Jehová regalamashganchi cawayta cuidashun

1. ¿Imanirtaj ninchi Jehová runacunapa cawayninta alapa valurashganta?

GAMTASHI juc amigo jatun wasita regalashunqui, ichanga chay wasi pintani y uchcu uchcu caycan. Chayno captinpis shumaj rurachishga captin alapa chanin cuestaj caycan. ¿Manachu chay wasita alapa cuyanquiman y cuidanquiman? Chaynolami Jehová cawayta gomashcanchi, y chayga alapa valuryoj regalumi caycan. Chaymi Jehová cuyashga wamranta cachamurgan noganchiraycur (Juan 3:16).

2. 2 Corintios 7:1 nishganno, ¿imataj Jehová munan ruranapaj?

² Jehovalami ‘pï-maytapis cawachin’ (Sal. 36:9). Chaypita parlarmi apóstol Pablupis nergan: “Tayta Diosmi cawachimanchi y purichimanchi” (Hech. 17:25, 28). Chaymi ninchi cawayninchi Diospa regalun cashganta. Pay cuyamashpanchi imaycacunata gomanchi cawanapaj (Hech. 14:15-17). Ichanga Jehová manami milagruta rurangachu mana wanunapaj. Chaypa trucanga Pay munan quiquinchi saludninchita cuidanapaj, espiritual cajchopis (leiriy 2 Corintios 7:1). ¿Imanirtaj saludninchita y cawayninchita cuidashwan, y imanotaj chayta rurashwan?

CAWAYNINCHITA VALURASHUN

3. ¿Imanirtaj saludninchita shumaj cuidanchi?

³ Jehovata cushishga y sanula sirviyta munarmi, shumaj saludninchita cuidananchi (Mar. 12:30). Tayta Diosninchi munashganno cawanapaj, ‘quiquinchicuna cawaycaj ofrendanopis paylapaj’ caycäshun. Chaypäga saludninchita dañananpaj cajtaga ni imatapis micushwanchu ni rurashwanchu (Rom. 12:1). Rasunpa cajchoga alapa cuidacurpis, imaylapis gueshyashunmi. Chayno captinpis calpachacunchimi saludninchita cuidanapaj, chaynopa Jehovata agradecicuycanchi cawayta regalamashganchipita.

4. ¿Imanirtaj David cawaytaraj munaj?

⁴ Jehová goshgan cawaytaga David alapami valuraj. Chaymi cayta nergan: “Noga wañuptë ¿imataraj gänanqui? Wañushanaga manami alabashunquinachu. Ni alli cashayquitapis mananami willaconganachu” (Sal. 30:9). Wanunanpäna caycaptinchi caycunata escribergan. Chayno captinpis, Davidga cawaytarämi munargan Jehovata alabaycarla caycänanpaj. Noganchipis chayta munaycunchi ¿au?

5. ¿Imatataj rurashwan edayashga caycarpis o alapa gueshyaycarpis?

⁵ Edäninchiraycur o gueshyaraycur unayno rurashganchega öraga rurayta puedishwannachu, chayraycur laquishga y ‘imapäpis valëchu’ nirchi yarpashwan. Ichanga chayga manami ninanchu saludninchita manana cuidanapaj. ¿Imanir? Edayashga carpis o gueshyaycarpis rey Davidno Jehovata alabayta puedinchirämi. Juchasapa captinchipis Jehovaga alapa cuyamanchi, ¡chayta musyar shacyächimanchimi! (Mat. 10:29-31). Aumi, alapa cuyamashpanchimi wanuptinchipis cawarachimänanchipaj aunimanchi (Job 14:14, 15). Chaymi calpachacunanchi saludninchita y cawayninchita cuidanapaj.  

SALUDNINCHITA DAÑANANPAJ CAJTAGA AMA RURASHUNCHU

6. Imata micunapaj o upunapaj acranapaj captenga, ¿imataj Jehová shuyaran?

⁶ Bibliaga manami yachachicunchu jampicunapita o imacunata micunapaj, ichanga musyachimanchi imataj Jehová chaycunapita yarpashganta. Chaymi Biblia cayno consejamanchi: “Llutancunata ama ruraychu” (Ecl. 11:10). Bibliaga nin pachalapaj mana ashinapaj y upialacho mana cacunapaj, chaycunaga cuerpunchita dañanman (Prov. 23:20). Chaura imata micunapaj o upunapaj acranapaj captenga, Jehová shuyaran controlacunapaj (1 Cor. 6:12; 9:25). 

7. Proverbios 2:11 nishganno, ¿imatataj rurashwan saludninchita shumaj cuidanapaj?

⁷ Jehová cawayta gomashganchipita agradecicunchi shumaj yarpachacur-raj ima decisiuntapis acraptinchi (Sal. 119:99, 100; leiriy Proverbios 2:11). Tantiacoj carga shumajraj yarpachacushun imata micunapaj. Tantiarinapaj, juc micuy alapa gustamaptinchipis dañamaptinchega ama micushwanchu. Ali tantiacoj carga, necesitashganchi horacunatami punushun, fisicata rurashun, armacushun, tacshashun y wasinchitapis pichapacushunmi.

IMAPIS MANA PASAMÄNANCHIPAJ CUIDACUSHUN

8. Biblia nishganno, ¿imanirtaj israelitacunata Jehová leycunata gorgan mana accidentacunanpaj?

⁸ Israelitacunatami Jehová leycunata gorgan wasincho y aruyninchopis cuidacur mana accidentacunanpaj (Éx. 21:28, 29; Deut. 22:8). Pipis runa masinta mana munaycar wanuycachiptenga, mana alimanmi chayanman cargan (Deut. 19:4, 5). Leyga nergan pipis mana munaycarpis chichu o gueshyaj warmita shuluycachiptin, wanuchishgapis canmanmi (Éx. 21:22, 23). Bibliaga claro musyachimanchi Jehová cawayninchita cuidanapaj munashganta.

9. ¿Imatataj rurashwan mana accidentacunapaj? (Fotucunata ricay).

⁹ Jehová gomashganchi cawayta agradecido caycarga cuidacushun wasinchicho y aruycho mana accidentacunapaj. Wasinchicho afilashga cuchillucuna captin, rantishganchi jampicuna captin wamracuna mana yatananpaj altuman o seguro churashwan, ilgächinapaj captenga shumaj ilgächishun. Ninata, acaycaj yacuta y corrientiwan funcionaj maquinacunata shumajmi churananchi. Jina carruta manejashwanchu upyashga car, shumaj mana punushga car y umata tumachicoj jampicunata upushga car. Chaypitapis manejaycar celularta aptarashga caycashwanchu.

ILAJPITA IMAPIS PASAMAPTINCHI

10. ¿Imataraj rurashwan desgracia manaraj pasacuptin y pasacuptinna cawayninchita peligruman mana churanapaj?

¹⁰ Rasunpa cajchoga desgraciacuna, peste gueshyacuna y pleitucuna imaypis cangami, chaycuna cawayninchita peligruman churan. Chaycuna pasaptin cawayninchita peligruman mana churanapaj autoridäcuna nishganta cäsucunanchi, wasipita mana yargunapaj nimaptinchi, juc marcaman aywanapaj nimaptinchi y juc wilacuyta gomaptinchipis (Rom. 13:1, 5-7). Chaymi desgraciacuna manaraj pasacuptin shumaj alistacushun, autoridäcuna nimashganchitapis cäsucushun. Cayta ruranapaj nimashwanmi: yacuta, mana malogracaj micuycunata y jampicunata churarächinapaj.

11. Peste gueshya captenga, ¿imatataj rurashwan?

¹¹ Tiyashganchi sitiucho peste gueshya yurircamuptenga, ¿imatataj rurashwan? Autoridäcunata cäsucushwan caycunata ruranapaj nimaptinchi: maquinchicunata maylacunapaj y runacunawan junto mana caycänapaj, mascarillata churacunapaj y wasinchilacho quedacunapäpis. Caycunata cäsucurga cawayninchita valuraycashganchita ricächicushun.

12. Proverbios 14:15 nishganno, ¿imatataj rurashwan luta wilacuycunata mana cäsucunapaj?

¹² Juc desgracia pasacuptenga luta wilacuycuna yurimunmanmi y chaytaga wiyashwan amigunchicunapita y noticiacunachopis. Chaycunaman creinapaj trucanga autoridäcuna y gobiernucuna jorgamushgan yäracuypaj wilacuycunatami wiyacunanchi (leiriy Proverbios 14:15). Jinamanpis Jehovapa testiguncunata Pushajcuna y sucursalta dirigej hermanucunata cäsucunanchi reuniuncuna imano ruracänanpaj y runacunata imano yachachinapaj nimaptinchi. Paycunami yäracuypaj wilacuycunata ashiycur-rämi imata ruranapäpis nimanchi (Heb. 13:17). Cäsucuptinchega quiquinchipa y waquincunapa saludninta cuidaycäshun, chaynopa Jehovapa testiguncunapita waquincuna más alirächi parlapäcunga (1 Ped. 2:12).

YAWARTA MANA CHURACUNAPAJ LISTO CAYCÄSHUN

13. Yawarta churacunapaj nimaptinchega, ¿imanotaj ricächishun cawayta valuraycashganchita?

¹³ Jehovapa testiguncunaga reguishga capäcun yawarta respetapäcushganpitami. Jehovata cäsucunchi yawarta mana churacuptinchi wanunapäna caycaptinchipis (Hech. 15:28, 29). Chayga manami ninanchu wanuyta munaycashganchita; cawaytaga alapami valuraycunchi Diospita chasquishga captinmi. Chaymi yachaj doctorcunata ashinchi yawarniynaj atiendimänanchipaj.

14. ¿Imatataj rurashwan cada cadala mana accidentacunapaj?

¹⁴ Cay yachachicuycho ricashganchino lapanta cäsucuptinchega alapaga manami gueshyashunnachu. Ichanga operacunapaj captenga cawayninchita o saludninchita shumaj cuidashga carga raslami aliyarcushun. Wasinchicho y aruyninchichopis cawayninchita peligruman mana churanapaj calpachacushun cuidacunapaj y carruta manejaptinchi señalcunata respetashun. Chaynopa cada cadala manami accidentacushunchu ni hospitalmanpis ilajpita apamäshunchu.

15. 1) ¿Imanirtaj yawarta mana chasquinapaj documentutaga amänula chararaycashwan? (Fotucunatapis ricay). 2) Videuta ricashganchino, ¿imanirtaj ali yachacur-raj decidishun yawarta chasquinapaj o manapis?

¹⁵ Jehová cawayta goycalämashganchitapis agradecicunchi yawarta mana chasquinapaj documentuta guelgachiptinchi, firmaptinchi y may chaycho caycarpis amänula purichiptinchi.b Cay documentuchomi wilacunchi imanir yawarta mana chasquishganchita o ichic partincunata imanir chasquishganchita o manapis. ¿Amänulachu caycan chay documentuyqui? ¿Pilatapis firmachishcanquinachu? Alichi canman chayta ruraptiqui. Yawar-raycur ima decidishganchita chay documentucho mayna guelgachishga carga maygan docturtapis tantiachinapäga facil-lami canga. Chayno captenga manachi docturcunaga mana munashganchita rurapäcungachu.c

16. ¿Imataj ruranquiman yawarta mana chasquinayquipaj documentucho imata escribinayquipaj mana musyaptiquega?

¹⁶ Jovinla y ali saludyoj caycarpis lapanchitami ima accidentipis pasamashwanmi o gueshyaycushwanpis (Ecl. 9:11). Chaymi imaypis purichishwan yawarta mana chasquinapaj documentuta. Chay documentucho imata escribinayquipaj mana musyaptiquega ancianucuna yanapäshunayquipaj mañacuy. Ichanga paycunaga manami nishunquichu imata decidinayquipaj, chaytaga quiquiquimi decidinayqui (Gál. 6:4, 5). Paycunaga yanapäshunqui ali tantianayquipaj, nircur ima decidishgayquita escribinayquipaj.

TANTIACOJ CASHUN

17. ¿Imanotaj saludninchipita parlar tantiacoj runa cashganchita ricächicushun?

¹⁷ Imano jampicunapaj imata decidinapäga canga Jehovawan amistäninchi imano caycashganpitami (Hech. 24:16; 1 Tim. 3:9). Chaymi decidishganchipita waquincunawan parlarga yarpänanchi Filipenses 4:5 nishganta: “Ali runa kapäkushqaykita pïmaypis musyatsun”. Chaymi ali runa o tantiacoj cashganchita ricächicushun saludninchilapaj alapa mana yarpachacur y decidishganchino waquincuna decidinanpaj mana niptinchi. Hermanunchicunataga respetayculanchimi y cuyayculanchimi noganchino mana decidiptinpis (Rom. 14:10-12).

18. ¿Imanotaj agradecido caycashganchita ricächicushun cawayta chasquishganchipita?

¹⁸ Galanancho nishganchinopis Jehovapitami cawayta chasquinchi. Chaymi cawayninchita cuidaptinchi y Jehovata shumaj sirvinapaj calpachacuptinchimi agradecicuycashganchita ricächicunchi (Apoc. 4:11). Canan wichan imayca problemacunapami pasanchi y gueshyanchipis, chayno cawacunapäga Jehová manami munarganchu. Chaymi ichiclachona Jehová bendicimaptinchi mana nacaypa, mana wanuypa imaycamapis cawacushun (Apoc. 21:4). Chaycama cawayninchita valurashun y Taytalanchi Jehovata lapan shongunchiwan sirvishun.