Salmos

25 (1b) TAYTA DIOS, qamtami lapan shonqüwan manakamü.

 2 Tayta Diosnilä, qamlamanmi yärakamü.

Runakuna penqapämänanpita tsapaykalämay.

Conträkuna asipämänanta ama munaykulaytsu.

 3 Qamman yärakamuqkunaqa mayqanpis penqayman churashqa ama kaykulätsuntsu.

Contrayki sharkuqkuna itsanqa penqayman churashqa kaykulätsun.

 4 Imano kawanäpaqpis nänikita reqiykatsilämay,* TAYTA DIOS.

Munashqaykino kawanäpaq nänikipa pushaykalämay.

 5 Jutsata mana ruranäpaq wilakuynikita tantiyaykatsilämay.

Qamlami salvamaqnï Tayta Dios kaykanki.

Imay hörapis qamlamanmi yärakamü.

 6 Imaypis kuyamashqankimi, TAYTA DIOS.

Kuyamashqaykita ama qonqaykulaytsu.

 7 Mözu kaykar jutsata rurashqäta ama yarpaykulaytsu.

Kuyapäkuq kaykarqa yarparkalämanki, TAYTA DIOS.

 8 TAYTA DIOSQA alilata ruraqmi kaykan.

Jutsa ruraqkunata pay munashqanno kawananpaqmi ali nänita reqitsin.

 9 Humildi kaqkunatami tantiyatsin.

Alilata rurananpaqmi yachatsin.

10 Rurashqan *pactuta y mandamientunkunata cumpliqkunataqa kuyapanmi.

Promitishqannöla mana kachaypami yanapan.

11 Pasaypa jutsayuqmi kaykä, TAYTA DIOS.

Kuyakuq kashqayki musyakänanpaq perdonaykalämay.

12 TAYTA DIOSTA *mantsakuqkunataqa kikinmi tantiyatsin shumaq kawapäkunanpaq.”

13 Paykunamanqa bendicionnintami imaypis churamun.

Paykunapita miraqkunatapis posisionta aypun.*

14 TAYTA DIOSQA payta mantsakuqkunapa amïgunmi kaykan.

Pactuta rurar promitishqannölami bendicionninta kamaripan.

15 TAYTA DIOSLATAMI imaypis manakü.

Paymi ima peligrupitapis tsapäman.

16 Pïnïpis mana kaptinmi pasaypa lakishqa kaykä, Tayta.

Nakashqäta rikar kuyapaykalämay.

17 Waran waranmi shonqü pasaypa lakinan.

Kay lakikuypita jorqaykalämay.

18 Pasaypa nakaykashqäta y lakikuykashqäta rikaykalämay.

Jutsäkunapita perdonaykalämay.

19 Conträkuna tsaytsikami kaykan, Tayta.

Pasaypa chikimashqanta rikaykulay.

20 ¡Tsay runakunapita salvaykalämay!

¡Paykunapita tsapaykalämay!

Qamlamanmi yärakamü, Tayta.

21 Qamman yärakurmi alilata ruraykä.

Munashqaykino kawaykaptïqa tsapaykalämay.