Habacuc

 2 TAYTA DIOS, Israel mayïkunata unay shumaq yanapashqaykitami wilapämashqa.

Lapan rurashqaykikunata musyarmi pasaypa kushikü.

Unay yanapashqaykinöla kananpis noqakunata yanapaykalämay, Tayta.

Tsaynöpami rurashqaykikunata rikapäkushaq.

Jutsata rurapäkushqäpita rabyashqa karpis kuyapaykalämay.

3 Temán markapitami TAYTA DIOS shamun.

Parán jirkanpitami *santu Dios aywamun.* Selah

Intëru ciëluchömi munayniyuq kashqan rikakaykan.

Intëru patsachömi payta alabarkaykan.

 4 Chipchipyaynin nawipis tsakaqpaqraqmi atsikyaykämun.

Makinpitapis elquynöraqmi atsikyay rikakämun.

Munayniyuq kashqanqa maytsaychöpis musyakaykanmi.

5 Contrankunata castigananpaq shamuptin puntantami mantsariypaq pesti qeshya shamun.

Qepantanami shanapäkuy qeshya shamun.

 6 Tayta Dios ichiykuptin patsa pasaypami siksikyan.

Rikaraptin maytsay markakunapis pasaypami mantsakun.

Jirkakuna unaypita patsa karpis juchunmi.

Tsaynölami jirkankunapitapis juchu aywan.

Tayta Diosmi itsanqa mana ushakaq kaykan.

7 Cusáncho taq runakunata pasaypa desgracia pasaykaqtami rikashqä.

Madiáncho taq runakuna pasaypa mantsakur siksikyaykaqtami rikashqä.

 8 Tayta Dios, ¿mayukunapitaku o lamarkunapitaku rabyashqa kaykanki?

¿Tsaypitatsuraq cawalluyki muntashqa y guërra carrëtaykiwan lapanta vincirkur puriykanki?

9 Flëchawan flëchanaykipaqpis kamarikushqalanami kaykanki.

Flëchaykitapis jitaq jitaqlanami kaykanki. Selah

Mayukunawanmi kay patsatapis raqratsashqanki.

10 Rikashushpaykimi jirkakunapis mantsariywan siksikyan.

Löcu tamyapis pasaypa tamyamun.

Lamarpis bunyaypa bunyarmi qaparan.

Yakupis fiyupami pulchaqyan.

11 Flëchaykita y lanzaykita jitaptiki pasaypa chipchipyaykarmi aywan.

Aywaykaqta rikarmi intipis killapis ichikuykun.

12 Contraykikunata castiganaykipaqmi fiyupa rabyashqa kay patsacho maytsaypapis purinki.

Castigarmi nacionkunatapis jarukur ushanki.

13 Kuyashqayki runakunata salvanaykipaqmi yarqamushqanki.

Akrashqayki reyta yanapanaykipaqmi shamushqanki.

Tsaymi contrayki sharkuq reykunata ushakätsishqanki.

Paykuna mandashqan nacionkunatapis asulashqankimi. Selah

14 Tsay nacionkunapita shamuq soldädukunami löcu tamyano shapäkamurqan wakpa kaypa qarqapäkamänanpaq.

Fiyu runa jäkuqcho asaltar kushikushqannömi paykunapis atacamashpan kushikärirqan.

Jina kaqtami kikinpa flëchankunawan flëchar ushakätsishqanki.

15 Bunyaypa bunyaykaq lamar jananpami cawalluyki muntashqa purinki.

16 Shamushqaykita mayashpä pasaypami mantsakushqä.

Wirpäpis pasaypami siksikyashqa.

Tulükunapis pasaypami qotukashqa.

Kalpäpis pasaypami ushakashqa.

Tsayno karpis conträkunata ushakätsinaykipaq kashqanta musyarmi qamman yärakaykämü.

17 Hïguskuna mana tuktuptinpis,

üvakuna ni olïvukuna mana wayuptinpis,

chakracho ima cosëcha mana kaptinpis

y uyshakuna y wäkakuna ushakaptinpis

18 TAYTA DIOSMAN yärakurmi kushikushaq.

Salvamänanpaq kashqanta musyarmi payta imaypis alabashaq.

19 Tayta Diosmi valorta qoman imano karpis payman yärakunäpaq.

Pay yanapamaptinmi luychunöraq shumaq cörrï.

Puntakunapa purirpis mana lutskakaypami purï.*