MOZO-JIPASHCUNA TAPUCÄRIN
¿Imanirmi Diosta mañacushwan?
Maychicaj mozo-jipashcuna Tayta Diosta mañacärin, pero pulancunala goyan goyan mañacärin. Chayno captinpis, waquincunaga capaz tapucärinman: “¿Imanotaj yanapäman Diosta mañacuptë?”
¿Ima ninantaj Diosta mañacuyga?
Diosta mañacurga, quiquinwanmi parlaycanchi. Pay Camacoj carpis wiyamanchimi, runacunapita más munayniyoj caycarpis, “Payqa manami noqantsipita karuchötsu kaykan” (Hechos 17:27). Quiquin Biblia cayta ruranapaj nimanchi: “Tayta Diosninchïman ayway-llapa (o witimuy). Chauraga paypis maquinchönami purichishunqui” (Santiago 4:8, Tayta Diosninchi Isquirbichishan).
¿Imacunatataj ruranquiman Diosman witinayquipaj?
Mañacuy. Diosta mañacurga, paywan parlaycanchi.
Bibliapita yachacuy. Diosga parlapämanchi Bibliawanmi.
Diosta mañacuptiqui y Bibliapita yachacuptiquiga, yanapäshunqui paypa amigunman ticranayquipaj.
Jeremy jutiyoj mozo nin: “Jehovaga juc shumaj regaluta gomashcanchi, paywan parlarcunapaj, chaymi alapa cushicö Diosta mañacushpä”.
Miranda jutiyoj jipash nin: “Shongücho imayca caycashganta Jehovata wilapashpäga, yanapäman payman más yaracunäpaj”.
¿Diosga wiyamanchuraj?
Diosman yaracushpayqui payta mañacuptiquiga, capaz tapucunqui “¿payga wiyamanchuraj o imanoraj?” nir. Bibliaga cayno nin Jehovapita: “Pipis manakamushuptiki qam mayankimi” (Salmo 65:2). Y manami chaylachu, payga lapan yarpachacuyniquicunatapis payta wilarcunayquipaj shuyaran. ¿Imanir? Diosga gampajmi yarpachacun (1 Pedro 5:7).
Tantiarcunapaj: Amigunchicunawan imaypis parlaycanchi, chaynolami Dioswanpis parlacunquiman. Maycho carpis y imay hörapis paywan parlayta puedinqui, y jutinpa “Jehová” nir gayanquiman (Salmo 86:5-7; 88:9). Quiquin Biblia niycäshunqui imaypis mana gongaypa Tayta Diosninchita mañacäriy (1 Tesalonicenses 5:17).
Moises jutiyoj mozo nin: “Diosta mañacushpäga, taytäwan parlaycajno sienticö y shongücho imayca caycashganta payta wilapä”.
Karen jutiyoj jipash nin: “Jehovataga lapanta wilapä, mamanëta y cuyashga amigücunata wilapashgäno”.
¿Imacunapitataj mañacöman?
Bibliaga nin: “Tayta Diosta agradëcikur lapanchöpis yanapashunaykipaq manakäriy” (Filipenses 4:6).
Chaurasga, ¿problemayquicunata Diosta wilapayta puedinqui? ¡Awmi! Quiquin Diospa Palabran chayta ruranapaj nimanchi, Salmo 55:22 nin: “Lapan lakikuynikikunatapis TAYTA DIOSPA makinman kachaykäriy”.
Pero Diostaga manami mañacunquimanchu problemayquicunalawan yanapäshunquipaj. Juc jipash cayno nin: “Diospa amigan manami cämanchu yanapacuyninlata ashiptëga. Chaypa trucanga, payta puntata agradecicushwan waran waran lapan gomashganchicunapita; payga cawayta, micuyta y imaycacunatapis gomanchi”.
Tantiarcunapaj: ¿Imacunapitaraj Diosta agradecicunquiman? Cay junajcho Jehová yanapäshushgayquipita quimsa ruraycunaman yarparcuy, nircur payta agradecicuy.
Anita jutiyoj jipash nin: “Diostaga imalapitapis agradecicushwanmi, capaz cuyaylapa waytata ricashganchipita agradecicushwan shumaj camashganpita”.
Brian jutiyoj mozo nin: “Bibliaga wilacun Dios imaycacunata camashganta, chaymi leishgayquiman yarpachacuy y nircur Jehovata agradecicuy”.