun’. 13 Ali chaskishuptikiqa nishqaykinömi paypaq ali kaway kanqa. Mana chaskishuptikimi itsanqa ali kaway kanqatsu. 14 Wilakushqaykita tsay wayicho o tsay markacho mana chaskishuptikiqa chakikicho kaykaq polvuta tapshiriykur aywakärinki.* 15 Rasunpami kayno nï: Sodoma y Gomorra runakunata castigashqanpitapis* mas peormi juiciu final junaqcho tsay runakunata Tayta Dios castiganqapaq.*
Discïpulunkuna chikishqa kananpaq Jesús nishqan
Marcos 13.9-13; Lucas 21.12-17
16 “*Löbukunaman uyshakunata qaykuqnömi* qamkunata kachaykä. Culebrano alcäbula puripäkunki y ashmay palumano humildi kapäkunki. 17 Runakunapita alcäbula puripäkunki. Chikishushpaykimi prësu tsarirkur autoridäkunaman apapäkushunkipaq. *Sinagögakunachöpis astapäkushunkipaqmi. 18 Noqaman yärakamashqaykipitami gobernadorkunamanpis y reykunamanpis prësu apapäkushunkipaq. Tsaynöpami wilakuynïta paykunata y wakin mana Israel runakunatapis wilapanki. 19 Autoridäkunaman apapäkushuptikipis ama lakikärinkitsu: ‘¿Imataraq nishaq? ¿Imanöraq parlashaq?’ nishpayki. Tayta Diosmi tantiyatsishunkipaq imata parlanaykipaqpis. 20 Manami kikikikuna yarpashqaykitatsu parlapäkunkipaq, sinöqa Taytaykipa Espïritun tantiyatsishuptikimi nipäkunkipaq.*
21 “Noqaman yärakamashqanpitami wawqintapis, tsurintapis y taytantapis wanutsinanpaq autoridäkunaman apapäkunqa.* 22 Noqaman yärakamashqaykipitami pïmaypis chikishunkipaq.* Tsayno chikishuptikipis wanunaykiyaq yärakamashpaykiqa salvashqami kankipaq.* 23 Juk markacho chikishuptikiqa juk markaman qeshpikärinki. Rasunpami kayno nï: Israel nacioncho kaykaq lapan markakunapa purir manaraq ushaptikimi *Runapa Tsurin kutimunqa.
24 “Mayqan yachakuqpis manami yachatsiqninpita mastaqa yachantsu.* Tsaynölami ashmaypis patronninpita mas munayniyuqtsu kaykan.* 25 Yachakuqkunapis yachatsiqninno karmi kushikärin y ashmaykunapis patronninno karmi kushikärin. Noqatapis Beelzebú* niykämarqa* qamkunatapis wamräkuna kaptiki masraqmi ashlipäkushunkipaq.
Mana mantsakärinanpaq Jesús nishqan
26 “Runakuna chikishuptikipis ama mantsakärinkitsu. Paykuna pakaylapa jutsata rurashqanpis juiciu finalchömi musyakanqa.* 27 Tsayno kaykaptinqa pakaylapa nishqäkunata pïmaypis mayananpaq wilakäriy. Rinrilaykicho nishqäkunatapis wayi jananman witsarkur qayakuypa wilakäriy. 28 Ama mantsakärinkitsu pipis wanutsishunaykipaq jurapäshuptiki. Wanutsishushpaykipis almaykitaqa manami wanutsinqatsu. Tsaypa trukanqa Tayta Dioslata *mantsakäriy. Paymi itsanqa munayniyuq kaykan pitapis almantinta infiernucho ushakätsinanpaq.
29 “¿Manaku ishkay pishqukunata juk centimulacho rantikärin? Tsayno kaptinpis manami ni juklaylapis wanuntsu Taytayki mana munaptinqa. 30 Aqtsaykipis paypaqqa yupashqalami kaykan. 31 Qamkunaqa tsaytsika pishqupitapis masmi välipäkunki. Tsayno kaykaptinqa ama mantsakäriytsu”.
Favornin parlaqkunapita Jesús nishqan
32 “Pipis runakunapa nawpancho favornï parlaptinqa noqapis jana patsacho kaykaq Taytäpa nawpancho paykunapa favorninmi parlashaq. 33 Pipis runakunapa nawpancho ñëgamaptinqa noqapis jana patsacho kaykaq Taytäpa nawpancho ñëgashaqmi.*
Jesúsman yärakuqkuna chikishqa kananpaq nishqan
34 “Ama yarpapäkuytsu shamushqäpita kay patsacho runakuna jawkala kawananpaq kashqanta. Tsaypa trukanqa kikinpurami chikinakärinqa. 35 Tsaymi taytanwan tsurin chikinakunqa, mamanwan wawan chikinakunqa y suedranwan lumtsuynin chikinakunqa. 36 Chikiqninkunaqa kikinpa wayinchömi kanqa.*
37 “Pipis discïpulü kayta munarqa taytanta y mamanta kuyashqanpita noqata mas kuyamätsun. Tsayno mana kuyamarqa manami discïpulü kanmantsu. Tsaynöpis wamrankunata kuyashqanpita noqata mas kuyamätsun. Tsayno mana kuyamarqa manami discïpulü kanmantsu. 38 Cruzninta apaqno mana qatirämarqa* manami discïpulü kanmantsu.* 39 Kawayninta salvayta munaqkunaqa kawayninta oqranqami. Kawayninta noqa rayku oqraqkunami itsanqa kawayninta salvanqa.* *
Premiuta chaskinantsipaq Jesús nishqan
40 “Qamkunata chaskishuqnikikunaqa noqatami chaskiykäman.* Noqata chaskikamaqkunaqa kachamaqnïtapis chaskikurkaykanmi.* 41 Profëtakunata chaskikurqa profëtanömi premiuta chaskinqapaq. Tsaynöpis jutsaynaq runata chaskikurqa tsay runanömi premiuta chaskinqapaq. 42 Mayqan discïpulüta juk pucillu yakulatapis makyaq kaqtaqa Tayta Diosmi premiuta qonqapaq”.