Waquincunapaj mañacunanchipaj ama gongashunchu

1. ¿Imanirtaj Jehovata mañacushganchega shumaj regalumi caycan?

JEHOVATA mañacushganchega shumaj regalumi caycan, manami imawanpis tincunchu. Cayman yarpäshun: Jehová angelcunata imaycacunata rurananpaj encargashga y wamran Jesucristuta munayniyoj cananpaj churashga (Sal. 91:11; Mat. 28:18). Chayno captinpis, Jehová manami pitapis encargashgachu mañacuyninchicunata wiyananpaj. Payga munan quiquinmi mañacuyninchicunata wiyananpaj (Sal. 65:2).

2. Pablo mañacushgancunapita, ¿imatataj yachacunchi?

² Lapan yarpachacushganchipita Jehovata mañacuptinchipis manami gongashwanchu waquincunapäpis mañacunanchipaj. Apóstol Pabluga waquincunapämi mañacurgan, chaymi Éfeso marcapita cristianucunata nergan: “Tayta Diosta qamkunapaq manakur imaypis agradëcikü” (Efes. 1:16). Jina waquincunapaj jutincunapapis mañacurgan. Chaymi Timoteuta cayno escribergan: “Tayta Diosta sirvirmi tsakaypapis junaqpapis qampaq manakur agradëcikuykä” (2 Tim. 1:3). Pabluga imayca yarpachacuynincunapaj mañacuptinpis manami gongarganchu waquincunapaj mañacuyta (2 Cor. 11:23; 12:7, 8).

3. ¿Imanirtaj ayvecis waquincunapaj mañacuyta gongashwan?

³ ¿Imanirtaj ayvecis waquincunapaj mañacuyta gongashwan? Sabrinaa jutiyoj hermananchi cayno nin: “Caway vidanchicho imaycacunata rurananchipämi caycan. Chauraga problemanchicunalaman yarparaycurla quiquinchilapaj Jehovata mañacushwan”. Capazchi noganchipis quiquilanchipajmi mañacuycanchi, chaymi canan yachacushun imanirtaj alapa ali caycan waquincunapaj mañacuyta. Jina yachacushunpis imano chayta rurananchipaj.

¿IMANIRTAJ WAQUINCUNAPAJ MAÑACUNANCHI?

4, 5. Waquincunapaj mañacurga, ¿rasunpachuraj paycunata yanapaycashwan? (Santiago 5:16).

⁴ Waquincunapaj mañacuptinchi “Tayta Dios mayanmi” (leiriy Santiago 5:16). Waquincunapa mañacuptinchi, ¿rasunpachuraj paycunata yanapaycashwan? Aumi. Jesús musyarganmi apóstol Pedro payta niegananpaj, chaymi nergan: “Tayta Diosta manakushqä yärakuyniki mana ushakänanpaq” (Luc. 22:32). Pablupis musyargan waquincunapaj mañacushganwan yanapayta puedishganta. Chaymi Jehovata sirvishganpita Romacho preso caycaptin, Filemunta cayno escribirgan: “Tayta Diosta manakushqaykino carcilpita yarqamurqa watukuq shamushaqmi” (Filem. 22). Y chaynomi cargan, ichic tiempula pasariptin Pablo wichgarashga manana caycargannachu y yapay runacunata Diospita yachachiyta puedirgan.

⁵ Jehovata mañacuptinchi manami payta obligashwanchu munashganchino rurananpaj. Jehová mayna musyanmi lapan yarpachacuycashganchita y öraga mañacushganchino ruranman. Chauraga imalapäpis yarpachacuycaptinchi Jehovata lapan shongunchiwan mañacushun y paypa maquincho jaguirishun imano yanapämänanchipaj (Sal. 37:5; 2 Cor. 1:11).

6. Waquincunapaj mañacuptinchi, ¿imanotaj paycunata ricashun? (1 Pedro 3:8).

⁶ Waquincunapaj mañacuptinchi más laquipäcojmi cashun (leiriy 1 Pedro 3:8). Pipis laquipäcoj captin waquincuna nacaycashganta ricar imacunatapis ruran yanapacunanpaj (Mar. 1:40, 41). Michael jutiyoj anciano wilacun: “Waquincunapaj mañacuptë shumajraj tantiä imacunapa pasaycashganta, y chayman yarpar paycunata masraj cuyä. Paycuna mana musyarpis, masraj yarpachacuycä imata pasaycashganman”. Juc ancianupis Richard jutiyoj cayno nin: “Waquincunapaj mañacuptinchi, más ganas ganasla yanapacuyta munanchi. Y pilapäpis mañacuptinchi nircur yanapaptinchipis mañacuyninchita contestashgannomi canga”.

7. Waquincunapaj mañacuptinchi, ¿quiquilanchiman yarparashwanchuraj? (Filipenses 2:3, 4; fotucunatapis ricay).

⁷ Waquincunapaj mañacuptinchi manami quiquinchi pasashganchicunalaman yarparäshunnachu (leiriy Filipenses 2:3, 4). Cay munduga Diablupa maquincho cashganraycu lapan runacuna imayca nacaycunapa pasaycan (1 Juan 5:19; Apoc. 12:12). Mana gongaypa waquincunapaj mañacuptinchi yarpachimäshun ‘yärakuq mayintsikuna maytsaychöpis nakaykashqanta’ (1 Ped. 5:9). Juc precursora Katherine jutiyoj nin: “Waquincunapaj mañacuptë yarpächimanmi paycunapis nogano problemacunapa pasaycashganta. Chaymi quiquëlaman manana yarparänachu”.

¿PÏCUNAPÄTAJ MAÑACUNANCHI?

8. ¿Pïcunapätaj mañacushwan?

⁸ ¿Pïcunapätaj mañacunanchi? Gueshyaj hermanunchicunapaj, escuelancho Diosta cäsucunanpaj mozu jipashcunapaj y edayashga hermanunchicunapajpis. Waquin hermanunchicunata familiancuna y autoridäcunapis chiquipar michan Diosta sirvinanpaj (Mat. 10:18, 36; Hech. 12:5). Waquincuna marcancho may chaycho pelianacuycashganta ricar wasinta jaguiriycur juc marcaman gueshpicurgan, jina waquincunana jatun desgraciacunaraycu nacarcaycan. Chaypa pasaycaj hermanucunata mana reguirpis paycunapaj mañacuptinchi Jesús mandamashganchino jucninchi jucninchi cuyanacunchi (Juan 13:34).

9. ¿Imanirtaj pushacoj hermanunchicunapaj y warmincunapaj mañacunanchi?

⁹ Jinamanpis Jehovapa testiguncunata Pushaj hermanunchicunata y yanapajnincunapäpis mañacunanchi, Sucursalcho Dirigej hermanunchicunapaj, Betel oficinata pushaj hermanunchicunapaj, congregaciuncunata watucamoj hermanunchicunapaj, congregaciuncho caycaj ancianucunapaj y siervo ministerialcunapäpis mañacunanchi. Paycunapis problemayoj caycan, chayno captinpis waquincunata yanapan (2 Cor. 12:15). Congregaciunta watucamoj hermanunchi Mark, cayno wilacun: “Nogaga taytäcunapita carucho cashgäraycu pasaypami laquicö. Taytäcuna chachayashgana gueshyaptin panë runanwan cuyacuywan ricaycaptinpis, paycunata mana yanapaycashgäta alapa laquicö”. Cay hermano pasashganno waquincunapis mana ali pasaycashganta mana musyaptinchipis, paycunapaj mañacunanchi (1 Tes. 5:12, 13). Pushaj hermanucunapa warmincunapäpis mañacunanchi, paycuna runancunata yanapan congregaciuncho caycajcunata shumaj ricananpaj.

10, 11. ¿Cushicunchuraj Jehová lapan hermanunchicunapaj mañacuptinchi?

¹⁰ Ayvecisga lapan hermanunchicunapaj mañacushwan. Capazchi lapan wichgarashga caycajcunata Jehová yanapananpaj o wanupacushga cajcunata Jehová consuelananpäpis mañacushwan. Donald jutiyoj anciano cayno wilacun: “Achca hermanunchicuna imayca nacaycunapa pasaycan, chaymi pitapis mana gonganapaj ayvecisga lapanpaj mañacunchi”.

¹¹ Manami musyanchichu lapan hermanunchicuna ima sasacunapa pasaycashganta, chaymi lapancunapaj mañacunanchi. Y paycunapaj mañacuptinchi Jehovapis cushicun (Juan 17:20; Efes. 6:18). Chauraga yäracoj masinchicunata cuyar paycunapaj mañacunchi (1 Ped. 2:17).

¿IMATATAJ RURASHWAN HERMANUCUNAPA JUTINPA MAÑACUNANCHIPAJ?

12. ¿Imanirtaj hermanunchicuna imapa pasashganta altanto caycashwan?

¹² Hermanunchicunapa altanto caycäshun. Lapan hermanunchicunapaj mañacurpis hermanunchicunapa jutinpa mañacushwan. Capazchi congregaciunniquicho pilapis fiyu gueshyawan nacaycan, o capaz maygan mozo laquicuycan escuelancho estudiaj masincuna mana alita rurananpaj inquitaptin. Capaz maygan hermanunchipis japalan tayta o mama car wamranta ashmaycan Jehová munashganno cawapäcunanpaj (Efes. 6:4). Hermanunchicuna imapa pasashganta altanto caycaptinchi, paycunata cuyapar Jehovata mañacushun (Rom. 12:15).b

13. ¿Waquin hermanunchicunata mana reguirpis jutinpa mañacushwanchuraj?

¹³ Hermanunchicunapa jutinpa mañacushun. Waquin hermanunchicunata mana reguirpis jutinpami mañacushwan. Crimea, Eritrea, Rusia y Singapur naciuncunacho waquin hermanunchicuna wichgarash caycan. Paycunapa jutincunami jw.org paginacho caycan.c Congregaciuncunata watucamoj Brayan hermanunchi cayno nin: “Pï wichgarashga hermanupa jutinta escribiptë y jutinpa fuertita parlaptë, mañacushgä hora rasla jutinta yarpä”.

14, 15. ¿Imata rurananchi hermanunchicuna imapa pasaycashganpita mañacunapaj?

¹⁴ Hermanunchicuna imapa pasaycashganpita Jehovata mañacushun. Sojta caj parrafucho parlashganchi Michael hermanupita, pay cayta ruranapaj nimanchi: “Jw.org paginacho carcelarashga hermanunchicuna pasaycashganpita leiptë, nogata pasaycamashgantanomi yarpachacö. Noga carcelcho caycaptë warmëpaj pasaypa yarpachacöman y ali caycänanpaj munäman. Chayno yarpar yanapaman casado wichgarash hermanucuna imapa pasaycashganta Jehovata mañacunäpaj” (Heb. 13:3).

¹⁵ Preso hermanunchicuna cada junaj imaycacunapa pasaycashganman yarpachacuptinchi, yanapämäshun paycuna pasashganpita Jehovata mañacunanchipaj. Caycunapita mañacushwanmi: carcelcho guardiacunaga hermanucunata ali tratananpaj, Jehovata sirvinanpaj autoridäcuna mana michänanpaj (1 Tim. 2:1, 2). Jina carcelarashga hermanucuna ali portacushganwan marcancho tiyaj hermanucunata shacyächinanpaj y mana Testigo cajcunapis Diospa ali wilacuyninta wiyananpaj (1 Ped. 2:12). Chauraga hermanunchicuna imapa pasaycashganpita altanto caycaptinchi paycunapaj jutinpa Jehovata mañacushun. Pero manami preso hermanunchicunalapaj mañacushwanchu sinoga lapan hermanunchicunapaj, chaynopa jucninchi jucninchi cuyanacärishun (1 Tes. 3:12).

HERMANUNCHICUNA IMAPA PASAYCASHGANTA JEHOVÁ MAYNAMI MUSYAN

16. Hermanunchicunapaj manaraj mañacur, ¿imata Jehová mayna musyan paycuna pasashganpita? (Mateo 6:8).

¹⁶ Yachacushganchinopis waquincunapaj mañacuptinchi paycunata yanapaycanchi, pero manaraj mañacuptinchipis Jehovaga mayna musyan waquincuna imapa pasaycashganta. Y mañacushganchicho pitapis yanapanapaj manami nishwanchu ‘Jehová cayta wacta ruray’ nir. Payga mayna musyan sirvejnincuna imapa pasaycashganta, noganchi manaraj cuentata gocuptinchipis (leiriy Mateo 6:8). Chauraga canan yachacushcanchi imanirtaj waquincunapaj mañacushwan. Waquincunapaj yarpachacur y lapan shongunchiwan cuyar paycunapaj mañacunchi, chaynopa Jehovano cuyacoj cashun y paypa shonguntapis cushichishun.

17, 18. ¿Imanirtaj Jehová altanto caycan waquincunapaj mañacushganchita? Juc tincuchicuywan tantiachicamuy.

¹⁷ Waquincunapaj mañacuptinchi Jehová paycunata yanapashganta ayvecis manami ricanchichu. Chayno captinpis Jehová altanto caycan hermanunchicunata cuyar paycunapaj mañacushganchita. Mä yarpäshun juc tayta ishcay wamrayoj cashganta. Olgu wamran gueshyanpita camacho jitaraycan, chaymi warmi wamran taytanta cayno cutin cutin mañacun: “Papä, turiläta yanapayculay ari, gueshyanpita alchacänanpaj” nir. Taytanga olgu wamranta cuyar ali cuidaycannami y musyanna imano caycashganta, chayno captinpis alapami cushicun warmi wamran turinpaj laquicushganta ricar.

¹⁸ Chaynolami Jehová munan cristiano masinchicunata cuyar paycunapaj mañacunanchipaj. Chayno rurarga manami quiquilanchiman yarparaycäshunchu sinoga hermanunchicunamanpis, y cuyacoj cashganchita Jehová manami imaypis gongangachu (2 Tes. 1:3; Heb. 6:10). Yachacushganchino ayvecis mañacushganchiwan waquincunata yanapashwan mana alipa pasaycashganta mejorananpaj. Chaymi, ¡mana gongaylapa imaypis hermanunchicunapaj mañacuycäshun!