Salmos
Tayta Dios kuyakuq kashqan
118 Alilata ruraq kashqanpita TAYTA DIOSTA agradëcikäriy.
Kuyapäkuyninqa manami imaypis ushakantsu.*
2 Israel runakuna kayno nitsun:
“Tayta Diospa kuyakuyninqa mana ushakaqmi kaykan”.
3 Aarónpita miraqkunapis* kayno nitsun:
“Tayta Diospa kuyakuyninqa mana ushakaqmi kaykan”.
4 TAYTA DIOSTA *mantsakuqkuna lapanpis kayno nitsun:
“Tayta Diospa kuyakuyninqa mana ushakaqmi kaykan”.
5 Lakikushpämi TAYTA DIOSTA manakurqä.
Mayamarmi nakaypita jorqamashqa.
6 TAYTA DIOS noqawan kaptinmi imatapis mana mantsakütsu.
Runakuna conträ sharkuptinpis manami lakikütsu.*
7 Noqataqa TAYTA DIOS manami kacharimantsu.
Paymi imaypis yanapaykäman.
Rikashaqraqmi chikimaqnïkunata ushakätsishqanta.
8 Runaman yärakunantsipa trukanqa TAYTA DIOSMAN yärakushqantsimi mas ali kaykan.
9 Mandaq reykunaman yärakunantsipa trukanqa TAYTA DIOSMAN yärakushqantsimi mas ali kaykan.
10 Maytsay nación soldädukunami atacamänanpaq juntapämarqan.
Jina kaqtami TAYTA DIOSPA jutincho lapanta ushakätsirqä.
11 Tsay soldädukunami atacamänanpaq jiruruypa tsapämarqan.
Jina kaqtami TAYTA DIOSPA jutincho lapanta ushakätsirqä.
12 Abëja juntaqnömi juntapämarqan.
Jina kaqtami kashata nina ushaqno lapanta ushakätsirqä.
TAYTA DIOSPA jutinchömi supayninta apatsirqä.
13 Paykunaqa ichiklapami mana vincimarqantsu.
Tsayno kaptinpis TAYTA DIOS yanapamaptinmi vincirqä.
14 TAYTA DIOSMI imaypis valorta qoman.
Paytami imaypis alabä.
Paymi imapitapis salvamaqnï.*
15 Tayta Dios munashqanno kawaqkunami toldunkunacho kushikurkaykan.
¡TAYTA DIOSMI munayninwan lapanta vincishqa!
16 ¡TAYTA DIOS munayniyuq kashqanqa mantsariypaqmi kaykan!
¡TAYTA DIOSMI alawqa kaq makinwan lapanta ushakätsishqa!
17 Noqaqa manami wanushaqraqtsu.
TAYTA DIOS rurashqankunata wilakunäpaq kawashaqraqmi.
18 TAYTA DIOS fiyupa castigamarpis wanuypitaqa tsapämashqami.
19 ¡Templu punkunta kichapaykalämay!
TAYTA DIOSTA agradëcikunäpaqmi yaykuyta munaykä.
20 Tsay punkumi kaykan TAYTA DIOS kaqman yaykuna punku.
Tsay punkupaqa yaykun pay munashqanno kawaq runakunalami.*
21 Tayta Dios, manakushqäta mayamashqaykipitami qamta agradëcikü.
Noqata salvamashqaykipitami yusulpalä nï.
22 Wayi sharkatsiqkuna “kay rumiqa manami alitsu” nir jitarishqanmi wayi esquïnan cimientuchöna churaraykan.
23 Tsayno kananpaq Tayta Diosmi kamakätsishqa.
Tsaypitami pasaypa kushikuntsi.*
24 Kay junaqqa TAYTA DIOS yanapamashqantsi junaqmi kaykan.
Tsaypita kushikur payta alabashun.
25 ¡TAYTA DIOS, noqakunata salvaykalämay!
¡Lapan rurashqäkunapis ali kananpaq yanapaykalämay!
26 TAYTA DIOSPA jutincho shamuq runa alabashqa kaykulätsun.
TAYTA DIOSPA wayinchömi qamkunata kushishqa chaskikärï.*
27 TAYTA DIOSLAMI rasunpa kaq Diosqa.
Paymi ali kawayta qomashqantsi.
Tsayno kaykaptinqa *altarpa waqrankuna kaykashqanman chayashqantsiyaq rämakuna aptashqa yaykushun.*
28 Tayta Dios, qammi Diosnï kaykanki.
Qamta agradëcikurmi alabashayki.
29 Alilata ruraq kashqanpita TAYTA DIOSTA alabashun.
Payqa imaypis kuyapäkuqmi kaykan.