Mateo
Templuta juchutsipäkunanpaq kashqanta Jesús wilashqan
24 Templupita yarqurir Jesús aywaykaptinmi discïpulunkuna rikatsirqan templu kuyaylapaq kashqanta.
2 Tsawraqa Jesús kayno nirqan: “Rasunpami kayno nï: Kay lapan rikarkaykashqaykita chipyaqmi juchutsipäkunqa. Manami ni juk rumilapis perqaranqanatsu”.
Manaraq kutimuptin imano kananpaq Jesús nishqan
3 Tsaypitami Olivos jirkanman aywaykur Jesús jamakurqan. Tsaychömi kikilankuna kaykar discïpulunkuna tapurqan kayno nir: “Wilaykalämay, tayta. ¿Imaytaq nishqaykino kanqa? Kutimunaykipaq y kay patsa ushakänanpaq ¿ima señaltaq kanqa?”
4 Tsayno niptinmi Jesús kayno nirqan: “Paqta pipis lulapaykäshunkiman. 5 Atskaqmi jutïcho shamunqa ‘noqami Cristo kä’ nir. Tsayno nirmi atska runakunata engañapäkunqa. 6 Guërra kaptinpis y guërra kananpaq kashqanta mayarpis ama mantsakäriytsu. Puntataqa tsaykunaraqmi kanqa. Tsayno kaptinpis kay patsaqa manaraqmi ushakanqaraqtsu. 7 Juk nacionmi juk nacionwan guërrata ruranqa y juk marka runakunami juk marka runakunawan wanutsinakunqa. Tsaynölami [pestipis,] muchuypis y terremötupis maytsaycho kanqa. 8 Tsay nakaykunaqa kanqa qalaykunalanraqmi.
9 “Tsay witsanmi nakatsipäkushunkipaq y wanutsipäkushunkipaq. Noqaman yärakamashqaykipitami pïmaypis chikipäkushunkipaq.* 10 Tsayno nakarmi yärakamashqanpita qepaman atskaq kutikärinqa. Paykunami qepaman mana kutiqkunata chikir autoridäkunaman juknintapis juknintapis apatsipäkunqa. 11 Lula profëtakunapis atskaq yurimushpanmi lutanta yachatsir atskaq runakunata criyitsipäkunqa. 12 Maytsaychöpis jutsata rurar kawarmi mana kuyanakunqanatsu. 13 Tsayno kaptinpis wanunanyaq yärakamaqkunaqa salvashqami kanqa.* 14 Tayta Dios *mandaykashqanpa ali wilakuyninta maytsay nacionkunachöpis wilakuptinraqmi kay patsa ushakanqa.
Nakaykuna kananpaq kashqanta Jesús tantiyatsishqan
Marcos 13.14-23; Lucas 21.20-24
15 “Profëta Daniel qelqashqannölami Tayta Dios mana munashqanta *sagrädu templucho rikapäkunkipaq.* (Kay qelqashqäta liyiqkunaqa shumaq tantiyakutsun.)* 16 Tsayno kaykaqta rikar Judea markakunacho taqkuna jirkakunapa qeshpir aywakäritsun. 17 Wayi janancho kaykaqkuna* imankunatapis mana jorquylapa qeshpikäritsun. 18 Chakracho kaykaqkunapis ni punchun jorquqpis ama kutitsuntsu.*
19 “¡Wawalaw, imanöraq nakanqa chichu warmikuna y iti wawayuqkuna! 20 Tayta Diosta manakäriy qeshpishqayki junaq tamya witsan ni jamay junaqcho mana kananpaq. 21 Tsay witsanqa runakuna fiyupami nakapäkunqa. Tayta Dios kay patsata kamashqanpita patsa manami imaypis tsayjinanpa nakapäkushqatsu.* Tsaynöpis yapayqa mananami imaypis tsayno nakapäkunqanatsu. 22 Akrashqan runakunata kuyaparmi Tayta Dios tsay nakay junaqkunata pasatsinqa. Mana pasatsiptinqa lapanpis wanurmi ushakanqa.
23 “ ‘Tayta Dios kachamushqan Cristo kaychömi kaykan’ nishuptikipis ama criyipäkunkitsu. ‘Wakchömi kaykan’ nishuptikipis ama cäsupankitsu. 24 Tsay witsanmi Cristo tukuqkuna y lula profëtakunapis yurimunqa. Runakunata criyitsinan kashqami espantaypaq milagrukunatapis ruranqa. Tsayno rurarmi Tayta Dios akrashqan runakunatapis engañayta munapäkunqa. 25 Manaraq tsayno kaptinmi musyanaykipaq qamkunata wilaykä.
26 “ ‘Tayta Dios kachamushqan Cristo chunyaq jirkachömi kaykan’ nishuptikipis ama aywapäkunkitsu. ‘Tsay wayichömi kaykan’ nishuptikipis ama criyipäkunkitsu. 27 Elquptin ciëlupa juk kuchunpita jukaq kuchunyaq atsikyashqanta rikashqannömi *Runapa Tsurin kutimuptin lapan rikanqa.* 28 Maychöpis wanushkuna jitaraykashqanmanmi wiskulkuna juntakanqa”.* *
Jesús kay patsaman kutimunanpaq kashqan
Marcos 13.24-37; Lucas 17.26-30, 34-36; 21.25-33
29 “Fiyupa nakaykuna pasarkuptinmi intipis tsakakäkunqa, killapis atsikyämunqanatsu, qoylarkunapis shikwamunqa y jana patsapis siksikyanqa.* 30 Tsaypitanami *Runapa Tsurin shamunanpaq señal jana patsacho rikakämunqa. Runapa Tsurin shamuptinnami pukutay janancho fiyupa chipchipyaykar munayniyuq aywaykämuqta maytsaypitapis runakuna rikapäkunqapaq. Tsayno aywaykämuqta rikarmi lapan nación runakuna mantsakushpan waqapäkunqapaq.* 31 *Cornëtata fuertipa tukamuptinmi *angilninkunata Runapa Tsurin kachamunqa akrashqan kaqkunata maytsaypitapis shuntananpaq.
32 “Hïgus yörata rikar tantiyakäriy. Raprankuna tsintsimuptinmi musyapäkunki usya tiempu qalaykunanpaqna kashqanta. 33 Tsaynölami nishqäno pasaykashqanta rikar musyapäkunki Tayta Dios *mandaykashqan cercachöna kashqanta. 34 Rasunpami kayno nï: Kanan tiempu runakuna manaraq ushakaptinmi lapan nishqäkuna cumplikanqa. 35 Jana patsa y kay patsa ushakaptinpis noqa nishqäkunaqa manami ushakanqatsu.
36 “Runapa Tsurin imay junaq imay höra kutimunanpaq kashqanta manami runapis ni angilpis [ni Diospa Tsurinpis] musyantsu. Tsaytaqa Taytalämi musyaykan.
37 “Noé kawashqan witsan runakuna kawashqannömi* Runapa Tsurin shamunan witsanpis kawarkaykanqa. 38 Diluviu manaraq kaptin *arcaman Noé yaykushqan junaqyaqmi runakuna mikur, upyar y casarar karkaykarqan. 39 Tsayno kaykaptinmi diluviu elaqpita shamuptin* lapanpis shenqaypa wanur ushakarqan. Tsaynölami mana musyashqan höra Runapa Tsurinpis elaqpita shamunqa.
40 “Tsay hörami ishkay runakuna chakrancho arurkaykaqpita jukaqta apakunqa y jukaqta kachaykunqa. 41 Maraycho ishkay warmikuna aqakurkaykaqpitami jukaqta apakunqa y jukaqta kachaykunqa. 42 Tsaymi kamarikushqalana karkaykanki. Manami musyapäkunkitsu imay junaq Señorniki kutimunanpaq kashqantapis.
43 “Tantiyakäriy. Imay höra suwa shamunanpaq kashqanta musyarqa mana punuypami wayinta pipis täpanman. 44 Tsaynöla qamkunapis kamarikushqala karkaykay. Mana musyashqayki hörami elaqpita Runapa Tsurin shamunqa.*
Ashmayman Jesús tinkutsishqan
45 “Mas yärakuypaq y tantiyakuq kaq ashmaynintami wayinman patronnin churan wakin ashmaykunatapis höralancho qarananpaq. 46 Patronnin kutimur yätsishqanno lapantapis ruraykaqta tariptin tsay ashmay pasaypami kushikunqa. 47 Rasunpami kayno nï: Tsay ashmaypa makinmanmi lapan imaykantapis patronnin churanqa. 48 Mana yärakuypaq ashmay karmi itsanqa ‘patronnï manaraqmi kutimunqaraqtsu’ nir 49 ashmay mayinkunata maqan y upyaq mayinkunawan mikur upyar qoyäkun. 50 Tsayno kaykaptinmi mana yarpashqan höra elaqpita patronnin kutimur 51 mana kuyapaypa ishkay cära runakunatawan tsay ashmayta castiganqa. Tsaychömi fiyupa waqar kiruntapis uchupäkunqa”.