Salmos
Mandaq reyta Tayta Dios yanapashqan
(1a) David qelqashqan salmu.
110 (1b) Mandamaqnïtami TAYTA DIOS kayno nirqan:
“Alawqa kaq nawpäman jamakamuy lapan chikishuqnikikunata munaynikiman churanäyaq”.*
2 *Siónpita patsa mandaq kanaykipaqmi TAYTA DIOS yanapaykäshunki.
Mandaq kaykarqa chikishuqnikikunata munaynikicho tsararaykulay.
3 Guërraman aywanaykipaq wilakatsiptiki soldäduykikuna juklami juntakanqa.
Jirkakunacho waran waran shulya yurishqannömi qampis waranlan waranlan mözuyanki.
4 TAYTA DIOSMI jurashpan kayno nir promitishurqayki:
“Qammi imayyaqpis Melquisedecno cüra kanki”.
Tsay promitishushqaykitaqa imaypis cumplinqami.*
5 Tayta Diosqa alawqa kaq nawpaykichömi yanapashunaykipaq imaypis kaykan.
Paymi rabyashqan junaqqa contrayki sharkuq reykunatapis wanutsinqapaq.
6 Contrayki sharkuq nacionkunataqa maytsaychöpis wanutsirmi ushanqapaq.
Reykunatapis y autoridäkunatapis lapantami ushakätsinqa.
7 Qampami itsanqa näni kuchuncho yakuta upurkuptiki kalpayki yurinqa.