¡Cushishgala ricarayga alapami yanapacun!

FILIPINAS naciunpa, Baguio jutiyoj marcachomi ishcay jipashcuna callipa aywaycashgancho ricargan Helen jutiyoj cristiana carrituwan predicaycajta y cushish asir paycunata ricaraycajta. Cay jipashcunaga defrentimi pasacorgan, pero Helen cushish ricarashganpitaga alapami paycunapis cushicorgan.

Chaypita wasinpa juc carruwan cuticashganchonami ricargan juc Saloncho jw.org letracunata, ricaycurmi yarpärirgan tuta carritucho ricashgan letracunawan igual cashganta. Carrupita urarcurmi ricargan imay hora lapan congregaciuncuna goricashganta y nircur decidirgan chay horacho reuniunman aywananpaj.

Chaypitami ishcan jipashcuna reuniunman aywargan y yaycuycashganchomi ricärirgan Helenta y asicuyninpitami rasla reguirirgan. Helenmi cayno wilacun: “Saludacamaj nogaman witicämuptinga ichic manchacärirgami ima mana alitapis ruraycushcächi” nir. Chaypitami cay ishcan jipashcuna wilapärirgan ima pasashganta.

Cay ishcay jipashcunataga reuniunga alapa gustashga, reguinacushgancunawan caycashgannomi sienticushga. Chaymi reunión ushariptinpis pichapacuyta yanapacushga. Cananga jucaj jipashlanami chaychoga taran, reuniuncunaman aywar y Bibliapitapis yachacurmi galaycushga. Chay lapanta pasacushga, ¡Helen cushishga ricarashganpita!