Hebreos
6 Jesucristupita yachakurqa ama qalaykunan kaq yachatsikuykunalataqa yachakushuntsu, sinöqa qalaykunanpita ushananyaq shumaq yachakushun. Tsaynöpami wamranöla kanantsipa trukan awkis runanöna kashun. Manami yaparir yaparir yachakushwantsu Jesucristuta chaskikur jutsa ruraykunata kacharinantsipaq kashqalanta, Tayta Diosman yärakunantsipaq kashqalanta, 2 *bautizakunantsipaq kashqalanta, jukpa umanman makintsita churanantsipaq kashqalanta,* wanushkuna kawarimunanpaq kashqalanta y kay patsa ushakaptin Tayta Dios runakunata juzgananpaq kashqalantaqa. 3 Tayta Dios yanapamaptintsiqa mas juk yachatsikuykunatapis yachakushunmi.
4 Jesucristuman yärakushqana kaykarqa, Tayta Diospa kuyakuyninta musyaykarqa, Espíritu Santuta chaskikushqana kaykarqa, 5 Tayta Diospa wilakuyninta cäsukushqana kaykarqa y juk vïdapa poderninkunata rikashqana kaykarqa* 6 Tayta Diosta ñëgaptinqa Tayta Diosman yapay kutitsiyta manami kamäpakuntsitsu. Jesucristuta yapay crucificaqno tsay runa kaptinmi wakin runakunapis Jesucristuta manakaqman churapäkun.
7 Tamya ushmashqa chakraman muruptinqa alimi wayun. Tsay chakraqa Tayta Diospa bendicionnintami chaskin. 8 Chakracho kashakuna y mana ali jachakuna winamuptinqa manami alitsu. Tsayno chakrataqa maldicionashpan rupaykatsinmi.
9 Kuyay wawqi panikuna, tsayno nirpis manami mana ali chakrano kashqaykitatsu yarpä, sinöqa yarpä salvashqana kashpayki Tayta Dios munashqanno kawapäkunaykipaq kashqantami. 10 Tayta Diosqa manami qonqanqatsu payta *kuyar yärakuq mayikikunata yanapaykashqaykita.
11 Jukniki juknikipis wanunaykiyaq tsayno kawanaykitami munapäkü. Tsayno kawarqa Tayta Dios shuyaraykätsishushqaykita chaskipäkunkimi. 12 Tsaynöpis tsayno kawarqa manami qelanankipaqtsu, sinöqa Tayta Diosman wakin yärakuqkuna kawashqannömi qamkunapis payman yärakur imaypis kawapäkunkipaq. Tsayno kawarqa pay promitishqankunatami chaskipäkunkipaq.
Tayta Dios promitishqanta cumplishqan
13 Abrahamta promitir Tayta Dios kikinpa jutinchömi cumplinanpaq jurarqan. Kikinpa jutincho tsayno jurarqan paypita mas munayniyuq pipis mana kaptinmi. 14 Jurarmi kayno nirqan: “Rasunpami bendicionnïta qoykushaykipaq. Tsaynöpis qampita miraqkunatami yanapashaq atskaman mirapäkunanpaq”.* 15 Tsayno promitiptinmi Abraham mana ajayaypa shuyarar Tayta Dios promitishqanta chaskirqan.
16 Promitishqanta cumplinanpaq pipis jurarqa kikinpita mas munayniyuqpa jutinchömi juran. Tsayno jurarqa imaykanöpapis cumplinmi. 17 Tsaymi Tayta Diospis Abrahamta promitishqanta cumplinanpaq jurarqan. Tsayno jurarqan imaypis cumplinanpaq kashqanta musyanantsipaqmi.
18 Tayta Dios juraypa promitishqanta musyar y imaypis mana lulakushqanta musyarmi promitishqanta imaypis cumplinanpaq kashqanta musyantsi. Tsaymi payman yärakur kushishqa kawantsi. 19 Payman yärakushqantsiqa büqui mana kuyukunanpaq tsararaq anclanömi* kaykan. Gloriacho kaykaq Lugar Santïsimuta tsaparaykaq cortïnapa* pasatsimashpantsimi Tayta Diospa nawpanman chayatsimantsi. 20 Perdonashqa kanantsipaqmi Jesucristo imayyaqpis mandaq cüra kar noqantsipita mas puntata tsayman yaykurqan. Paymi Melquisedecno imayyaqpis mandaq cüra kaykan.