¿Religiunga politicaman jaticanmanchuraj?

May chaychopis achca runacuna “cristianumi cä” nir politicaman pasaypa jatican. Waquincunaga yanapan candidatucunata y politicucunata religiunnin reguishga cananpaj. Politicucunaga marca masincunapaj alicunata rurananpaj parlapäcun religiuncunacho caycaj waquincuna yanapacärinanpaj. Ayvecis juc ishcay pushacoj religiusucuna autoridä cananpaj yaycuyta munapäcun. Waquin naciuncunachoga autoridäcuna chaycho tiyajcunapaj juc religiunninta camacächishga.

Gam ichanga, ¿ima ninquitaj? Jesucristupa gatejnincuna, ¿politicaman jaticanmanchuraj? ¿Imatataj Jesús rurargan? Paymi nergan: “Noqata rikakamar qamkunapis rurapäkunaykipaqmi tsayno rurashqä” (Juan 13:15, MYL). Ricärishun imataj Jesús rurargan política asuntucunacho.

¿Autoridä cananpaj Jesús yaycurganchuraj?

Manami. Jesusga imaypis politicamanga jaticashgachu.

Jesusga cay munducho autoridä cananpaj ashirganchu. “Llapan chay ricashayquitami goycushayqui” nir Diablo payta munachiptin, Jesusga Diabluta nergan “washata witicuy” (Mateo 4:8-10, TDI).a Juc cuticho, runacunaga cuentata gocurgan Jesús musyaj yachaj y ali pushacoj cashganpita, chaymi payta nirirgan politicaman jaticänanpaj. Runacunaga “mandaqnin rey kananpaq imaykanöpapis churayta munapäkurqan. Tsayta tantiyarmi jirkapa Jesús japalan aywakurqan” (Juan 6:15, MYL). Runacuna munashganta Jesús manami rurarganchu, politicaman jaticaytaga imaypis mana munarganchu.

Jesús imaypis politicaman jaticarganchu. Jesús cay pachacho cawashgan wichan, judiucunaga manami munarganchu romano autoridäcunata impuestuta pagananpaj. Paycuna yarpargan romanucunaga abusivo cashganta. Ichanga, yanapananpaj Jesusta niptin, paymi chay problemaman jaticarganchu. Chaypa ruquenga, caynomi nergan: “Césarpa kaqtaqa Césarta qoykuy. Tayta Diospa kaqtaqa Tayta Diosta qoykuy” (Marcos 12:13-17, MYL). Chayman mana jaticäcurpis, Jesusga claro ricächicurgan romano autoridäcunata impuestuta pagananpaj cajta. Ichanga Jesús nergan autoridäcunata cäsucuptinpis, paycunata mana adurananpaj. Yachachirganpis Dioslata aduranapaj y paylata lapancho cäsucunapaj (Mateo 4:10; 22:37, 38).

Jesús wilacurgan cielucho caycaj Diospa Gobiernunpita (Lucas 4:43). Pay musyarganmi político runacunaga Dios munashganno ali gobernayta mana puedishganta, chaymi politicaman jaticarganchu. Payga tantiarganmi Diospa Gobiernunla cay pachata alchananpaj puedishganta (Mateo 6:10). Jesús musyargan Diosga manami runacunata churangachu imayyajpis gobernaj cananpaj, sinoga Diosmi quiquinpa Gobiernunta apamungapaj (Daniel 2:44).

¿Unay cristianucunaga politicaman jaticarganchuraj?

Manami. Jesús mandashganno discipuluncunaga mana jaticarganchu cay mundupa ruraynincunaman (Juan 15:19). Chaymi paycunaga Jesús rurashganno manami politicaman jaticarganchu (Juan 17:16; 18:36). Chaycunaman jaticänanpaj ruquenga, calpachacurganmi Jesús mandashganta rurananpaj: runacunata Diospa Gobiernunpita wilananpaj y yachachinanpäpis (Mateo 28:18-20; Hechos 10:42).

Unay cristianucunapäga, imapitapis más ali cargan Diosta cäsucunanpaj. Chayno captinpis, musyarganmi autoridäcunatapis respetananpaj cashganta (Hechos 5:29; 1 Pedro 2:13, 17). Chaymi leycunataga cäsupacoj y impuestutapis pagajmi (Romanos 13:1, 7). Politicaman mana jaticaptinpis, cristianucunaga gobiernucuna cuidananpaj leynincunata y yanapacuynintapis chasquirganmi (Hechos 25:10, 11; Filipenses 1:7).

Canan wichan cristianucunapis politicaman jaticanchu

Biblia claro tantiachimanchi Jesús y unay cristianucunapis politicaman mana jaticashganta. Chaymi lapan pachacho Jehovapa testiguncuna, Jesuspa discipulun cashganraycur, politicaman jaticanchu. Unay cristianucunano, calpachacun Jesús mandashganta rurananpaj: “Tayta Dios mandaykashqanpa ali wilakuyninta” predican (Mateo 24:14, MYL).