Romanos
10 Wawqi panikuna, Tayta Diostami lapan shonqüwan ruwakü Israel mayïkuna salvakärinanpaq. 2 Paykunaqa Tayta Diosta cäsukuyta munarpis manami tantiyapäkuntsu 3 imano perdonamashqantsitapis. Tsaymi yarpapäkun Diospa leyninkunata cumplirraq perdonashqa kananpaq kashqanta. Perdonashqa kayta munarpis manami Jesucristuta chaskikärintsu. 4 Jesucristo shamushqana kaptin manami Diospa leyninkunata cumplirtsu perdonashqa kaykantsi, sinöqa Jesucristuman yärakurmi. Payman yärakuq kaqtaqa lapantami Tayta Dios perdonan.
5 Leykunata cumplirraq Tayta Dios munashqanno kawayta munaqkunapaqqa Moisés kaynömi qelqarqan: “Leynïkunata cumpliq kaq runaqa lapantami cumplinman”.*
6 Jesucristuman yärakurraq perdonashqa kashqantsita tantiyarmi kayno nintsi: “Shonquntsicho ama yarpäshuntsu kayno nir:* ‘¿Piraq jana patsaman witsanman?’ ”
(Tsay nishqannölami pipis jana patsamanraqtsu aywanman Jesucristuta kay patsaman pushamunanpaq.)
7 “Tsaynöpis ama yarpäshuntsu kayno nir: ‘¿Piraq patsa rurinman yaykuykunman?’ ”
(Tsay nishqannölami pipis wilakuyninta musyayta munar patsa rurinmanraqtsu yaykunman Jesucristuta kawaritsimunanpaq.)
8 Tsaypa trukanqa kaynömi nintsi: “Tayta Diospa wilakuynin shimikicho y shonquykichömi kaykan”.*
Tsaymi wilakuyninta wilakur kayno nintsi: 9 Jesucristo ämuyki kashqanta nirqa y wanushqanpita Tayta Dios kawaritsimushqanta lapan shonquykiwan criyirqa salvashqami kanki. 10 Lapan shonquykiwan criyipäkuptikiqa Tayta Dios perdonashunkimi. “Señor Jesucristuqa ämümi kaykan” nipäkuptikiqa Tayta Dios salvashunkimi. 11 Tayta Diospa palabranmi kayno niykan: “Pipis payman yärakuq kaqqa manami manakaqlapaqtsu yärakunqa”.*
12 Tsaymi Israel runatapis y mana Israel runatapis yärakuptinqa Tayta Dios perdonan. Lapantsipapis japalan Diosnintsi karmi manakuq kaqtaqa pïmaytapis salvan. 13 Tayta Diosmi palabrancho kayno niykan: “Noqata manakamaq kaqtaqa pïmaytapis salvashaqmi”.*
14 ¿Imanöparaq salvananpaq manakunqa Jesucristo salvamaqnintsi kashqanta manaraq criyirqa? ¿Imanöparaq criyinqa wilakuyninta manaraq mayarqa? ¿Imanöparaq mayanqa pipis mana wilapaptinqa? 15 ¿Imanöparaq wilapanqa wilakunanpaq pipis mana kachaptinqa? Tayta Diospa palabranchöpis kaynömi qelqaraykan: “Ali wilakuyta apamuq runakunaqa pasaypa kushikuypaqmi karkaykan”.*
16 Itsanqa wilakuptinpis manami lapan runakunatsu Jesucristupa ali wilakuyninta chaskikärin. Isaías qelqashqanchöpis kaynömi niykan: “Tayta Dios, wilakärishqäta ¿piraq chaskikushqa?”*
17 Imano kaptinpis Jesucristupa ali wilakuyninta* wiyarraqmi payman pipis yärakun.
18 Tsayno kaptinpis ¿manatsuraq wilakuyninta Israel runakuna mayashqa? Paykuna maynami mayashqa. Tayta Diospa palabranchöpis kaynömi qelqaraykan:
“Wilakuyninqa maytsaychömi musyakaykan.
Palabrankunaqa patsa kuchunyaqmi chayaykan”.*
19 Tsay wilashqankunata musyaykarpis ¿manatsuraq Israel runakuna tantiyashqa? Paykunaqa tantiyarqanmi*. Moiséspis kaynömi qelqarqan: “Jäpa marka runakunatana yanaparmi qamkunata rabyanätsishayki. Mana tantiyakuq runakunata chaskikurmi qamkunata lakikatsishayki”.*
20 Tsaynölami Isaíaspis kayno qelqarqan: “Mana *ashimaqkunatami parlapashqä. Mana ruwakamaq runakunatami yanapashqä”.*
21 Israel runakunapaqmi itsanqa kayno qelqarqan: “Mana cäsukamaq runakunaman waran waranmi rikräta makyarashqä”.*