Lucas
Runakuna jutsankunata kacharinanpaq Jesús nishqan
13 Tsaychömi runakuna Jesústa wilapäkurqan kayno nir: “¡Galilea runakuna templucho sacrificiuta rupaykätsiptinshi soldädunkunata *Pilato kachashqa wanutsinanpaq!”
2 Tsawraqa Jesús kayno nirqan: “¿Wakin Galilea runakunapita tsay wanuq runakuna mas jutsayuq kashqantaku yarpapäkunki? 3 Noqa kaynömi nï: Manami jutsayuq kashqanpitatsu wanupäkushqa. Tsayno kaptinpis jutsa rurayta mana kacharirqa paykunanömi wanunkipaq. 4 Tsaynöpis Jerusaléncho Siloé törri juchur chunka pusaq runakunatami wanutsirqan. ¿Jerusaléncho taq marka mayinkunapita tsay wanuq runakuna mas jutsayuq kashqantaku yarpapäkunki? 5 Noqa kaynömi nï: Manami jutsayuq kashqanpitatsu wanupäkushqa. Tsayno kaptinpis jutsa rurayta mana kacharirqa paykunanömi wanunkipaq”.
Mana wayuq hïgusman Jesús tinkutsishqan
6 Hïgusman tinkutsirmi Jesús kayno nirqan: “Juk runapashi üva chakrancho hïgusninpis karqan. Tsayshi wayuyninta palaq aywar juklaylatapis mana tarirqantsu. 7 Tsayshi minkayninta kayno nirqan: ‘Kimsa watanami kay hïguspa wayuyninta palaq shamushqä y manami ni juklaylatapis tarishqätsu. ¡Jukla muturiy! Mana wayuykarqa ¡imapaqtaq chakrachöpis kanqa!’
8 “Tsayno niptinshi minkaynin kayno nirqan: ‘Juk wata mas shuyaykushun, tayta. Chulpata winaparkur shumaq uryashaq. 9 Tsayno ruraptïqa paqta wayunmanpis. Tsaycho mana wayuptinmi itsanqa muturinkipaq’ ”.*
Kurku warmita Jesús aliyätsishqan
10 Jamay junaqmi *sinagögacho Jesús yachaykätsirqan. 11 Tsaychömi kaykarqan *supay kurkuyätsishqan warmi. Payqa imanöpapis derechakayta mana puëdirmi chunka pusaq wata nakaykarqan. 12 Tsayno kaykaqta rikarmi Jesús qayaykur kayno nirqan: “Kananqa aliyashqanami kaykanki”.
13 Tsayno nir yataykuptinmi tsay warmi jinan höra derechakarkur Tayta Diosta alabarqan.
14 Jamay junaqcho Jesús aliyätsiptinmi sinagögacho mandaq runa rabyakur kayno nirqan: “Soqta junaqmi kaykan runakuna arunanpaqqa. Aliyashqa kayta munarqa tsay junaqkunacho shapäkamunkiman. ¡Imanirtaq jamay junaqchöraq shapäkamunki!”
15 Tsawraqa Jesús kayno nirqan: “¡Ishkay cära runakuna! Jamay junaq kaptinpis ¿manaku töruykita bürruykita paskarkur yaku uputsiq qatinki? 16 Kay warmiqa Abrahampita miraqmi kaykan. Chunka pusaq watami *Satanás nakatsishqa. Tsayno kaykaptinqa ¿manaku jamay junaqchöpis aliyätsïman?”
17 Tsayno niptinmi contrankuna pasaypa penqakärirqan. Wakin runakunami itsanqa Jesús espantaypaq ruraykashqanta rikar kushikärirqan.
Ñäpush muruman Jesús tinkutsishqan
Mateo 13.31-32; Marcos 4.30-32
18 Mastapis Jesús kayno nirqan: “Tayta Dios *mandaykashqanta ¿imamanraq tinkutsïman? ¿Ima tinkutsikuywanraq tantiyatsïman? 19 Tayta Dios mandaykashqanqa ñäpush muruta juk runa chakranman murushqannömi kaykan. Winamur jatunyaptinmi rämankunacho pishqukunapis qeshwankunata rurapäkun”.*
Levadüraman Jesús tinkutsishqan
20 Nirkur kaynöpis nirqan: “Tayta Dios *mandaykashqanta ¿imamanraq tinkutsïman? 21 Tsayqa levadüranömi kaykan. Tantata rurananpaq ishkay arröbano harinaman levadürata winaptin mäsa shumaqmi jakan”.*
Kichki punkuman Jesús tinkutsishqan
22 Tsaypita Jerusalénpa Jesús aywarmi markakunapa y jalqakunapapis yachatsiraykar pasarqan. 23 Tsaychömi juk runa kayno nir tapurqan: “Tayta, ¿walkaqlaku salvakunqa?”
Tsaymi Jesús kayno nirqan: 24 “Imanöpapis kichki punkupa yaykapäkuy. Noqa kaynömi nï: Atskaqmi yaykuyta munanqa. Itsanqa manami kamäpakärinqatsu. 25 Wayipa duëñun punkunta wichqarkamuptinqa waqtacho quëdar kayno nirmi takakärinkipaq: ‘¡Tayta, punkuta kichapaykalämay!’ Tsawraqa pay kayno nishunkipaq: ‘Qamkunataqa manami reqïtsu. ¡Maypitaraq kakunkipis!’ 26 Tsaymi kayno nipäkunkipaq: ‘Qamwanmi mikurqantsi y upurqantsi. Markäkunachöpis yachatsirqaykimi’. 27 Tsawraqa yapaymi kayno nishunkipaq: ‘Qamkunataqa manami reqïtsu. ¡Maypitaraq kakunkipis! ¡Jutsasapa runakuna, nawpäpita witikäriy!’
28 “Tsayno nishuptikimi fiyupa waqar kiruykikunatapis uchupäkunkipaq. Tsay hörami Abrahamta, Isaacta, Jacobta y profëtakunata rikapäkunkipaq Tayta Dios *mandaykashqancho karkaykaqta. Qamkunami itsanqa yaykuyta kamäpakärinkipaqtsu. 29 Maytsay nacionkunapitapis juntakaykurmi Tayta Dios mandaykashqancho mikupäkunqapaq.* 30 Tsay hörami qepa kaqkuna puntacho kanqa. Punta kaqkunanami qepacho kanqa”.
Jerusalén runakunapaq Jesús lakikur waqashqan
31 Tsay junaqmi *fariseukuna chayaykur Jesústa kayno nipäkurqan: “¡Kaypita aywakuy! Herodesmi wanutsishunaykipaq juraykan”.
32 Tsawraqa Jesús kayno nirqan: “Tsay atuqta kayno nir wilapäkuy: ‘Juk ishkay junaqlanashi *supaykunata runakunapita qarqunqa y qeshyaqkunatapis aliyätsinqa. Warantinlanashi lapan rurananpaq kaqkunata ushanqa. 33 Imano kaptinpis kay junaqkunashi Jerusalénman aywanqa. Jerusalénpita juk läduchöqa profëtakuna manashi wanunmantsu’ ”.
34 Tsaypitami Jesús kayno nirqan: “¡Wawalaw, Jerusalén, Jerusalén! Qamqa Tayta Diospa profëtankunata nawpapita patsami wanuykätsinki.* Pay kachamushqan wilakuqkunatapis saqmaykankimi. Chipshankunata walpa oqlakuqno wawaykikunata* atska kuti shuntayta munaptïpis manami munashqankitsu. 35 Tsayno kashqaykipitami wayikikunapis templuykipis chunyaraykar quëdanqa. Noqa kaynömi nï: Manami yapay rikamankinatsu hasta kayno ninaykiyaq: ‘¡Tayta Diospa jutincho shamuq runa alabashqa kaykulätsun!’*”