26 CAJ YACHACHICUY
123 CAJ CANCIÓN Ali shongulanchiwan cäsucushun
Imacunatapis mana tantiar humilde cananchi
“Munayniyoj Tayta Dios rurashanta manami tantiyanchïchu” (JOB 37:23, TDI).
¿IMATATAJ YACHACUSHUN?
Shamoj tiempupaj ima pasananpaj cajta mana musyarpis humilde carga musyashganchicunalaman yarpäshun, Jehovaman yäracushun, chaynopa cushishga cawacushun.
1. 1) ¿Imanotaj Jehová camamashcanchi? 2) ¿Imanirtaj chayno Jehová camamashcanchi?
JEHOVÁ camamashganchi ali yarpayniyoj cananchipaj, yachacunanchipaj y yachacushganchicunata caway vidanchicho rurananchipaj. ¿Imanirtaj chayno Jehová camamashcanchi? Payga munan pay yarpashganno noganchipis yarpänanchipaj, chaynomi ali decisiunta acrashun Jehovata sirvishganchicho (Prov. 2:1-5; Rom. 12:1).
2. 1) Yachacunanpaj camashga carpis, ¿lapantacu musyashwanchuraj? (Job 37:23, 24; fotutapis ricay). 2) Humilde cashgaga, ¿imanotaj yanapämanchi?
2 Jehová camamashcanchi yachacunapaj ichanga lapanta manami musyanchichu (leiriy Job 37:23, 24). Job pasashganman yarpäshun. Jehová Jobta tapupargan yanapänanpaj, cuentata gocunanpaj pay lapanta manami musyashganta (Job 42:3-6). Noganchipis humilde cashgaga manami yarpäshunchu lapanta musyashganchita. Shongupita humilde carga Jehová nimashganchiman yäracushun, chayno ali cajta acrashunpis (Prov. 2:6).
Lapanta mana musyashgaga yanapämäshun Jobta yanapashganno. (2 caj parrafuta ricay).
3. ¿Imacunapita yachacushun?
3 Canan yachacushun imacunata manami musyanchichu y chayga öraga imanirtaj sasa canman. Jina yachacushun imanirtaj lapantaraj mana musyananchirächu. Yachacushganchega yanapämäshun Jehovaman más yäracunanchipaj. “Taytalanchi [Jehová] alapa yachaq kashqanta” wilamäshun imacunalata musyananchipaj (Job 37:16).
MANAMI MUSYANCHICHU IMAY JEHOVAPA JUNAJNIN CHAYAMUNANPAJ CAJTA
4. Mateo 24:36 texto nishganno, ¿imata mana musyanchichu?
4 (Leiriy Mateo 24:36). Pipis manami musyanchu imay Jehovapa junajnin chayamunanpaj cajta. Cay pachacho caycar Jesuspis manami musyarganchu, “imay junaq imay höra” ushacay junaj chayamunanta.a Nircur Jesús apostulnincunata wilacurgan Jehová “munayniyuq kaykan munashqan höra tsayta kamakätsinanpaq” (Hech. 1:6, 7). Ushacay junaj chayamunanpaj manami pï runapis musyanchu, Jehovalami musyan.
5. Imay ushacay junaj chämunanta mana musyarga, ¿imanotaj sienticushwan?
5 Jesús nishganno imay ushacay junaj chayamunanta mana musyarga laquichimashwan o guelanachimashwan, y masraj Jehovata achca watapa sirviycashganchi. Y familianchicuna y waquin runacunapis noganchipita burlacunman ushacay junaj mana shamushganpita, chayta aguantanapaj sasachi canman (2 Ped. 3:3, 4). Öraga caynopis yarpashwan: “Imay ushacay junaj chämunanpaj musyaptëga más pacienciacoj cäman y ima burlatapis aguantaycöman”.
6. ¿Imanotaj yanapämäshun cay mundo ushacananta mana musyashgaga?
6 Jehová manami wilamashganchichu imay cay munduta ushacächinanpaj, chayga yanapämäshun Jehovaman yäracur lapan shongunchiwan payta sirvinanchipaj. Jehovataga imaycamayajpis sirvinanchimi manami cay ushanan tiempo chamunanyajlachu. Ushanan junajlamanga ama yarparäshunchu sinoga Dios alicunata apamunanman yarpärashun, chayta rurashgaga payman más guelicushun y yäracushunpis (2 Ped. 3:11, 12).
7. ¿Imacunatataj musyanchina?
7 Musyashganchicunalaman yarparäshun. Caycunata musyanchi: Biblia wilamanchimi 1914 watapita ushanan tiempuchona cawashganchita y chay wichancho runacuna imano portacunanpaj cajta. Chaymi musyanchi ‘TAYTA DIOS juzganan junaq chayamunanpaq walkalana pishiykashganta’ (Sof. 1:14). Jina musyanchi Diospa ali wilacuyninpita pï may runacunatapis yachachinanchipaj, chayta rurananchita Jehová munan (Mat. 24:14). Cay wilacuyta apaycanchi 240 naciuncunacho y sitiucunachopis, y 1.000 (waranga) idiumacunapitapis mascunacho. Cushishgala predicanapaj manami musyananchirächu “imay junaq imay höra” ushanan tiempo chayamunantaraj.
MANAMI MUSYANCHICHU IMATA JEHOVÁ RURANGA YANAPÄMÄNANCHIPAJ
8. ¿Dios lapan rurashgancunata musyanchicu? (Eclesiastés 11:5).
8 Tayta Dios rurashganta manami lapantaga musyanchichu (leiriy Eclesiastés 11:5). Jehová munayninta cumplinanpaj rurashganta, imacuna pasananpaj permitishganta, imano yanapämänanchita manami musyanchichu (Sal. 37:5). Jehová lapan rurashgancunata manami musyashunchu, chayga caycan Biblia nishganno mamanpa pachancho wamra imano winashganta mana musyashganno. Chaytaga cientificucunapis manami musyanchu.
9. Jehová imano yanapämänanchita mana musyarga, ¿imacunamanraj yarpachacushwan?
9 Jehová imano yanapämänanchita mana musyarga sasami canman. Chaymi juclä marcaman predicanapaj aywayta munaptinchega, aruyninchita o imaycanchitapis jaguinanchiraj, chayman yarpashgaga mana camäpacushunchu decidinapaj. Jehovata sirvishganchicho calpachacushgapis capaz yarpanchi ‘Jehová, rurashgäwan manami contentuchu caycan’ nir. Jina capazchi payta sirvishganchicho imata ruranapaj yarpashcanchi, ichanga rurayta puedishganchichu. O cada junaj predicaciunman yargurpis mana pitapis Bibliapita yachacuyta munajcunata tarinchichu. O capaz Salunta sharcachiycho yanapacuycanchi y ima problemacunapis yurinman. Chayno pasamashgaga yarpashwan: “¿Jehová yanapaycämanchuraj?” nir.
10. Jehová yanapämänanchita mana musyarga, ¿imanotaj yanapämänchi?
10 Jehová imano yanapämänanchita mana musyaptinchega yanapämäshun más humilde cananchipaj. Jehovapa yarpaynincuna y ruraynincuna noganchicunapita más ali caycan (Is. 55:8, 9). Jina yachacushun imatapis ruraptinchega Payman yäracushgaga alimi yargupämäshun. Predicaciuncho y Jehovapaj imata rurashganchicho ali yargapämaptinchega Jehovatami alabananchi (Sal. 127:1; 1 Cor. 3:7). Capaz imatapis rurayta munashgaga munashganchino yargushgachu, pero Jehovaga lapanta musyaycan y ricaycanpis (Is. 26:12). Puedishgalanchita rurarmi Jehovaman yäracushun Pay yanapämänanchipaj. Payga unaynoga cananga manami milagruta rurangachu pero segurumi caycanchi pay yanapämänanchipaj (Hech. 16:6-10).
11. ¿Imacunatataj musyanchi?
11 Musyashganchicunalaman yarpaptinchi yanapämanchi. ¿Imata musyanchi? Musyanchimi Jehovaga cuyapäcoj, alita ruraj y yachaj cashganta. Payga valuranmi Paypaj rurashganchicunata y hermanunchicunapajpis. Y Jehová manami gonganchu cäsucojcunata bendicinanpaj (Heb. 11:6).
WARAYCUNA IMA PASANANPAJ CAJTA MANA MUSYANCHICHU
12. Santiago 4:13, 14 nishganno, ¿imatataj mana musyanchichu?
12 (Leiriy Santiago 4:13, 14). Manami musyanchichu waracuna ima pasamänanchipaj cajta. Lapanchitami ilajpita imapis pasamashwan (Ecl. 9:11). Capaz yarpashwan “cayta o wacta rurashaj” nir, ichanga manami musyanchichu ima pasamänanchipaj cajta, cawaycänanchipaj o manapis.
13. ¿Imanirtaj sasa o aja canman ima pasamänanchipaj cajta mana musyar?
13 Sasami canman waraycuna ima pasamänanchipaj cajta mana musyar. Imapis mana ali pasamänanchipaj cajman yarpar laquicushwan y cushishgala manami caycashwannachu. Mana yarpashganchi ilajpita ima desgraciacunapis pasamashwan, chay horacho laquicushwan y guelanacushwanpis (Prov. 13:12).
14. Cushishga cananchipäga, ¿imatataj rurananchi? (Fotucunatapis ricay).
14 Imayca nacaycunapa pasarpis Jehovata cuyashpanchimi Pay munashganno sirviycäshun. Bibliaga manami nimanchichu shuyaränapaj Jehová ima problemapita chapämänanchipaj cajta, jina manami nimanchichu destinado caycashganchita. Taytalanchi Jehová musyanmi cushishgala cawanapaj, manami lapantarächu musyananchi ima pasananpaj cajta. Chaypa trucanga Paypa consejuncunata ashinanchi y cäsucunanchi (Jer. 10:23). Imatapis decidinapäga Jehová consejuncunata cuentaman churarga Santiago nishganno nishun: “Tayta Dios munaptin kawarqa kaytapis y waktapis rurashunmi” (Sant. 4:15).
Jehová nimashganchicunata cäsucushgami imaycachopis yanapämäshun. (14 y 15 caj parrafucunata ricay).b
15. ¿Shamoj tiempupaj imata musyanchi?
15 Watancuna ima pasamänanchipaj cajta manami musyanchichu, ichanga musyanchimi Jehová aunimashganchi imaycamayaj cawananchipäpis cielucho car o cay pachacho carpis. Musyanchimi Jehovaga manami imaypis lulapämänchichu, aunishgantaga cumplinmi Paytaga manami imapis michayta puedinchu (Tito 1:2). Paylami cayta nimanchi: “Noqami unaypita patsa ima pasananpaq kaqtapis wilakatsï. Pasananpaq atska wata pishiykaptinmi musyatsï”. Pay nishganga lapanmi cumplicaycan y chaynolami cumplicanga (Is. 46:10). Jehovataga manami pipis ni imapis michayta puedinchu cuyamashganchita (Rom. 8:35-39). Imaycacunata aguantananchipäga Jehová calpata gomäshun, yachayta gomäshun y shogamäshunpis. Segurumi caycanchi Jehová yanapämänanchipaj y bendecimänanchipajpis (Jer. 17:7, 8).
JEHOVÁ REGUIMASHGANCHITA LAPANTAGA MANAMI TANTIANCHICHU
16. Salmo 139:1-6 nishganno, ¿imata musyan Jehová noganchipita?
16 (Leiriy Salmo 139:1-6). Camamajninchi Jehová noganchipita lapanta musyan, payga musyan shongunchicho ima yarpashganchita y munashganchitapis. Jehová lapan rurashganchicunata rican y musyan imanirtaj imatapis ruranchi. Rey David nergan Jehová altanto caycan imapitapis yanapämänanchipaj. Cushicuypajmi caycan Lapanta puedej Taytalanchi Jehová, Camamajninchi car noganchiman yarpashgan. Rey Davidpis cayno nergan: “Tsayno kashqaykiqa pasaypa kushikuypaqmi kaykan. Manami imano tantiyaytapis atipätsu” (Sal. 139:6).
17. ¿Imanirtaj sasa canman Jehová cuyamashganchita creinapaj?
17 Capazchi sasa canman Jehovata cuyacoj Taytatano ricänanchipaj, imano ashmashga cashganchipita, maycho winashga cashganchipita, ima creenciayoj cashganchitapis. O capazchi Davidno sienticushwan unay mana alita rurashganchiraycu noganchipita Jehová carucho caycashganta (Sal. 38:18, 21). O capaz pilapis calpachacuycan shongupita Jehová munashganno cawananpaj, y cayno yarpanman: “Jehová shumaj reguimaptenga, ¿imanirtaj mañaman imano cashgäta cambianäpaj?”.
18. Imano cashganchita Jehová musyashganga, ¿imanotaj yanapämanchi? (Fotucunatapis ricay).
18 Noganchicunaga shumaj manami musyanchichu imano cashganchita ichanga Jehovalami musyan imano cashganchita. Y payga ali cajcunalata noganchipita rican, chaytaga shumaj tantiacunanchi. Ayvecis ali cajta rurayta munarpis mana alita ruranchi. Juchasapa captinchipis Jehová cuyamanchimi (Rom. 7:15). Jehová musyan imano runa canapaj cashganta, chayta musyashgaga yanapämanchi cushishgala y mana jaguiypa payta sirvinapaj.
Canan wichan manami lapanta musyanchichu, pero musyanchi Jehová paraisucho cushicuypa cawayta aunimashganchita. Chayman yarparga yanapämäshun imayca problemacunatapis aguantananchipaj. (18 y 19 caj parrafucunata ricay).c
19. ¿Imatataj Jehovapita musyanchi?
19 Segurumi caycanchi Jehová cuyacoj cashganta (1 Juan 4:8). Musyanchimi Jehová mandatuncunata gomashganchi cuyamashpanchimi y payga noganchipaj alicunata munan. Y musyanchipis Jehová imaycamayajpis cawananchita munashganta. Wamran wanushganraycu segurumi caycanchi Jehová juchasapa captinchipis ali nawilanwan ricämananchipaj (Rom. 7:24, 25). Jina musyanchi Taytalanchi Jehová “alli shungu cashpan shungunchitapis musyan” (1 Juan 3:19, 20, Panao Biblia). Jehová musyan shongunchicho ima cashganta y segurumi caycan munayninta rurananchipaj.
20. ¿Imamantaj yarpänanchi mana alapa yarpachacunapaj?
20 Yachacushganchino, Jehovaga wilamanchi musyanapaj cajlata. Mana musyashganchicunalamanga alapa yarpachacushunchu, sinoga musyashganchi cajcunalamanmi yarpachacushun. Chayno rurashgaga Jehovaman yäracushganchitami musyachicushun, ‘payga lapanta yachaj Diosmi’ (Job 36:4). Canan tiempucho manami lapanta musyanchichu, pero cushicunchimi Jehovapita paraisucho imaycacunata mana yachacushganchita yachacunapaj cajta (Ecl. 3:11).
104 CAJ CANCIÓN Ruwacurga, espiritunta goycamäshun
a Jesús listumi caycan Satanaspa maquincho lapan caycashganta ushacächinanpaj. Chaymi tantianchi Jesús canan musyannami imay junaj Armagedón guerra cananpaj y imay Diospa contran cajcunata “llapanta binsinanpaj” (Apoc. 6:2; 19:11-16, TDI).
b FOTUPA WILACUYNIN: Juc tayta wamranwan ima desgraciapajpis listo caycänanpaj mochila emergenciata alistacuycan.
c FOTUPA WILACUYNIN: Juc hermano problemapa pasaycar, shamoj tiempucho cushishga cawananpaj yarparaycan.