Santiago
1 Maytsaychöpis taykaq chunka ishkay trïbu Israel runakuna:
Noqa Santiago,* Tayta Diospa y Señor Jesucristupa sirviqnin karmi qamkunapaq salüdüta apaykätsimü.
Imano nakarpis Tayta Diosman yärakunantsipaq nishqan
2 Kuyay wawqi panikuna, ima nakaycho karpis lapan shonquykiwan kushikäriy. 3 Musyapäkunkimi nakaykunawanraq lapan shonquykiwan Tayta Diosman yärakärishqaykita. 4 Mana ajayaypa yärakurqa Tayta Dios munashqanno kawanaykipaqmi shumaq yachakärinki.
5 Mayqaykipis Tayta Dios munashqanno kawayta mana kamäpakurqa tantiyatsishunaykipaq payta manakäriy. Manakuptikiqa tantiyatsishunkimi. Manakuq kaqtaqa imaypis yanapanmi.* 6 Itsanqa lapan shonquykiwan yärakur manakäriy. Manakushqayki höra ama yarpapäkuytsu “¿mayamanqatsuraq o manatsuraq?” nishpayki. Tsayno manakurqa lamarta wayra wak läduman kay läduman pulchaqyätsishqannömi karkaykanki. 7 Tsayno karqa ama yarpapäkuytsu Tayta Diospita imatapis chaskinaykipaq kashqanta. 8 Tsayno manakuq runaqa manami shumaq yärakuntsu ni Tayta Dios munashqannötsu kawan.
Waktsakunata y rïcukunata yätsishqan
9 Waktsa kaq wawqi panikuna, Tayta Dios ali rikashushqaykipita kushikäriy. 10 Rïcu kaq wawqi panikuna, qamkunapis kushikäriy riquëzaykikunaman mana atiënikunaykipaq Tayta Dios tantiyatsishushqaykipita. Mayjina rïcu karpis waytano ushakaqlami karkaykanki.
11 Fiyupa shanaptin qewapis tsakikäkunmi.
Waytanpis kuyaylapaq kaykashqancho shushur ushakäkunmi.
Tsaynölami rïcukunapis mas rïcu kayta ashirkaykashqalancho ushakanqa.*
Tayta Dios alilata ruraq kashqan
12 Ima nakaycho karpis Tayta Diosman mana ajayaypa yärakuq runaqa kushishqami kawan. Tsayno yärakurqa Tayta Diospa nawpanchömi corönata chaskinqa. Tsay corönaqa *mana ushakaq kawaymi kanqa. *Kuyaqninkuna chaskipäkunanpaqmi tsay corönata Tayta Dios promitishqa.
13 Yarpaynikiman jutsa ruraykuna shamuptinqa ama nipäkuytsu tsay yarpayta Tayta Dios qoshushqaykita. Tayta Diosqa manami imaypis jutsata rurantsu ni jutsata rurananpaq pitapis shakyätsintsu. 14 Tsaypa trukanqa tantiyakäriy tsay yarpay kikikipa shonquykipita kashqanta. 15 Shonquyki lutan yarpashqankunata rurarmi jutsata rurarkaykanki. Jutsata rurar kawaqkunataqa Tayta Dios infiernumanmi qaykunqa.
16 Kuyay wawqi panikuna, lutanta ama yarpapäkuytsu. 17 Lapan alikunata chaskipäkushqaykiqa atsikyaqkunata kamaq Taytantsipitami kaykan. Payqa manami lantuy pasashqannötsu, sinöqa imaypis kashqalanmi kaykan. 18 Kikin munashqannölami ali wilakuyninwan mushuq kawayta qomashqantsi lapan kamashqankunapitapis mas kuyay wamrankuna kanantsipaq.*
Jesucristupa wilakuyninta cäsukunantsipaq nishqan
19 Kuyay wawqi panikuna, tsayno kaykaptinqa yachaq tukur aläpa ama parlapäkuytsu, sinöqa wakinpis parlananpaq upälakäriy. Tsaynöpis lutalaqa ama rabyakäriytsu. 20 Rabyakurqa manami Tayta Dios munashqannötsu kawarkaykanki.
21 Mana ali ruraykunata y lapan viciukunatapis kacharipäkuy. Wilakuyninta shonquykikunaman Tayta Dios murushqa kaykaptinqa wilakuyninta shumaq cäsukäriy. Paypa ali wilakuyninqa salvashunaykipaq munayniyuqmi kaykan. 22 Wilakuyninta wiyashqalaykiwanqa ama contentakäriytsu, sinöqa cäsukur kawapäkuy. Tsayno mana kawaptikiqa yachakärishqaykipis manakaqlapaqmi kanqa.
23 Tayta Diospa wilakuyninta mayaykar mana cäsukuq runaqa qaqlanta espëjucho rikarpis 24 aywakur jukla qonqaykuqnömi kaykan. 25 Tayta Diospa wilakuyninta mana qonqaypa cäsukurmi itsanqa espëjucho rikakur qaqlan imano kashqanta mana qonqaqno kaykan. Tsayno kawaqtaqa Tayta Dios imachöpis yanapanqami.
26 Mayqaykipis “Tayta Diosmanmi yärakü” niykarpis mana alikunata parlarqa manami rasunpatsu yärakurkaykanki. Tsayno kaptikiqa Tayta Diosman yärakärishqaykipis manakaqlapaqmi kaykan. 27 Tayta Diosman rasunpa yärakurqa waktsakunata y viüdakunata nakaycho kaptin yanapanki. Wakinkuna jutsata rurar kawaptinpis noqantsiqa ama jutsata rurashuntsu.