Santiago
Lutankunata mana parlanantsipaq nishqan
3 Kuyay wawqi panikuna, lutanta yachatsiptikiqa Tayta Diosmi juzgashunki. Tsayno kaykaptinqa juntakashqaykicho lapayki yachatsikuq kaylataqa ama munapäkuytsu.
2 Pipis shiminta dominakurqa jutsaynaqmi kanman. Tsay runaqa cuerpuntapis jutsa ruraypita dominakunmanmi. Shimintsita dominakuyta mana kamäpakurqa jutsatami ruraykantsi. 3 Musyashqantsinöpis cawallupa shiminman frënuta churaparkurmi munashqantsipa puritsintsi. 4 Jatunkaray *büquita wayra apaptinpis taksha timonlawanmi munashqanpa apan. 5 Upinaykaqla shanshapis ratarkurqa jatun jirkata ruparmi usharin. Tsaynölami shimintsipis takshala kaykarpis imaykatapis rimatsimantsi.*
6 Noqantsi parlashqantsipis ninanömi kaykan.* Mana alikunata parlarmi ali kawakuq runatapis rimanakatsintsi. Shimintsi takshala kaykarpis dominamaptintsimi pasaypa mana ali kawapäkuntsi. Nina imatapis rupar ushashqannömi mana ali parlashqantsipis kaykan. Lutankunata parlarqa *Satanás munashqantami ruraykantsi.
7 Ima uywakunatapis runaqa manshuyätsinmi: chucaru kaqkunata, päriqkunata, culebrakunata y lamarcho kaqkunatapis. 8 Shimintami itsanqa pipis dominakuyta kamäpakuntsu. Runapa shiminqa kaykan chucaru uywano y venënunömi. 9 Tsay shimilantsiwanmi Tayta Diospa jutintapis joqarkuntsi y runa mayintsipa wasantapis rimantsi. Kikin niraqta Tayta Dios kamaykämaptintsiqa manami tsayno rimashwantsu.*
10 Tsay shimilantsiwanmi alitapis mana alitapis parlantsi. Kuyay wawqi panikuna, ama tsayno kashuntsu. 11 ¿Juk pukyulapita yarqamunmantsuraq pochquq yaku y mishkiq yaku? 12 ¿Hïgus yörapis wayunmantsuraq aceitünasta? ¿Üvapis wayunmantsuraq hïgusta? ¡Manami! Tsaynöpis manami juk pukyulapitaqa pochquq yaku y mishkiq yakupis yarqamuntsu. Tsayno kaykaptinqa lutankunata parlanantsipa trukan alilata parlashun.
Rasunpa yachaq kar imano kawanantsipaqpis nishqan
13 Qamkuna kaqcho mayqanpis yachaq y tantiyaq karqa mana yachaq tukuylapa alikunata ruratsun. Tsayno kawaptinraqmi yachaq kashqan musyakanqa. 14 Runa mayinta chikiparqa y shonqulanchöpis nanapararqa ama yarpätsuntsu yachaq kashqanta. Tsayno alabakurqa manami rasun kaqtatsu parlaykan. 15 Yachaq tukuyqa manami Tayta Diospitatsu kaykan, sinöqa runapa yarpayninpita y *Satanáspitami. 16 Chikinakur y nanaparänakur kawarqa pasaypa mana alimi kawantsi.
17 Tayta Dios yachayta qomaptintsimi itsanqa pay munashqanno kawantsi. Tsaymi pïmaywanpis ali kawantsi, kuyanakuntsi, ali shonqu kantsi, kuyapantsi, alikunata imaypis rurantsi, pïmaytapis ali rikantsi y rasun kaqlata parlantsi.* 18 Runa mayintsiwan ali kawashqantsita rikakurmi wakin runakunapis tantiyakunqa runa mayinwan ali kawapäkunanpaq. Tsaynöpami lapantsipis Tayta Dios munashqanno kawapäkushun.