Reuniuncunacho jucninchi jucninchi shacyächinacushun

1. ¿Imanirtaj reuniuncunacho comentanchi?

¿IMANIRTAJ reuniuncunaman aywanchi? Jehovata alabanapaj, chayga imapitapis más ali caycan (Sal. 26:12; 111:1). Jina sasa tiempucho cawashpanchi reuniuncunaman aywar jucninchi jucninchi shacyächinacunchi (1 Tes. 5:11). Y comentaptinchega Jehovatami alabanchi y waquincunawan shacyächinacunchi.

2. ¿Imacunataj captin reuniuncunacho parlacaramuyta puedinchi?

² Semana semana achca cutimi caycan reuniuncunacho comentacunapaj. Tantiarinapaj, semana ushaychoga Wilacamoj revistapita yachacur parlacaramuyta puedinchi. Pulan semanachona “Shumaj yachachicuyta ashishun” nishgancho, Bibliapita juc libruwan yachacunapaj cajcho y waquin particunachopis parlacaramuyta puedinchi comentanapaj mañamaptinchi.

3. 1) ¿Ima chapacuna öraga canman comentayta munaptinchi? 2) ¿Imanotaj Hebreos 10:24, 25 texto nishganga yanapämanchi?

³ Lapanchimi munanchi Jehovata alabanapaj y hermanunchicunata shacyächinapaj comentariunchicunawan. Ichanga öraga ima chapacunapis canmanmi: parlamuyta munarpis capaz manchacushpanchimi maquinchita jogarinchichu comentanapaj o cutin cutin maquinchita jogariptinchipis capaz manami acramanchichu munashganchino parlacaramunapaj. Apóstol Pablo hebreo cristianucunata cartacamushgancho juc shumaj yachachicuyta tarinchi. Reuniuncuna alapa ali cashganta parlar Pabluga nergan: “Jucninchi jucninchipis shacyächinacushun” (leiriy Hebreos 10:24, 25). Chauraga waquincunata shacyächiyta puedinchi juc ichic y sencillo comentariuta rurarpis, y chayman yarparga manami alapaga manchacushunnachu maquinchita jogarinapaj. Y munashganchino cutin cutin parlacaramuyta mana puediptinchega, cushicushwanmi waquincuna parlacamushganta wiyar (1 Ped. 3:8).

4. ¿Imacunapitataj cay yachacuycho ricärishun?

⁴ Cay yachacuychoga ricärishun imanomi jucninchi jucninchi shacyächinacushun juc tacshala congregaciuncho caycar, chaychoga walcala hermanucuna capäcun y comentanapaj achca cutimi caycan. Jina ricashwan imanomi chayta rurashwan juc jatun congregaciuncho caycarpis, chaychoga achcajmi parlacaramuyta munan. Chaypitapis yachacushun imanotaj comentariunchicuna canman waquincunata rasunpa shacyächinapaj.

IMANOTAJ TACSHALA CONGREGACIUNCHO JUCNINCHI JUCNINCHI SHACYÄCHINACUSHUN

5. ¿Imataj rurashwan shacyächinacunapaj reuniuncho walcajla caycaptinchi?

⁵ Juc grupucho o juc tacshala congregaciunchoga walcala hermanucuna carcaycan comentapäcunanpaj, y reuniunta dirigej hermanuga ratula shuyaranrämi pilapis maquinta jogarinanpaj. Chauraga juc ishcayla comentapäcuptenga, chaycho caycajcunata alapa shacyächinchu, y reuniunpis despaciuraj ushan. ¿Imataraj rurashwan chayno pasaptenga? Altanto caycashwan cutin cutin comentamunapaj. Chayta ricar waquincunapis calpachacärenga ichic masraj parlacaramunanpaj.

6, 7. ¿Imacunataraj ruranquiman comentayta munar alapa mana manchacunayquipaj?

⁶ Waquincunaga manchacurna galaycun reuniuncunacho comentananpaj yarpaptinlami. Chayno gamtapis pasashuptiquega, ¿imataraj ruranquiman? ¿Imanirtaj yanapacuycunata manami ashinquichu manchacuyniquita vencinayquipaj y jaucalana ricacur comentariuyquicunawan waquincunata shacyächinayquipaj?

⁷ Chaypäga ali canman guepa watacunacho Wilacamojb revistacunacho yargamushgan yanapacuycunata ashiycur leinayquipaj. Jucnin caj yanapacuyga caycan shumaj preparacunapaj (Prov. 21:5). Juc temapita shumaj yachacurga, facilmi canga maquinchita jogarinapaj. Jina ichic comentariutapis rurayta puedinchimi (Prov. 15:23; 17:27). Achcataraj parlanapaj mana captin, alapa manchacushunnachu. Comentariunchicuna ichicla o tacshala captenga, más facilmi canga hermanucuna yarpänanpaj ima nishganchita; ichanga achcataraj parlaptinchega sasami canman. Y juc publicaciuncho guelgashganta leircur-raj mana comentaptiquega, waquincunaga ricanga ali preparacushgayquita y chay tematapis shumaj tantiashgayquita.

8. ¿Imanotaj Jehová rican lapan puedishganchimanno comentaptinchi?

⁸ ¿Imataraj ruranquiman waquin yanapacuycunata practicaman churashgana captiquipis ichic manchacur-raj juc ishcay cutila comentamuptiqui? Yarparay Jehová alapa valurashganta lapan rurashgayquicunata comentanayquipaj (Luc. 21:1-4). Payga manami shuyaranchu lapan puedishgayquipita mastaraj ruranayquipaj (Filip. 4:5). Chauraga quiquiqui camacächiy ayca cuticuna comentanayquipaj, nircur shumaj preparacuy y Jehovata mañacuy yanapäshunayquipaj jaucala caycänayquipaj. Galaycunayquipäga ali canman juc ichic comentariuta ruranayquipaj.

IMANOTAJ JATUN CONGREGACIUNCHO JUCNINCHI JUCNINCHI SHACYÄCHINACUSHUN

9. ¿Öraga imaraj pasanman jatun congregaciuncho caycarga?

⁹ Congregaciunniquicho achca publicadorcuna captenga, capaz öraga munashgayquino achca cuticuna parlacaramuyta puedinquichu, chayga carganchi waquincunapis comentayta munaptin. Daniela imapa pasashganta ricärishun, payshi reuniuncunacho cösa parlacaramoj.c Paypäga alapa alimi comentananpaj, chaynoshi Jehovata aduraycan, hermanuncunata shacyaycächin y Bibliacho yachacushgantapis mana gongananpaj yanapan. Ichanga jatun congregaciunchona yanapacuyta galaycuptinshi, unayno achca cuti comentayta puedejchu y öraga ni juclaylapis. Payga nin: “Pasaypami laquicoj cä. Juc jatun privilegiuta ograshgätano ricacurgä. Achca cuticunacho mana acrashuptiqui comentanayquipäga apriposo rurashganta yarparna galaycunqui”.

10. ¿Imataraj ruranquiman reuniuncho imaypis comentanayquipaj?

¹⁰ ¿Imaylapis Danielano ricacushcanquichu? Chayno captenga, yarpashcanquichi manana maquiquita jogarinayquipaj y wiyacunayquilapaj. Ichanga ama guelanaychu. ¿Imataraj ruranquiman imaypis comentanayquipaj? Alimi canman juc comentariupitapis mastaraj preparacunayquipaj. Chaynopa galanan parrafucunacho comentayta mana puedirga, gatejnincunacho ruranqui. Wilacamoj revistapita yachacunapaj captenga yarpachacuy imano cada parrafucuna tincun yachacushgayqui temawan. Chayta rurar musyanquipaj imata yapapänayquipaj. Chaypitapis sasa temacunapita wilacushgan parrafucunata preparacunquiman comentanayquipaj (1 Cor. 2:10). Chaycunata tantiachicunapaj sasa captinmi walcajlami maquinta jogarenga parlacamunanpaj. Ichanga ¿imataraj ruranquiman cay lapancunata practicaman churashgana captiquipis mana acrashuptiqui comentanayquipaj? Reunión manaraj galaycuptin chay estudiuta pushaj hermanuwan parlapacunquiman maygan parrafuta contestashgayquita munashgayquipita.

11. Filipenses 2:4 nishganno, ¿imatataj rurashwan?

¹¹ (Leiriy Filipenses 2:4). Jehová yanapaptinmi apóstol Pabluga cristianucunata shacyächergan waquincunaman yarpachacunanpaj. ¿Imanotaj cay consejuta cäsucushwan reuniuncho caycar? Yarpachacushun waquincunapis comentayta munashganta.

12. ¿Imata rurartaj yanapacunchi waquincuna reuniuncho cushi cushila caycänanpaj? (Fotutapis ricay).

¹² Cayta tantiarcunapaj cayman yarpachacushun. ¿Manachu amiguyquicunawan parlapacuptiquega manami gamlachu parlanqui sinoga paycunapis parlananpaj jaguirinquimi? Chaynolami reuniuncunachopis lapancuna parlacaramunanpaj munanchi. Chauraga hermanunchicunata shacyächinchi reuniuncunacho comentapäcamunanpaj jaguiriptinchi (1 Cor. 10:24). Ricärishun imataj rurashwan achcaj comentamunanpaj.

13. ¿Imataraj rurashwan waquin hermanucunapis comentamunanpaj?

¹³ Comentariunchicuna tacshala captenga tiempo cangami waquin hermanucunapis comentamunanpaj. Ancianucuna y achca watapana Testigo caycajcunapis chayta puntata ruranman. Jina comentariunchicunachoga manami imaycapitaraj parlashwanchu. Parrafucho lapan wilacushganta parlacamuptiquega waquincunapaj canganachu imapita parlananpaj. Cay parrafuchoga ishcay yachachicuycunata yarpänapaj caycan: comentariunchicuna tacshala cananpaj y manami imaycapitaraj parlashwanchu. Gamta acrashuptiqui cay parrafupita comentanayquipaj, ali canman juclaylapita comentanayquipaj.

14. Reuniuncho achca cuticuna comentayta munarga, ¿pïcunamantaj yarpachacushwan, y imanir? (Fotucunatapis ricay).

¹⁴ Achca cuticuna comentayta munar maquiquita jogarinayquipaj yarparga, waquincunaman yarpänayqui. Cutin cutin maquinchita jogariptinchega, estudiuta pushaj hermanuga capaz nimäshun comentanapaj waquincuna manaraj comentashga captinpis. Chayta ricar öraga waquincunapis comentayta munanganachu (Ecl. 3:7).

15. 1) ¿Imanoraj ricacushwan reuniuncho comentayta mana puediptinchega? 2) ¿Tapucuycunata ruraj hermanuga imataj cuentaman churanman? (“Tapucuycuna y respuestacuna caycaj yachachicuy imano ruracanman” recuadrutapis ricay).

¹⁵ Reuniuncho achca hermanucuna comentamuptenga, capaz munashganchino comentayta puedishwanchu. Y öraga reunión ushashgana captinpis capaz ni juclaylapis comentashwanchu cargan. Chayno captin laquicuptinchipis mana piñacushwanchu (Ecl. 7:9).

16. ¿Imatataj rurashwan comentashgacunata shacyächinapaj?

¹⁶ Munashgayquino reuniuncho comentayta mana puediptiquipis, waquincuna parlacamushganta wiyayta puedinqui y felicitaytapis reunión ushariptin. Cuyacuywan hermanucunata felicitaptiquega, paycunata shacyächinqui comentariuyquicunata rurayta munashgayquino (Prov. 10:21). Waquincunata felicitaptinchega paycunata shacyächicuycanchi.

IMANO MASTATAJ SHACYÄCHINACUSHWAN

17. 1) ¿Imataj taytacuna ruranman? 2) Videucho ricashganchino, ¿imanopataj preparacushwan reuniuncho comentamunapaj? (Notatapis ricay).

¹⁷ ¿Ima mastataj rurashwan reuniuncunacho shacyächinacunapaj? Tacshala wamrayquicuna captenga yanaparcuy preparacunanpaj puedishganmanno comentamunanpaj (Mat. 21:16). Reuniuncunacho casaracuy vidacho ima problemacuna cashganpita o Diospa ricaynincho imano limpio caycänapaj parlacamuptinpis, juc ishcay parrafucuna canmanmi wamracuna parlacamunanpaj. Jina wamrayquicunata tantiachinquiman imanir öraga maquinta cutin cutin jogariptinpis comentayta mana puedingachu. Chayta ruraptiquega paycuna manami laquicungachu paypa trucan jucta acraptin comentananpaj (1 Tim. 6:18).d

18. ¿Imatataj rurashwan quiquinchipita alapa mana parlanapaj comentaptinchi? (Proverbios 27:2).

¹⁸ Lapanchimi ali comentariunchicunawan Jehovata alabayta puedinchi y hermanunchicunatapis shacyächiyta (Prov. 25:11). Öraga vidanchicho imacunapa pasashganchita parlayta puediptinchipis, ama alapaga quiquinchipita parlapacushwanchu (leiriy Proverbios 27:2; 2 Cor. 10:18). Chaypa trucanga Jehovapita, Palabranpita y sirvejnincunapitapis parlashwanmi (Apoc. 4:11). Ichanga parrafucho niptin quiquinchipita parlanapaj captenga, alimi caycan ruranapaj. Gatejnin parrafucho chaypita wilacamun.

19. 1) ¿Imataj pasanga reuniuncunacho waquincunaman yarpachacuptinchi? (Romanos 1:11, 12). 2) ¿Imanirtaj gamga cushicunqui comentamuptiqui reuniuncunacho?

¹⁹ Reuniuncunacho imano comentanapaj leycuna mana captinpis, lapanchi calpachacushwanmi imata rurar o imata nirpis waquincunata shacyächinapaj. Waquincunapäga cayga ninan ichic maslata comentamunanpaj. Ichanga juccunapäga cayga ninan cushicunanpaj walcala comentamuptinpis, jina cushicunmanpis waquincunata acraptin ima tapucuylatapis contestananpaj. Reuniuncunacho waquincunaman yarpachacuptinchega jucninchi jucninchi shacyächinacur lapanchi cushicushwan (leiriy Romanos 1:11, 12).