Hebreos

Tayta Diosman yärakushqan

11 Tayta Diosman yärakurmi musyantsi pay promitimashqantsikunata cumplinanpaq kashqanta. Tsaymi promitimashqantsikunata manaraq rikarpis chaskinantsipaq kashqanta shuyaraykantsi. 2 Payman yärakuq unay runakunapis Tayta Dios munashqannömi kawapäkurqan.

3 Tayta Diosman yärakurmi tantiyantsi pay niptilan kay patsapis jana patsapis yurishqanta. Lapan rikaykashqantsitapis kamarqan imapis mana kashqanpitami.*

4 Abelpis Tayta Diosman yärakurmi wawqin Caínpita mas alinnin kaq sacrificiuta Tayta Diospaq rupatsirqan. Abel rupatsishqanta chaskirmi Tayta Dios musyatsirqan ali runa kashqanta.* Abel unayna ushakashqa kaykaptinpis rurashqantaqa kananyaqmi yarpantsi.

5 Enoctapis Tayta Diosman yärakuptinmi kawaykaqta Tayta Dios pushakurqan. Tayta Diospa palabranchöpis niykan Tayta Dios munashqanno Enoc kawashqantami.*

6 Yärakuynintsi mana kaptinqa manami imanöpapis Tayta Dios munashqanno kawashuntsu. Tayta Diosman yärakurqa pay kashqanta criyishun. Tsaynöpis criyishun payta *ashiqkunata yanapashqanta.

7 Noépis Tayta Diosman yärakurmi *arcata rurarqan diluviupita tsurinkunawan y lumtsuyninkunawan salvakärinanpaq. Diluviu kananpaq kashqanta Tayta Dios wilaptinmi diluviuta manaraq rikarpis arcata rurarqan. Tsaymi mana yärakuq runakunata Tayta Dios ushakätsirpis Noéta salvar jutsaynaqta chaskirqan.*

8 Abrahampis Tayta Diosman yärakurmi markanta kachariykur Tayta Dios qoykunanpaq kaq nacionman aywakurqan. May nacionman chayananpaq kashqantapis mana musyaykarmi Tayta Dios nishqanno aywakurqan.* 9 Tayta Dios promitishqan nacionman chayarpis payman yärakurmi toldukunalacho jäpa runanöla tarqan. Abrahamtano Tayta Dios promitiptinmi Isaacpis y Jacobpis tsaynöla tarqan. 10 Abraham tsayno tarqan Tayta Dios sharkatsishqan mana ushakaq markaman chayananpaq kashqanta musyarmi.*

11 Sarapis Tayta Diosman yärakurmi chakwanyashqanyaq qoluq kaykarpis qeshyaq rikakurqan. Payqa criyirqan Tayta Dios promitishqanta cumplinanpaq kashqantami.* 12 Tsaynöpami Abraham pasaypa awkinna kaykaptinpis tsurin yurirqan. Nirkurnami paypa tsurin y tsurinpita miraqkunapis jatun nación kashqanyaq mirarqan. Paykunami yupaytapis mana atipaypaq qoylarnöraq y lamar kuchuncho aquyshanöraq tsaytsikaman mirarqan.*

13 Tayta Dios promitishqanta manaraq chaskirpis Abraham, Sara, Isaac y Jacob payman yärakuykälarmi wanurqan. Manaraq chaskirpis Tayta Dios cumpliykashqanta rikarmi kushikärirqan. Paykunaqa kay patsacho qorpanöla kashqantami tantiyakärirqan.* 14 Tsayno tantiyarmi jana patsacho kaykaq markaman aywakärinanpaq shuyarpaykarqan. 15 Paykunaqa manami yarpapäkurqantsu unay tashqan markanman kutiyta. Markanpaq lakikurqa imaykanöpapis kutikärinmanmi karqan. 16 Markanpaq lakikärinanpa trukanqa jana patsacho kaykaq mas ali kaq markapaqmi yarpararqan. Tsaymi paykunapa Diosnin kashqanta Tayta Dios mana penqakuntsu. Tsay markataqa kamarishqalatanami paykunata shuyaraykätsin.

17 Abrahampis Tayta Diosman yärakurmi juklayla tsurin Isaacta *altarcho rupatsinanpaq Tayta Dios niptin pusharqan.* 18 Tsayno pusharqan Isaacpita atskaman mirananpaq Tayta Dios promitishqa kaykaptinpis.* 19 Tsaymi yarparqan wanutsiptinpis Isaacta kawaritsimunanpaq kashqanta. Rasunpami kawarimushqatano Abraham payta chaskirqan.*

20 Isaacpis Tayta Diosman yärakurmi Jacobta y Esaúta bendicionninta qorqan.*

21 Jacobpis Tayta Diosman yärakurmi Josépa tsurinkunata bendicionninta qorqan. Wanunanpaqna kaykar bendicionninta qoshpanmi tukrunman tuknakuykur Tayta Diosta adorarqan.*

22 Josépis Tayta Diosman yärakurmi Israel mayinkunata wilarqan Egiptupita yarqapäkunanpaq kashqanta. Wanunanpaqna kashqanta musyarmi paykunata kayno nirqan: “Kaypita aywakärishpayki tulükunatapis apakärinki”.*

23 Moiséspa maman y taytanpis Tayta Diosman yärakurmi Faraón mandashqanta mana cäsukärirqantsu. Tsaymi Moisés yuriptin kuyaylapaq kashqanta rikaykur kimsa killa pakarätsikurqan.*

24 Moiséspis Tayta Diosman yärakurmi mözuyarkurnaqa Faraónpa warmi tsurinpa wawan* kayta mana munarqantsu. 25 Tsaymi Faraónpa wayincho jutsata ruralar kawananpa trukanqa Israel mayinkunawan nakar kawarqan. 26 Tayta Diospita premiuta chaskinanpaq kashqanta musyarmi Egiptucho rïcu kayta munarqantsu, sinöqa Cristo nakananpaq kashqanno nakashqan mas ali kashqantami tantiyarqan.

27 Tayta Diosman Moisés yärakurmi Faraónta mana mantsaypa Tayta Diosta rikaykaqno Egiptupita aywakurqan. 28 Tayta Diosman yärakurmi Israel runakunata nirqan *Pascua fiestata rurar punku quiciunkunata yawarwan lushipäkunanpaq. Tsayno lushitsirqan wanutsikuq *ángel yawarta rikar Israel runakunapa wayinkunacho qechpa tsurinkunata mana wanutsinanpaqmi.*

29 Israel runakunapis Tayta Diosman yärakurmi Puka Lamarta tsakilapa pasarqan. Egipto runakunami itsanqa qepanta yaykushpan shenqaypa wanupäkurqan.*

30 Tayta Diosman yärakur Israel runakuna Jericó markata qanchis junaq tumaparkaykaptinmi murällanpis juchurqan.*

31 *Wayrapakuq warmi Rahabpis Tayta Diosman yärakurmi rikapakuq Israel runakunata kushishqa chaskikurqan.* Tsaynöpami mana cäsukuq runakuna ushakaptinpis payqa mana ushakarqantsu.*

32 Tayta Diosman yärakuqkunaqa maspis kaykanraqmi. Itsanqa tiempumi mana kantsu Gedeónpita,* Baracpita,* Sansónpita,* Jeftépita,* Davidpita,* Samuelpita* y profëtakunapita wilapänäpaq. 33 Tayta Diosman yärakurmi wakinqa nacionkunata tsarikarkärirqan, wakinqa runakunata ali juzgarqan y wakinnami Tayta Dios promitishqanta chaskirqan. Wakintaqa leonkunapis manami mikurqantsu.* 34 Wakintaqa ninapis manami ruparqantsu.* Wakinnami espädawan wanutsinanpaq kaykaptinpis qeshpirqan. Valorniynaq kaykaqkunatapis Tayta Diosmi yanaparqan valornin kananpaq. Tsaymi juk nacionpita shamuq soldädukunatapis Tayta Diosman yärakur vincipäkurqan. 35 Tsaynölami Tayta Diosman yärakuq warmikunapis rikapäkurqan wanushqa tsutaraykaq wawankuna kawarimushqanta.*

Wakintanami nakatsiypa wanutsipäkurqan. Tayta Diosta ñëgatsinan kashqa nakatsiptinpis Tayta Dios kawaritsimunanpaq kashqanta musyar manami ñëgapäkurqantsu. 36 Tsaynölami wakin nakarqan runakuna ashliptin, astaptin* y carcilman wichqaptin.* 37 Wakintami saqmaypa wanutsipäkurqan.* Wakintami serruchuwan kutsuypa wanutsipäkurqan. Wakintanami espädawan wanutsipäkurqan.* Wakinnami pasaypa waktsa kar uysha qaratsalapita y cabra pirqashlapita röpankuna jatishqa markan markan pïmaypitapis chikishqa puripäkurqan. 38 Runakuna chikiptinmi tsaki jirkakunapa y chunyaq raqrakunapa purir machaykunaman pakakärirqan. Tayta Diosman mana yärakuqkunaqa manami mayqanpis paykunano ali karqantsu.

39 Yärakushqanpita Tayta Dios paykunata ali rikaptinpis kay patsacho manami mayqanpis Tayta Dios promitishqanta chaskipäkurqantsu. 40 Tsaypa trukanqa mas ali kaqta chaskikärinantami Tayta Dios munarqan. Tsaynöpami paykunapis y noqantsipis promitishqan salvacionta chaskishunpaq.