¿Yarpanquichu?

¿Yarpanquichu guepa quillacunacho Wilacamoj revistacho ima leishgayquita? Mä musyanapaj cay tapucuycuna caycan:

¿Imanotaj yanapämäshun Jehovata mañacuptinchi, Palabran Biblia nishganta wiyaptinchi y voluntäninman yarparaptinchega?

Ali cajcunatami acrashun, más ali yachachicojmi cashun, yäracoj runaman ticrashun y Jehovatami más cuyashun (w22.01, 30 y 31 caj paginacuna).

¿Imanirtaj Jehovaman masraj yäracunanchi y pushamänanchipaj churashgancunamanpis?

Cananlapitana yäracuycäshun Jehová imano pushaycalämashganchiman. Ancianucuna decidishganta ali shongulanchiwan chasquicur y apachicamushgan wilacuycunata jucla cäsucur. Jatun nacay galaycamuptin maygan wilacuycunapis mana camacajno o sasa captinpis cäsucunapaj listo caycäshun (w22.02, 4-6 caj paginacuna).

¿Imanirtaj juc ángel Zacariasta nergan plomadata churapaylapa Zorobabel templuta sharcachenga? (Zac. 4:8-10).

Cay visiunga ricachergan mushoj caj templutaga judiucuna sharcachiyta ushananpaj y Jehová munashganno cananpaj cajtami (w22.03, 16 y 17 caj paginacuna).

¿Imata rurartaj ali shimilanchiwan parlashwan? (1 Tim. 4:12).

Predicaciuncho cuyapaylapa parlar, reuniuncunacho cushi cushila cantar y cadala comentanapaj calpachacur. Rasunpa cajlata parlar, alicunalata parlar pipa shonguntapis cushircachinapaj y pitapis ‘ashlipar’ parlashunchu (w22.04, 6-9 caj paginacuna).

¿Imanirtaj Apocalipsis 13:1, 2 textucuna manchariypaj uywapita parlar tincun Daniel 7 caj capítulo wilacushgan chuscu manchariypaj uywacunawan o gobiernucunawan?

Apocalipsis 13 cajpita chay manchariypaj uywaga manami ninanchu juc gobiernula cashganta, Roma naciunno. Caychoga parlaycan unaypita canancama lapan gobiernucunapämi (w22.05, 9 caj página).

¿Imata rurartaj ricächicunchi Jehová juzgananpaj cajman yäracuycashganchita?

Capazchi pilapis ofendimashcanchi o rimamashcanchi, y jatun juchatapis contranchicho rurashga captinpis calpachacunchi jagayashgala o rabiashgala mana caycänapaj, y waquincuna ruramashganchita Diospa maquincho cachaycunchi. Seguro caycanchi Pay alchananpaj cajman (w22.06, 10 y 11 caj paginacuna).

¿Imataj cuentaman churanman juc hermano reuniuncho waquincunapa naupancho mañacuptin?

Waquincunapa naupancho mañacojcunaga, congregaciuncho caycajcunata manami consejanmanchu ni ima wilacuytapis wilacärinmanchu. Chauraga oraciunta ruraj wauguiga yaparir yaparir mayraj mañacunmanchu, masraj reunión galaycunanpaj caycaptin (Mat. 6:7) (w22.07, 24 y 25 caj paginacuna).

¿Imaraj pasanga manaraj wanur mana alita rurajcuna juiciupaj cawarimojcunawan? (Juan 5:29).

Paycuna manaraj wanur mana alita rurashganpitachu condenashga canga. Sinoga, waranga watacunacho imano cawacärishganta y imano comportacärishganpitami pruebaman churashga canga (w22.09, 18 caj página).

¿Imataj Joseph Rutherford waugui wilacurgan juc jatun asamblea ruracashgan setiembre quilla 1922 watacho?

Cedar Point (Ohio, Estados Unidos) marcacho juc jatun asamblea ruracashgancho, nergan: “¡Reyninchi mandacaycämunna! Gamcunami wilacojnincuna caycanqui. Chauraga, wilacäriy, wilacäriy, wilacäriy Reyta y Gobiernuntapis” (w22.10, 3-5 paginacuna).

Isaías 30 caj capítulo nishganno, ¿imanotaj Dios yanapämanchi cushishgala aguantanapaj?

Cay capítulo caycunata tantiachimanchi: 1) Mañacushganchitaga Jehová wiyamanchi y contestamanchimi, 2) pushamanchi y 3) bendecimäshun canan wichan y shamoj tiempuchopis (w22.11, 9 caj página).

¿Imanirtaj ninchi Salmo 37:10, 11 y 29 textucunaga unay Diospa sirvejnincuna cawashgan wichancho cumplicurgan, y shamoj tiempuchopis cumplicunga?

Salmo 37 textucho David nishganpita, tantiachimanchi imano israelitacuna jaucala cawaycashganta, jucmi cargan Salomón mandacamushgan wichancho. Mushoj Pachapita parlarmi Jesús parlargan Salmo 37:11 textupita (Mat. 5:5; Luc. 23:43) (w22.12, 8-10 caj paginacuna y 14).