Hermanunchicunaman guelicuptinchi alimi caycan

1, 2. ¿Imata rurananchipätaj Jehová munan?

JEHOVAPA ricayninchoga alapa ali caycan waquincunata ali ricaptinchi. Jesuspis nergan quiquinchita cuyacushganchitano waquincunata cuyananchipaj (Mat. 22:37-39). Pay nishganno lapan runacunata cuyananchi, Diosman mana criejcunatapis. Chayta rurarga quiquin Jehovano ruraycanchi, paymi “ali runakunapaq y mana ali runakunapaqpis intita jeqatsimunmi. Tsaynölami ali runakunapaq y mana ali runakunapaqpis tamyatsimun” (Mat. 5:45).

² Jehová lapancunata cuyarpis masrämi cuyan payta sirvejcunata (Juan 14:21). Pay munan noganchipis chayno cuyanacunanchipaj, chaymi nimanchi “lapan shonquykiwan kuyanakäriy” y “ayluykiwan kuyanakushqaykino kuyanakäriy” (1 Ped. 4:8; Rom. 12:10). Familianchicunata amigunchicunatapis cuyashganchino hermanunchicunatapis cuyananchi.

3. ¿Imano waquincunata cuyananchitataj Jehová munan?

³ Cuyacuyninchega juc plantanomi canman. Juc planta ali winananpaj, ¿manachu pargunchi y urianchipis? Chaynolami calpachacunanchi cuyacuyninchi mana ushacänanpaj. Chaypita parlar apóstol Pablo cayno nergan: “Aylunöla imaypis kuyanakur kawapäkuy” (Heb. 13:1). Jehová munan hermanunchicunata imaypis cuyananchipaj, ¿imanotaj chayta rurashun? y ¿imanirtaj chayta rurananchi? Canan chaycunapita yachacushun.

IMANIRTAJ HERMANUNCHICUNAMAN MÁS GUELICUSHWAN

4. Salmo 133:1 texto nishganno, ¿imata rurashwan hermanunchicunata imaypis valuranapaj? (Fotucunatapis ricay).

⁴ (Leiriy Salmo 133:1). Diosta cuyajcunawan amigo captinchi salmistanomi sienticunchi, paymi nergan: “Maypis kushikuypaqmi kaykan”. Ichanga tiempuwan Jehovapa marcan cuyaylapaj cashganta gongashwan. Cayman yarpäshun: chaylaraj jatun gochata reguej aywarga almiracunchi, ¿au? Ichanga cada cadala chaypa purirga mana cäsupanchinachu. Chaynolami hermanunchicunata cada semana ricar tiempuwan capaz valurashwannachu. Chayno mana pasamänanchipaj imaypis yarpachacunanchi paycuna imanir congregaciuncho alapa valej caycashganta.

5. Jucninchi jucninchi cuyanacushganchita ricar, ¿imatataj waquincuna cuentata gocunga?

⁵ Reuniunman chaylaraj shamojcunaga jucninchi jucninchi cuyanacushganchita ricanmi. Chayta ricar cuentata gocunga rasunpa cristiano cashganchita. Jesús chaytami nergan: “Tsayno kuyanakäriptikimi pïmaypis musyapäkunqa discïpulükuna kashqaykita” (Juan 13:35). Chaithra jutiyoj jipashpita parlarcushun, payshi universidächo caycashgan wichan Jehovapa testiguncunawan Bibliata yachacur galaycushga. Payga jatun asambleanchiman aywargan, juc junajla aywashganpita yachachejninta cayno nergan: “Taytäcuna imaypis macalamashgachu, ¡pero caycho juc junajlachomi gamcuna 52 cuti macalamashgayqui! Chay hora sienticushgä Jehová alapa cuyamashganta. Munämi imaypis gamcunawan juc familiano cayta”. Cay jipashga bautizacurgan 2024 watacho. Aumi, chayno cuyanacushganchita ricarga maychicaj runacuna Jehovata sirviyta munapäcun (Mat. 5:16).

6. ¿Imanotaj yanapämanchi hermanunchicunaman más guelicuptinchi?

⁶ Hermanunchicunaman más guelicuptinchi yanapämäshun mana alicunata mana ruranapaj. Apóstol Pablo cristianucunata cayno consejargan: “Waran waran jukniki juknikipis shakyätsinakäriy Tayta Dios munashqanno kawapäkunaykipaq. Tsaynöpami jutsa ruray mana engañashuptiki shonquyki mana chukruyanqatsu” (Heb. 3:13). Mana alicunaman chayanapäna caycaptinchi, Jehová yanapämashwan hermanunchicunawan (Sal. 73:2, 17, 23). ¡Hermanunchicuna chayno yanapamashganchega alapa ali caycan!

7. ¿Imano cashganchipitataj congregaciuncho juc shongunola caycäshun? (Colosenses 3:13, 14).

⁷ Congregaciuncho lapanchicuna calpachacunchi jucninchi jucninchi cuyanacunanchipaj, chayno cashganchipita imayca bendiciuncunatami chasquinchi (1 Juan 4:11). Shongupita cuyanacushpanchega jucninchi jucninchi paciencianacushun, y chaypita congregaciuncho juc shongunola caycäshun (Efes. 4:2-6; leiriy Colosenses 3:13, 14). Maychopis mana tarishunchu chayno hermanunchicunawan cuyanacushganchita.

JUCNINCHI JUCNINCHI RESPETANACUSHUN

8. ¿Imanotaj Jehová yanapämanchi hermanunchicunawan juc shongunola caycänapaj?

⁸ Juchasapa caycarpis tucuy clase hermanunchicunawan juc shongunola canchi, y chayga Jehová yanapamaptinchirämi (1 Cor. 12:25). Bibliaga cayno nin: “Jukniki juknikipis kuyanakur ali kawanaykipaqmi Tayta Dios tantiyatsipäkushushqanki” (1 Tes. 4:9). Chaypäga Palabran Bibliawan tantiachimanchi imata rurananchi hermanunchicunaman más guelicunanchipaj. Jehová chayno yachachimänanchipaj Bibliata leishganchiman ali tantiarcushun y practicaman churashun (Heb. 4:12; Sant. 1:25). Jehovapa testiguncunaga chayta ruranapaj calpachacunchimi.

9. ¿Imata rurananchipätaj Romanos 12:9-13 yachachimanchi?

⁹ ¿Ima nintaj Biblia hermanunchicunaman más guelicunanchipaj? Ricärishun imataj nergan Pablo Romanos 12:9-13 textucho (leiriy). Paymi nergan “jukniki jukniki respitanakäriy”, “wakinkunapis ali kawananpaq yarpachakäriy”. ¿Imanopataj chayta rurashun? Hermanunchicunata cuyarga paycunatami perdunashun, pachächishun, garacoj cashun y imalachopis yanaparcushun (Efes. 4:32). Ama shuyarashwanchu waquincuna noganchiman guelicamunanta, más bien quiquinchi puntata waquincunata musyachicushwan cuyashganchita; chayta rurar Jesús nishganta cäsucuycanchi. Paymi nergan: “Imatapis chaskir kushikushqantsipitapis mas kushikuypaqmi kaykan pitapis yanapashqantsi” (Hech. 20:35).

10. Arucoj captinchi, ¿imataraj rurashun? (Fotutapis ricay).

¹⁰ Cayman yarpäshun: jucninchi jucninchi respetanacunanchipaj Pablo niptin, caynopis nergan: “Ama qela kapäkuytsu”. Paymi nimarganchi arucoj cananchipaj. Arucoj runaga imatapis ganaswan y cushicuywan ruran. Proverbios 3:27, 28 cayno nin: “Yanapayta kamäpakuykarqa pishipakuqta jukla yanapanki”. Chauraga pilapis yanapacuyta nestaptin calpachacushwan yanapanapaj, ama yarpashwanchu ‘nircur-raj yanapashaj’ o ‘jucraj yanapanman’ nir (1 Juan 3:17, 18).

11. ¿Imata rurartaj hermanunchicunaman más guelicushun?

¹¹ Waquincunata respetanapaj, ofendimaptinchi jucla perdunananchi. Efesios 4:26 nin: “Qoyaytaqa ama rabyashqala kakäriytsu”. ¿Imanir? Versículo 27 nin: “Rabyashqala karqa shonquykitami diabluta kichapaykanki”. Jehovaga Palabranwan cutin cutin nimanchi perdunacoj cananchipaj. Colosenses 3:13 textucho chayno nimanchi: “Jaqayätsinakurqa perdonanakäriy”. Hermanunchicuna pantashgancunaman ama yarparashwanchu, más bien paycunaman guelicur, “juk shonqula jawka kawapäkushun” (Efes. 4:3). Aumi, mana perdunacoj carga manami jaucala ni juc shongunola cawashwanchu.

12. ¿Imanotaj Jehová yanapämanchi perdunacoj cananchipaj?

¹² Manami facilchu caycan pipis jagayächimaptinchi perdunananchipaj. Ichanga Diospa santo espiritun yanapämäshun chayta ruranapaj. “Ayluykiwan kuyanakushqaykino kuyanakäriy” y “ama qela kapäkuytsu” Biblia nimaptinchi, caynopis nimanchi: “Kushi kushila Tayta Diosta sirvipäkuy”. Chaypäga nestanchi Diospa santo espiritunta. Diospa santo espiritunwan cushi cushila ali cajcunata rurashun, shongupita imaypis perdunashun y hermanunchicunata cuyapaylapa tratashun. Chauraga lapan shonguwan yanapämänanchipaj mañacushun (Luc. 11:13).

“JUK SHONQULA Y JUK YARPAYLA” CAWACUSHUN

13. ¿Imaraj hermanunchicunapita raquichimashwan?

¹³ Congregaciunninchicho tucuy clase runacuna caycan (1 Tim. 2:3, 4). Tucuy marcapita carpis manami lapanchi igual yarpanchichu, chaymi respetananchi waquincuna imano vesticushganta, ima jampicunata acrashganta y cushicushgan hora imata rurashganta. Chaycunapita mana respetarga hermanunchicunawan raquicäcushwanmi (Rom. 14:4; 1 Cor. 1:10). ‘Jucninchi jucninchipis cuyanacur ali cawananchipämi Tayta Dios tantiachimashcanchi’, chaymi mana yarpanchichu waquincunapita más ali cashganchita (Filip. 2:3).

14. ¿Imata ruranapätaj imaypis calpachacunanchi?

¹⁴ Hermanunchicunapita mana raquicäcunanchipäga paycunawan shacyächinacushun y imaypis shogacoj cashun (1 Tes. 5:11). Canan wichan achca carupacushga y jorgushga cajcuna congregaciunman cutiycamun. Paycunataga cuyacuywan chasquinchi (2 Cor. 2:8). Juc cristiana chunca watapa congregaciunpita carupacush caycargan. Salunman yapay shamushganpita cayno nin: “Lapancuna saludamargan y cushish chasquimargan” (Hech. 3:19). Chaypita, ¿pay imanotaj ricacurgan? Paymi cayno wilacun: “Yapay cushish caycänäpaj Jehová pushaycamashgantano sienticurgä”. Aumi, waquincunata shacyächiptinchi ‘uticashga y laquishga cajcunata’ Jesusno yanapaycäshun (Mat. 11:28, 29).

15. Hermanunchicunawan juc shongunola cawacunanchipaj, ¿imataraj más rurashwan? (Fotutapis ricay).

¹⁵ Hermanunchicunawan juc shongunola cawacunanchipaj ali cajlata parlananchi. Biblia nin: “Imanomi micuy mishquishganta o mana mishquishganta gallunchiwan musyanchi, chaynolami parlashganchi ali o mana ali cashgantapis rinrinchiwan wiyanchi” (Job 12:11, TNM). Ali yanucojga manaraj garacur gallunwan yawashganno noganchipis manaraj imatapis parlar aliraj yarpänanchi, chaynopa imaypis shacyächiylapa parlapäshun (Sal. 141:3; Efes. 4:29).

16. ¿Pïcunataj imaypis shacyächiylapa parlanman?

¹⁶ Esposucuna, taytacuna y mamacunapis imaypis shacyächicuylapa parlanman (Col. 3:19, 21; Tito 2:4). Ancianucunapis Jehovapa uyshancunata shacyächicun y cuyapaylapa cuidan (Is. 32:1, 2; Gál. 6:1). Proverbios libro cayno nimanchi: “¡Tiempulancho yätsishqanqa alimi kaykan!” (Prov. 15:23).

“IMAYPIS YANAPANAKUR RASUNPA KUYANAKUSHUN”

17. ¿Imataraj rurashwan hermanunchicunata shongupita cuyananchipaj?

¹⁷ Apóstol Juanga caynomi nergan: “Janan shonqulaqa ama kuyanakushuntsu, sinöqa imaypis yanapanakur rasunpa kuyanakushun” (1 Juan 3:18). ¿Imatataj rurashwan hermanunchicunata chayno cuyananchipaj? Calpachacushwan reuniuncho, predicaciuncho y imacunatapis rurar hermanunchicunawan junto caycänanchipaj. Jina paycunata imaypis watucushwan. Caycunata rurar hermanunchicunata más reguishun y ‘jucninchi jucninchipis cuyanacur ali cawananchipämi Tayta Dios tantiachimashganchinomi’ cashun (1 Tes. 4:9). Jina shongupitami cayno nishun: “Maypis kushikuypaqmi kaykan wawqi panikuna kuyanakur kawashqan” (Sal. 133:1).