Hebreos
Mushuq pactuta Tayta Dios rurashqan
8 Shumaq tantiyakäriy: Mandaq cüra Jesucristo lapanpaq munayniyuq Tayta Diospa trönun alawqa kaq nawpanchömi jamaraykan.* 2 Kananqa jana patsacho kaq *Sagrädu Tolduchömi mandaq cüra kaykan. Tsay toldutaqa manami runakunatsu sharkatsishqa, sinöqa kikin Tayta Diosmi.
3 Kay patsacho mandaq cüraqa tsaki mikuy ofrendakunata y sacrificiukunata Tayta Diospaq apashqannömi Jesucristupis noqantsi rayku wanur Tayta Diospaq sacrificiuno karqan.* 4 Kay patsalacho karqa Jesucristo manami cüra kanmantsu karqan. Kay patsachöqa *Moisés qelqashqan leykunacho nishqanno maynami cürakuna karkaykan ofrendakunata y sacrificiukunata *altarcho rupatsipäkunanpaq. 5 Paykunaqa jana patsacho kaykaq Sagrädu Toldu niraqta rurashqalanchömi Tayta Diosta sirvipäkun. Tsayta musyantsi Moisésta Tayta Dios kayno nishqa kaptinmi: “Lapanta ruratsinki kay puntacho rikatsishqätanöla”. Payta tsayno nirqan Sagrädu Tolduta sharkatsinanpaq rikatsirmi.*
6 Jesucristumi itsanqa kay patsacho kaq cürakuna Tayta Diosta sirvishqanpitapis mas ali sirviykan. Tsaynölami favornintsi rurashqan mushuq *pactupis nawpa kaq pactupita mas ali kaykan. Tsay mushuq pactuchömi mas ali kaqkunata Tayta Dios promitimantsi. 7 Nawpa kaq pactucho imapis mana pishiptinqa manami juk pactuta Tayta Dios ruranmantsu karqan. 8 Itsanqa nawpa kaq pactuta runakuna cumpliyta mana kamäpakuptinmi Tayta Dios kayno nirqan:
“Chayamuq junaqkunachömi Israel runakunawan y Judá runakunawan mushuq pactuta rurashaq.
9 Tsay pactuqa manami unay aylunkunata Egiptupita jorqamur rurashqä pactunötsu kanqa.
Unay aylunkuna tsay pactuta mana cumpliptinmi paykunata cäsupashqänatsu.
Noqa Tayta Diosmi tsayno nï.
10 Tsay junaqkuna pasarkuptinmi Israel runakunawan pactuta rurashaq.
Tsayno rurarmi leynïkunata yarpayninkunaman churashaq.
Shonqunkunamanmi leynïkunata qelqashaq.
Paykunapa Diosninmi kashaq.
Paykunanami kuyashqä runakuna kanqa.
Noqa Tayta Diosmi tsayno nï.
11 Tsay witsanqa waktsapis rïcupis lapanmi *reqipäkamanqa.
Tsaymi runa mayinta ni wawqinta pipis mana yätsinqatsu reqimänanpaq.
12 Paykunapa lapan jutsankunatapis perdonashaqmi.
Ima jutsata rurashqantapis manami yarparäshaqnatsu”.*
13 Mushuq pactupita tsayno parlarmi Tayta Dios tantiyatsimantsi nawpa kaq pactu makwayashqana kashqanta. Makwayarnaqa ushakänanpaqnami kaykan.