1 Timoteo
Lutan yachatsikuqkuna yurimunanpaq kashqan
4 Espíritu Santumi tantiyatsimantsi shamuq watakunacho wakin runakuna Jesucristuman yärakushqanpita qepaman kutikur *supaykuna munashqanno lutanta yachatsinanpaq kashqanta. 2 Ishkay cära karmi lulakurpis penqakärinqatsu.
3 Tsay lutan yachatsikuqkunaqa majayuq kay mana ali kashqantami nipäkunqa. Tsaynöpis wakin mikuykunata mana mikunantsipaq kashqantami nipäkunqa. Mana ali kashqanta niptinpis Jesucristuman yärakuqkunaqa agradëcikur mikupäkunanpaqmi Tayta Dios kamashqa. 4 Tayta Dios kamashqankunaqa lapanpis alimi kaykan.* Majayuq kaypis Tayta Diospitami kaykan. Tsayno kaykaptinqa payta agradëcikur mikuytapis y majayuq kaytapis manakaqman ama churashuntsu. 5 Tayta Diospa palabranta tantiyakur y payta manakur agradëcikuptintsiqa mikuykunapis* y majayuq kaypis* alimi kaykan.
Jesucristupa ali sirviqnin kananpaq yachatsishqan
6 Kay cartacho qelqashqäkunata wawqi panikunata shumaq yachatsirqa Jesucristupa ali sirviqninmi kankipaq. Tayta Diospa wilakuyninta yachakurqa y pay munashqanno kawarqa ali alimentakushqanömi kankipaq.
7 Runakuna lutanta yachatsishqankunata ama chaskipaytsu. Puklaqkuna fïsicata rurashqanno qampis Tayta Dios munashqanno kawanaykipaq yachakuy. 8 Física rurayqa kay patsacho kawashqantsiyaqlami ali kaykan. Tayta Dios munashqanno kawaymi itsanqa kay patsacho y gloriachöpis ali kawanantsipaq kaykan.
9 Kay nishqäqa rasun kaqmi kaykan. Tsaytaqa lapan runakuna chaskikäritsun. 10 Tsayta tantiyakurmi imayyaqpis kawaq Tayta Diosman yärakushpantsi imano nakarpis wilakuyninta wilakuykantsi. Paymi Jesucristuta chaskikuq kaqtaqa pïmaytapis salvan.
11 Kay cartacho qelqamushqäkunata cäsukärinanpaq yachatsiy. 12 “Mözularaq kaykar ¿imanöpataq Timoteo yachatsimäshun?” nipäkuptinpis ama cäsupaytsu. Tsaypa trukanqa wawqi panikuna rikakunanpaq ali shimilaykipa pïmaywanpis parlay, jutsata mana ruraypa kaway, runa mayikita kuyapay, Tayta Diosman imaypis yärakuy y pay munashqanno kaway.
13 Chayamunäyaq Tayta Diospa palabranta wawqi panikunata liyipanki, yachatsinki y shakyätsinki.
14 Jesucristuta sirvinaykipaq Espíritu Santu churaykäshuptikiqa lapan shonquykiwan imaypis sirviy. Tsayno churashushqanki profëtakuna qampaq wilakuptin y *mayor wawqikuna umaykiman makinta churaykur Tayta Diosta manakäriptinmi.
15 Kay yätsishqäkunata mana qonqaypa imaypis ruray. Ali kawashqaykita rikakushushpaykimi pïmaypis tantiyapäkunqa Tayta Dios munashqanno kawaykashqaykita. 16 Jutsa rurayman paqta tuninkiman. Tsaynöpis paqta lutankuna imata yachaykätsinkiman. Rasun kaqlata yachatsir Tayta Dios munashqanno imaypis kaway. Tsayno kawashpaykimi kikikipis salvakunki y yachatsishqaykita chaskikuqkunapis salvakärinqa.