Santiago
Waktsakunata ali rikanantsipaq nishqan
2 Kuyay wawqi panikuna, munayniyuq Señor Jesucristuman yärakuykarqa lapan runakunata iwal rikashun. 2 Juntakashqaykiman ali röpashqa y qori sortëjashqa rïcu runa chayamuptin y pasaypa latsapa röpashqa waktsa runa chayamuptin 3 ¿imanirtaq rïcu kaqta respitar “kay alinnin kaq bancuman jamaykulay” nipäkunki y waktsa kaqtaqa “qamqa qepalacho ichikuy” o “pampalaman jamakuy” nipäkunki? 4 Tsayno nir ¿manaku jukninta ali rikaykanki y juknintana mana ali rikaykanki? Tsayno karqa mana ali jueznömi karkaykanki.
5 *Kuyay wawqi panikuna, mayapäkamay. ¿Manaku Tayta Dios waktsakunata akrashqa wakin runakunapita payman mas yärakunanpaq y mandashqancho imayyaqpis kawapäkunanpaq? Tsayno kawananpaqmi kuyaqninkunata promitirqan. 6 Tsayno kaykaptinpis qamkunaqa waktsakunata manakaqmanmi churarkaykanki. ¿Manaku rïcu runakunaqa munashqanta ruratsir nakatsipäkushunki? ¿Manaku maqaraykar juezkunamanpis aparkaykätsishunki? 7 ¿Manaku paykunaqa salvamaqnintsi Jesucristutapis manakaqman churarkaykan?
8 Tayta Diospa palabran kaynömi niykan: “Kikiki kuyakushqaykino runa mayikita kuyanki”.* Tsay leyta rasunpa cumplirqa alitami ruraykantsi. 9 Rïcu runakunata respitar y waktsakunata manakaqman churarqa tsay leyta mana cumplir jutsatami ruraykantsi.
10 Mayqanpis “Tayta Diospa lapan leyninkunata cumplïmi” nirkaykashqancho juk mandamientulatapis mana cumplirqa lapanta mana cumpliqnömi karkaykan. 11 Tayta Diospa mandamientunkunacho kaynömi qelqaraykan: “Majaykita ama jarukunkitsu”* y “runa mayikita ama wanutsinkitsu”*. Tsayno kaykaptinqa majanta mana jarukurpis runa mayinta wanutsirqa Tayta Diospa leyninkunata manami cumpliykantsu.
12 Tsayno kaykaptinqa imata parlanaykipaqpis y imata ruranaykipaqpis shumaq yarpachakäriy. Wilakuynincho nishqannölami juiciu final junaq Tayta Dios juzgashunki. 13 Runa mayikita mana kuyapaptikiqa qamkunatapis Tayta Dios manami kuyapäshunkitsu. Runa mayikita kuyapaptikimi itsanqa qamkunatapis kuyapäshunki.
Tayta Diosman yärakur alita ruranantsipaq yätsikuy
14 Kuyay wawqi panikuna, “Tayta Diosmanmi yärakuykä” nirpis pay munashqanno mana kawaptintsiqa ¿imapaqtaq yärakushqantsipis välin? Tsayno kawaq runakunataqa Tayta Dios manami salvanqatsu. 15 Diosman yärakuq mayintsita röpaynaqta o mikanaykaqta rikaykar 16 mana yanapaptintsiqa ¿imapaqtaq välin “Tayta Dios yanapaykuläshunki rakta jatikunaykipaq y saksashqa mikunaykipaq” nishqantsipis? 17 Tsaynölami runa mayintsita mana yanapaptintsiqa Tayta Diosman yärakushqantsipis manakaqlapaq kaykan.
18 Wakin runakunaqa kaynömi nipäkun: “Mana yanapakuq karpis Tayta Diosmanmi yärakü”.
Tsayno niptinpis noqaqa kaynömi nï: Mana yanapakuq karqa manami rasunpatsu Tayta Diosman yärakurkaykanki. Runa mayikita yanaparmi itsanqa Tayta Diosman rasunpa yärakurkaykanki. 19 Tayta Dios juklayla kashqanta criyishqayki ali kaptinpis tsay criyishqalaykiwanqa manami salvakunkitsu. Tayta Dios kashqantaqa *supaykunapis criyinmi. Tsayno criyirpis infiernuman qaykushqa kananpaq kashqanta musyarmi siksikyaykan.
20 ¡Toqshun tsakishqa runa! Runa mayikita mana yanapaptikiqa Tayta Diosman yärakushqaykipis manakaqlapaqmi kaykan. 21 Yarpäshun unay ayluntsi Abraham imano kashqantapis. Payshi Tayta Diosta cäsukur tsurin Isaacta *altarcho wanutsinanpaq pusharqan.* Tsayno cäsukuptinshi Tayta Dios payta jutsaynaqtano chaskirqan. 22 Tsaynöpami Abraham rasunpa yärakushqanta musyantsi.
23 Tayta Diospa palabranpis kaynömi niykan: “Tayta Dios nishqanta Abraham criyiptinmi jutsaynaqtana chaskirqan”.*
Tsaynöpis niykan Abrahamqa Tayta Diospa amïgun kashqantami. 24 Tsayno kaykaptinqa manami yärakushqalantsipitatsu Tayta Dios salvamantsi, sinöqa payman yärakur alita rurashqantsipitami.
25 Tsaynöpis yarpäshun *wayrapakuq warmi Rahab imata rurashqantapis. Israel runakuna Jericó markaman rikapakuq chayaptinshi wayinman pakaykurqan. Nirkurnashi Jericó runakuna ashiptin juk lädupana qeshpitsirqan. Tsayno rurashqanpitami paytapis Tayta Dios jutsaynaqtano chaskirqan.*
26 Tsaymi alikunata mana rurashqaqa Tayta Diosman yärakushqantsipis manakaqlapaq kaykan. Cuerpunpita alma yarquptin runa wanushqa kashqannömi yärakuynintsipis wanushqanno kaykan.