Hebreos

Tayta Dios munashqanno kawanantsipaq yätsishqan

13 Tsay aylunöla imaypis kuyanakur kawapäkuy. 2 Tsaynöla wayikiman patsakuq pï chayamuptinpis kushishqala patsatsipäkunki. Tsayno patsatsishqanchömi wakin runakuna mana musyashpan *angilkunata patsatsirqan.*

3 Kikikikuna carcilcho wichqaraykashqaykino carcilcho kaykaqkunata yarpapäkunki. Kikikikuna nakaykashqaykino nakatsishqa kaqkunatapis yanapanki.*

4 Lapayki majayuq kaqkuna majaykiwan kuyanakur ali kawapäkuy. Majaykita ama jarukäriytsu. *Fornicación jutsata ruraqkunata y majanta jarukuqkunataqa Tayta Dios juzganqami.

5 Tsaynöpis qellaylapaqqa ama wanupäkuytsu. Tsaypa trukanqa tsararashqalaykiwan contentakäriy.* Tayta Dios kaynömi nin: “Imaypis manami kacharishaykitsu ni qonqashaykitsu”.*

7 Tayta Diospa palabranta yachatsishuqnikikunata yarpapäkuy. Tayta Diosta sirvir alikunata rurashqanta tantiyakur paykuna yärakushqanno qamkunapis Tayta Diosman yärakäriy.

8 Jesucristuqa unaypis, kananpis y imayyaqpis kashqannölami kaykan.* 9 Lutan yachatsikuqkuna yachatsishqanta ama chaskipaytsu. Manami paykuna nishqannötsu reqishqa mikuykunalata mikur Tayta Dios munashqanno kawantsi, sinöqa Tayta Dios yanapamaptintsimi.

10 Noqantsipa *altarnintsiqa manami *Sagrädu Tolducho kaykaq altarnötsu kaykan. Altarnintsipita mikuptintsipis Sagrädu Tolducho Tayta Diosta sirviq cürakunaqa manami tsaypita mikunanpaq derëchun kantsu.*

11 Nawpa kaq *pactuchöqa runakuna jutsata rurashqanpita mandaq cürakunami uywakunapa yawarninta Lugar Santïsimuman apapäkuq. Tsay uywakunapa aytsantanami campamentupita jorqurir rupatsipäkuq.* 12 Tsaynölami Jesucristutapis markapita jorquykur wanutsipäkurqan. Yawarninta jichar wanuyninpami jutsantsikunata Tayta Dios perdonamantsi. 13 Jesucristo tsayno nakaykaptinqa noqantsipis campamentupita yarqushun.* Payta nakatsishqanno nakatsimaptintsipis o payta jamurpashqanno jamurpämaptintsipis payman imaypis yärakur kawashun. 14 Noqantsipa markantsiqa manami kay patsachötsu kaykan. Tsaypa trukanqa kay patsacho qorpanöla karmi mana ushakaq markataraq shuyaraykantsi.

15 Tsayno kaykaptinqa Jesucristuman yärakur sacrificiuta altarman churaqno Tayta Diosta imay hörapis alabashun. Paypa jutinta joqarir alabashqantsimi ali kaykan.* 16 Tsaynöpis mana qonqaypa alikunata rurapäkunki. Jukniki jukniki imalawanpis yanapanakunki. Tsayno kawarmi Tayta Dios munashqan sacrificiukunata payman apaqno kaykantsi.

17 *Mayor wawqikunata cäsukäriy. Paykunaqa shumaq rikashunaykipaqmi waran waran yarpachakurkaykan. Tsaynöpis ali o mana ali rikashushqaykipitami Tayta Diosta cuentata qonqa. Tsayno kaykaptinqa ama lakikatsiytsu, sinöqa shakya shakyala rikashunaykipaq yätsishushqaykita chaskikäriy. Lakikatsiptikiqa manami qamkunapaqpis alitsu kanqa.

18 Noqakunapaqpis Tayta Diosta manakäriy. Musyämi lutanta mana rurapäkushqäta. Tayta Dios munashqalantami imaypis rurayta munapäkü. 19 Tsaynöpis payta manakäriy qamkunaman yapay kutipäkamunäpaq.

Carta ushanan

20 Tayta Diostami qamkunapaq manakuykä. Paymi ali kawayta qomantsi. Señor Jesucristutapis kawaritsimushqami. Uyshankunatapis shumaqmi mitsin. Yawarninta jicharmi imaypis mana ushakaq *pactuta noqantsiwan rurashqa.* 21 Jesucristupa jutinchömi payta manakärï imaypis yanapaykushunaykipaq. Munashqanta rurapäkunaykipaq ali kaqkunata kamaripaykuläshunki. Payqa imayyaqpis alabashqa kaykulätsun. [Amén.]

22 Wawqi panikuna, walkalatapis kay cartacho yätsimushqäta chaskikulay. 23 Wawqintsi Timoteupis carcilpita yarqamushqanami. Qamkunaman manaraq shamuptï noqa kaqman chayamuptinqa ishkanïkunami shapäkamushaq.

24 Salüdüta qoykulanki *mayor wawqikunata y wakin wawqi panikunatapis. Italia nacionpita kaq wawqi panikunapis tsaynölami salüdunta apatsikamun.

25 Tayta Dios kuyapar yanapaykuläshunki. [Amén.]