Jehovapa amigun canquimanmi

Jehová munaycan paypita yachacunayquita y gampaj imano yarpachacushgantapis. Aumi, Paypita yachacuptiquega quiquiquimi payman masraj guelicunqui. ¿Rasunpachuraj Diospa amigunman ticrashwan? (Leiriy Salmo 25:14). ¿Imataraj ruranquiman Diospa amigun canayquipaj? Bibliachomi chaypita yachacushun. Palabrancho wilamanchi Diospa amigunman ticrashganchi alapa ali cashganta.

1. ¿Imatataj Jehová gamta niyculäshunqui?

Bibliaga nin: “Diosman guelicuptinchega paypis noganchimanmi guelicamunga” (Santiago 4:8, TNM). Caywanga Jehová niycäshunqui ‘amigulayqui cayta munä’ nir. Öraga pipis ninman ‘¿imanoraj Diospa amigun cäman payta mana ricaycaptëga?’. Pero Jehovaga Palabranta gomashcanchi, payta mana ricaycarpis, imano cashganta shumaj musyanapaj y payman imano guelicunapäpis. Bibliapita cada cadala yachacushpanchega, Taytalanchi Jehovapitaga imapis raquichimäshunchu.

2. ¿Imanirtaj Jehovaga pipitapis más ali amigo caycan?

Jehovaga amatar cuyashunqui. Chaymi cushishga cawacunayquita y payman yäracunayquita munan. Y manami chaylachu, sinoga “ima yarpachacuyniquicunatapis paypa maquinman churaycuy”, payga alapami yarpachacun gampaj (1 Pedro 5:7). Jehová imaypis amiguncunata yanapan, shogan y mañacushgantapis wiyan (leiriy Salmo 94:18, 19).

3. ¿Imanoraj canman Jehovapa amiguncuna?

Lapan runacunapämi Jehová yarpachacun, “ali shongu runacunatami ichanga cuyan” (Proverbios 3:32). Jehová cushicunmi amiguncuna ali cajcunata rurar mana alicunata chiquiptin. Waquincuna yarpapäcun Jehová mandacushgancunata cäsucunapaj sasa cashganta. Diosninchega chasquicalämäshunmi cuyacoj captinchi y lapanta cäsucunapaj calpachacuptinchi (Salmo 147:11; Hechos 10:34, 35).

SHUMAJ YACHACURCUNAPAJ

4. Abrahanga Jehovapa amigunmi cargan

Jehovaga Abrahanpa amigun cargan; yachacushun imanirtaj chayta ninchi. Abrahanpita musyanayquipaj leipäcuy Génesis 12:1-4 y caycunapita parlapacäriy:

• ¿Imata rurananpätaj Abrahanta Jehová nergan?

• ¿Imataj Jehová aunipargan?

• Jehová mandacushganta wiyarcur, ¿imataj Abrahán rurargan?

5. ¿Imataraj ruranman Jehovapa amiguncuna?

Ali amiguyoj carga cushicuypämi.

• ¿Amiguyqui imano canantataj munanqui?

Leipäcuy 1 Juan 5:3 y caypita parlapacäriy:

• ¿Amiguncuna ima ruranantataj Jehová munan?

Jehovata cäsucunapäga cawayninchicho y yarpayninchichopis cambiucunatarämi rurashwan. Leipäcuy Isaías 48:17, 18 y caypita parlapacäriy:

• ¿Imanirtaj Jehová amiguncunata yachachin alicunata rurananpaj?

6. ¿Imatataj Jehová ruran amiguncunaraycur?

VIDEO: Jehová cuyamashpanmi yanapämargan (3:20)

• Videucho yachacushgayquino, ¿imanotaj Jehová yanapargan juc warmita ali cajcunaman yarpachacunanpaj?

Leipäcuy Isaías 41:10, 13 y caycunapita parlapacäriy:

• ¿Imatataj Jehová wilacun amiguncunaraycur rurananpaj?

• ¿Ninquimanchuraj Jehová ali amigo cashganta? ¿Imanir?

7. Jehová Diospa amigunga canchi payta waran waran mañacurmi

Amigunchicunawan parlapacuptinchega masmi cuyanacunchi. Leipäcuy Salmo 86:6, 11 y caycunapita parlapacäriy:

• ¿Imata rurartaj Jehovata parlapanchi?

• ¿Imanotaj Jehová parlapämanchi?

ICHIC YACHACUY

Jehovaga amiguyqui cayta munan; payga yanapäshunqui amigun canayquipaj.

Yarpänapaj

• ¿Imanotaj Jehová amiguncunata yanapan?

• ¿Amiguncuna imano cawapäcunantataj Jehová munan?

• ¿Jehovaga amiguncunata ninchuraj ‘mana pantaypa cawaptiquiraj amigü canqui’ nir? ¿Imanirtaj chayta ninqui?

MASLATA YACHACUNAYQUIPAJ

¿Imanoraj yanapashunquiman Diospa amigun captiqui?

“Jehová Diosta reguirga cushicushunmi” (Wilacamoj, 15 febrero quilla, 2003)

Yachacuy imano Diospa amigun canayquipaj.

“¿Imatataj ruräman Diospa amigun canäpaj?” (Mozo-jipashcuna tapucärin. Shumaj yachachicuycuna, ishcay caj, 35 caj capítulo)

Leircuy imano Jehová juc warmita yanapashga cawaynincho.

“¡Wanuyta mana munargächu!” (Wilacamoj, núm. 1 2017)

Waquin mozo-jipashcuna Jehovapita ima nipäcushganta wiyay.

Diospa amigun caytaga puedinchimi (1:46)