Liejcuna tapucärishgan
¿Pïcunataj caycan 1 Timoteo 5:21 textucho wilacushgan “acrashga angelcuna”?
Apóstol Pablo anciano masin Timoteuta cayno escribergan: “Tayta Diospa, Señor Jesucristupa y sirviqnin angilkunapa nawpanchömi kayno niykä: Pipapis favornin mana sharkuylapa kay nishqäkunata cumplinki” (1 Tim. 5:21). Cay textucho “sirviqnin angilkunapa” niptin Bibliata escribishgan rimaycho nin “acrashga angelcuna”, chauraga waquin angelcunalapitami parlaycan. ¿Pïcunataj paycuna?
Puntataga ricärishun chay angelcuna pïcuna mana cashganta. Apóstol Pablo cawashgan wichan 144.000 acrashga cajcuna manaraj cielupa aywashgarächu. Apostulcuna y waquin cielupaj acrashga cajcuna cay Pachacho cawaycashgarämi. Chauraga paycuna manami canmanchu cargan acrashga angelcunaga (1 Cor. 15:50-54; 1 Tes. 4:13-17; 1 Juan 3:2).
Noepa tiempuncho mana cäsucoj angelcunapis manami canmanchu “acrashga angelcuna”. Paycunaga supaycunaman o demoniucunaman ticrargan y Jesuspa contranman churacargan (Gén. 6:2; Luc. 8:30, 31; 2 Ped. 2:4). Chaymi shamoj tiempucho wanwanyaycaj uchcuman garpushga canga y nircur chipyaypa ushacächishga cangapaj (Jud. 6; Apoc. 20:1-3, 10).
1 Timoteo 5:21 nin cay “acrashga angelcuna” Tayta Dios Jesuswanpis cielucho caycashganta, chaymi paycunaga cäsucoj angelcunami canman cargan.
Cielucho yupayta mana atipaypaj cäsucoj angelcunami caycan (Heb. 12:22, 23). Cada angelcunata Jehová nergan imata rurananpaj (Apoc. 14:17, 18). Juc cuticho juc angelta mandargan 185.000 asirio runacunata wanuchinanpaj (2 Rey. 19:35). Jina Jesús nishganno waquin angelcunala “jutsa ruratsiqkunata y jutsa ruraqkunatapis” shuntanga (Mat. 13:39-41). Capazchi waquin angelcunaga ‘akrashqa kaqkunata maytsaypitapis’ shuntanga cielupa aywapäcunanpaj (Mat. 24:31). Tayta Dios waquin angelcunata cachamun maypa aywaptinchi imapitapis chapämänanchipaj Salmo 91:11 nishganno (Mat. 18:10; tincuchiy Mateo 4:11 y Lucas 22:43 textucunawan).
Chauraga 1 Timoteo 5:21 texto wilacushganno “acrashga angelcuna” congregaciunta ricananpaj caycan. Pablo congregaciuncho caycajcunata consejargan ancianucunata respetananpaj, y ancianucuna pipapis favornin mana sharcuylapa hermanucunata tratananpaj. Jina ancianucunaga imatapis manaraj decidir shumajraj yarpachacunman, paycuna manami gonganmanchu “Tayta Diospa, Señor Jesucristupa y sirviqnin angelcunapa” ricaynincho caycashganta, chaymi congregaciuncho caycajcunata Dios munashganno cuidan. Chauraga cay “acrashga angelcuna” congregaciunta ricananpaj caycan hermanucunata chapänanpaj, predicaciuncho pushamänanchipaj y congregaciuncho ima pasashganta Jehovata wilananpaj (Mat. 18:10; Apoc. 14:6).