Salmos
Libru 1
Tayta Dios munashqanno kawaq runa y jutsasapa runa imano kashqanpis
1 Kushishqami kawan Tayta Dios munashqanno kawaq runaqa.
Tsay runaqa lutan yätsikuykunata manami chaskipantsu.
Wakin runakuna jutsata ruraptinpis payqa manami jutsata rurantsu.
Lutankunata parlaptinpis payqa manami lutanta parlantsu.
2 Tsaypa trukanqa Tayta Diospa leyninkunata kushishqami cäsukun.
Tsakaypapis junaqpapis tsay leykunalatami yarparaykan.
3 Tsay runaqa kaykan mayu kuchuncho plantashqa yöranömi,*
tiempun chayamuptin ali wayuq yöranömi,
y raprankuna mana qarwashtaypa loqluypa loqluykaqnömi.
Lapan rurashqankunapis alimi yarqapan.