Cantar de los Cantares
Lapanpitapis mas kuyaylapaqta cantashqan
1 Kaychömi qelqaraykan lapanpitapis mas kuyaylapaq kaq cantakuna. Kay cantakunaqa Salomónpami kaykan.
Punta kaq cantakuna
Jipash:*
2 ¡Shumaq mutsarkamankiman itsanqa!
Kuyamar mutsamashqaykiqa vïnupitapis masmi mishkin.
3 Perfümikipa ali asyaynin* maypis mushkiräkuypaqmi kaykan.
Jutikipis perfüminömi kuyaylapaq kaykan.
¡Tsaymi jipashkunapis pasaypa kuyashunki!
4 ¡Cuartuykiman jukla pushakalämay, tayta rey!*
Tsaychömi pasaypa kushishqa qoyäshun.
Vïnuta upur kushikushqantsipitapis masmi kuyanakur kushikushun.
¡Rasuntachari jipashkuna kuyashunki!
5 Jerusalén jipashkuna, noqaqa yanala karpis Cedar runakunapa toldunno kuyaylapaqmi kaykä.*
Salomón ruratsishqan cortïnakunano kuyaylapaqmi kaykä.
6 Shanaywan yanayashqa kashqätaqa ama rikapämaytsu.
Turïkunami rabyapämashpan üva chakrakunata täpanäpaq churamarqan.
Tsaymi kikïpa üva chakräta mana täpashqätsu.*
7 Kuyaylapaq mözu, wilaykalämay.
Uyshaykikunata ¿maychötaq mitsikunki?
Pulan junaq fiyupa shanaptin ¿may lantumantaq qatinki?
Wilamaptikiqa manami amïguykikuna mitsikushqancho qamta ashir pantakashqa purishaqtsu.
Yanasankuna:
8 Lapan jipashkunapitapis mas kuyaylapaq jipash, ashiykashqayki mözu maychöpis kashqanta mana musyashpaykiqa uyshakunapa yupilanpa ayway tarinaykiyaq.
Mitsikuqkunapa tsuklankuna kaqman chayaykur cabraykikunata mitsikuy.
Mözu:
9 Mamïta, Faraónpa carrëtanta qarachaq fïna yëwanömi kuyaylapaq kaykanki.
10 Zarcïlluykita jatikuptikiqa qaqlaykipis kuyaylapaqmi kaykan.
Perlasyuq walqaykita walqakuptikiqa kunkaykipis kuyaylapaqmi kaykan.
11 Qellaywan adornashqa qori zarcïllutami rurapäshayki.
Jipash:
12 Perfümïpa ali asyayninqa chayan kuyashqä rey jamaraykashqanyaqmi.
13 Taksha bolsawan tsararashqä mïrra perfümi pëchulächo kashqannömi kuyaynï pëchulächo warayta punun.
14 En-gadi parti üva chakracho kaykaq kuyaylapaq alheña waytanömi kuyaynïqa kaykan.
Mözu:
15 Pasaypa kuyaylapaqmi kaykanki, mamïta.
Maypis kuyaykuylapaqmi kaykanki.
Nawikipis ishkay palumano kuyaylapaqmi kaykan.
Jipash:
16 Papïtu, pasaypa kuyaylapaqmi kaykanki.
Kamaraqla karmi munapaypaq kaykanki.
Mözu:
Verdiraykaq qewami cämantsipis kaykan.
17 Cedru yörami wayintsipis.
Ciprés yörami lantuntsipis.
Jipash:
2 Saróncho rösa waytami noqaqa kaykä.
Pampacho winaq liriu waytami kaykä.
Mözu:
2 Mamïta, kashakuna chawpincho kaykaq liriu waytami kaykanki.
Qamqa lapan jipashkunapitapis mas kuyaylapaqmi kaykanki.
Jipash:
3 Munti rurincho manzäna wayuraykaqnömi qamqa lapan mözupitapis mas kuyaylapaq kaykanki, papïtu.
Nawpaykiman jamaykurqa manami yarquytapis munätsu.
Mishkinömi kuyakuynikipis kaykan.
4 Ali alita mikukunayki wayikimanmi pushamashqanki.*
Tsaychömi kuyamashpayki makalarämashqanki.
5 Qamta kuyaylawanmi shonqüpis shonqu niraqnatsu.
Päsasnikita y manzänaykita jukla qaramay.*
6 Itsuq kaq rikraykita jawnapämay.
Alawqa kaq rikraykiwan makalarkamay.
Mözu:
7 Jerusalén jipashkuna, luychukunapa jutincho y tarushkunapa jutincho promitiykalämay kuyaynï punukuqta mana rikchatsinaykipaq.
Punuyta yamashqanyaq* punukutsun.
Ishkay kaq cantakuna
Jipash:
8 ¡Kuyashqä mözu rimamushqanta mayaykänami!
¡Payqa aywaykämunnami!
¡Puntakunapa y jirkakunapa pañaykacharraqmi aywaykämun!
9 Kuyashqä mözuqa luychunöraqmi kaykan.
Payqa kuyaylapaq tarushnöraqmi kaykan.
¡Wayï waqtanchönami kaykan!
¡Ventänapanami watqaraykämun!
¡Rejïllanpanami rikapaykäman!
Mözu:
10 Mamïta, jukla sharkuy.
Kuyashqä warmi, jukla aywakushun.
11 Tamya tiempupis pasashqanami.
Usya tiempuchönami kaykantsi.
12 Intëru jirkachömi waytakunapis pashtaraykan.
Cantanantsi tiempupis chayamushqanami.
Kulkushkuna cantashqanpis maytsaychömi mayakaykan.
13 Hïgus yörakunapis wayuraykanmi.
Üva yörakunapapis ali asyaynin* mayakaykämunmi.
Jukla shamuy aywakunantsipaq, mamïta.
14 Kuyashqä paluma, qaqakunacho y chunyaq jirkakunacho amana pakakuynatsu.
Parlashqaykitami mayayta munä; qaqlaykitami rikayta munä.
Qam rimashqaykiqa maypis mayakuylapaqmi kaykan.
Qaqlaykipis kuyaylapaqmi kaykan.
Mözuwan Jipash:
15 Üva yörantsikunaqa tuktuykanmi.
Tsaykunataqa cuidädu atuq malwakuna ushanman.*
¡Tsay atuqkunata wanutsishun!
Jipash:
16 Kuyaynïqa noqalapaqmi kaykan.
Noqapis paylapaqmi kaykä.
Payqa liriu waytakuna kaqchömi mitsikun.* *
17 Papïtu, manaraq patsa waraptin y lantuypis manaraq pasaptin luychunöraq y tarushnöraq Beter puntakunaman* kutikalämuy.
Jipash:
3 Tsakaypapis cämächömi ashishqä shonqü kuyashqan mözuta.
Wakpa kaypa tikraykacharpis manami tarishqätsu.
2 Pasaypa yarpachakurmi sharkushqä.
Intëru markapa aywarmi cällikunapa y pläzakunapapis kuyashqä mözuta ashishqä.
Mayjina ashirpis manami tarishqätsu.
3 Tsayno puriykaqtami marka täpaq wardiakuna tarimashqa.
Paykunawan tinkurmi tapukushqä kayno nir:
“¿Manaku rikalashqanki kuyashqä mözuta?”
4 Paykunapita pasarilarmi kuyanakushqäwan tinkushqä.
Makalakurkurmi mana kachaypa mamäpa wayinman pushashqä.
Yurishqä cuartumanmi yaykatsishqä.
Mözu:
5 Jerusalén jipashkuna, luychukunapa jutincho y tarushkunapa jutincho promitiykalämay kuyaynï punukuqta mana rikchatsinaykipaq.
Punuyta yamashqanyaq punukutsun.
Kimsa kaq cantakuna
Yanasankuna:
6 Chunyaq jirkapita ¿imataq shamuykan?
¿Imataq qoshtatarraq aywaykämun?
Mïrra perfümino, inciensuno y tukuy casta kuyaylapaq perfümikunano ¿imataq ali asyaykämun*?
7 ¡Tsayqa kaykan Salomónpa andasninmi!*
Soqta chunka (60) soldädukunapa chawpinpami aywaykämun.
Tsay soldädukunaqa Israelcho alinnin kaq soldädukunami karkaykan.
8 Lapanpis karkaykan espäda manijayta y pelyayta yachaq soldädukunami.
Tsakaypa imapis kaptin jukla pelyapäkunanpaqmi tseqlancho espädata puritsipäkun.
9 Andasnintaqa Líbanupita apatsimushqan alinnin kaq qerukunapitami rey Salomón ruratsishqa.
10 Andasninpa tushankunaqa qellaypitami kaykan.
Tushakunapa jawiräkunanpis qoripitami kaykan.
Reypa jamakunanpis granäti tëlapitami kaykan.
Rurinpaqa Jerusalén warmikuna kushishqa bordashqanmi kaykan.
11 *Sión warmikuna, ¡shapäkamuy rey Salomón corönan jatishqa aywaykämuqta rikanaykipaq!
Tsay corönataqa casarakunan junaqmi maman jatipashqa.
Tsay junaqmi Salomónpa shonqun pasaypa kushikushqa.
Mözu:
4 Pasaypa kuyaylapaqmi kaykanki, mamïta.
Maypis kuyakuylapaqmi kaykanki.
Nawikipis vëluyki rurincho ishkay palumanömi kuyaylapaq kaykan.
Aqtsaykipis atska cabra malwakuna Galaad jirkakunapa pañar puriqnömi kaykan.
2 Kiruykikunapis majädacho tsayraq armatsishqa y rutushqa yoraq uyshakunanömi kaykan.
Parninpa parninpa kuyaylapaqmi kaykan.
Manami juklaylapis pishintsu.*
3 Shimikipis kuyaylapaq puka hïlunömi kaykan.
Rimashqaykiqa maypis mayakuylapaqmi kaykan.
Vëluyki rurincho qaqlaykipis granädanömi kuyaylapaq ishkan lädu pukaraykan.
4 Kunkaykipis David ruratsishqan törrinömi kuyaylapaq kaykan.
Kunkaykicho walqaykipis tsay törricho warkaraykaq waranqa (1,000) escüdunömi kaykan.
Ali chölu soldädukunapa escüdun kuyaylapaq kashqannömi walqaykipis kuyaylapaq kaykan.
5 Chuchuykipis milïshu luychu malwakuna liriu waytakunapa chawpincho mikuykaqnömi kuyaylapaq kaykan.*
6 Noqaqa manaraq patsa waraptin y lantuypis manaraq pasaptinmi mïrra perfümi kashqan jirkaman y inciensu kashqan jirkanman* aywashaq.
7 ¡Qamqa kuyaylapaqmi kanki, mamïta!
¡Chaki puntaykipita uma pukshuykiyaq kamaraqlami kaykanki!
8 Kuyakuylä, Líbanupita nawpäman aywaykalämuy.*
Líbano puntakunacho kashqaykipita shakalämuy.
Amaná nishqan puntapita shamuykulay.
Senir nishqan Hermón jankapita shakalämuy.
Leonkuna tänan machaypita y tigrikuna tänan puntapita aywaykalämuy.
9 Qampaqmi shonqüpis shonqu nirantsu, mamïta.
Rikäramaptiki shonqüpis pasaypami kurun kurunyan.
Walqaykipa hïlunwanmi shonqüta suwashqanki.
10 Kuyamashqaykiqa shonqüyaqraqmi chayaykun.
Kuyamashqaykiqa vïnupitapis mas alimi kaykan.
Perfümita winakushqaykipis lapan perfümikunapita mas alimi kaykan.
11 Shimikipis abëjapa mishkinnömi mishkiykun.
Mutsamaptiki abëjapa mishkinwan lëchi mishkiqnömi mishkiykun.
Röpaykipis Líbanucho kaykaq muntipa ali asyayninnömi munapaypaq kaykan.
12 Qam kaykanki tumariq qenchashqa huertami, mamïta.
Qam kaykanki tsapashqa yaku pözumi.
13 Cuerpuykiqa granäda frütayuq huertami kaykan.
Tsay huertachömi kaykan tukuy casta mishkiq frütakuna,
alheña waytakuna
y nardo waytakuna.
14 Tsaychömi kaykan nardo y azafrán,
ali asyaq cäña y canëla,
tukuy casta inciensu jachakuna,
mïrra, áloe y wakin ali asyaq jachakunapis.
15 Tsay huertata parqunaykipaq pukyumi kaykanki.
Nawin pukyumi kaykanki.
Líbanupita urämuq yakumi kaykanki.
Jipash:
16 ¡Witsaypa aywaq wayra, shumaq wayrämuy!
¡Uraypa aywaq wayra, shumaq wayrämuy!
¡Huertäman wayrämushpayki kuyaylapaq asyayninta kuyaynïman apay!
¡Kuyaynïqa huertanman shamutsun!
¡Mishkiq frütakunapa wayuyninta tsaycho mikutsun!
Mözu:
5 Huertächönami kaykä, mamïta.
Shuntaykä mïrra perfümita y kuyaylapaq asyaq waytakunatami.
Panalnincho kaykaq mishkitapis yawaykänami.
Lëchita y vïnutapis upuykänami.
Yanasankuna:
Amïgukuna, yamashqaykiyaq* mikuy y upuy.
Chusku kaq cantakuna
Jipash:
2 Punurpis mayaq mayaqlami punuykarqä.
Tsayno punuykashqächömi kuyamaqnï qayakamuqta mayarqä.
Mözu:
¡Kuyaylapaq palumita, punkuykita kichapaykalämay!
¡Umäpis shulyapashqami kaykan!
¡Tsakay shulya yakumi umäpitapis jutuykan!*
Jipash:
3 Maynami röpätapis loqtikushqä.
¿Yapaytsuraq jatiküman?
Maynami chakïtapis maylakushqä.
¿Yapaytsuraq qanratäman?
4 Kuyashqä mözuqa makinta jatimurqan punku uchkupami.*
Makinta jatimuptinmi shonqüpis kurun kurunyarqan.
5 Pasaypa kuyarmi jinan höra sharkurqä punkuta kichapänäpaq.*
Makïpita dëdükunapitami mïrra perfümi punkupa trancanmanpis juturqan.*
6 Punkuta kichariptï kuyashqä mözu manami kashqanatsu.
Aywakushqa kaptinmi pasaypa lakikurqä.
Ashirpis manami tarirqätsu.
Qayakuptïpis manami contestamarqantsu.
7 Tsayno ashir puriykaptïmi taripäkamarqan marka täpaq runakuna.
Paykunami yawarlana maqarkamar kachaykamashqa.*
Tsapakushqä vëlutapis qechupäkamashqa.
8 Jerusalén jipashkuna, qamkunatami ruwakü.
Kuyashqä mözuta rikashpayki wilaykulanki paypaq lakikur qeshyaykashqäta.
Yanasankuna:
9 Pïmaypitapis mas kuyaylapaq jipash, ¿imanirtaq tsay mözuta tsayjinanpa kuyaykunki?
Tsayno encargakamänaykipaqqa ¿imano kaptintaq tsayjinanpa kuyaykunki?
Jipash:
10 Kuyashqä mözuqa kamaraqlami kaykan.
Chunka waranqa (10,000) runakunapa chawpincho karpis payqa reqipalami kaykan.
11 Umanpis qorinömi kuyaylapaq kaykan.
Qoshpu aqtsanpis cuervuno* yanami kaykan.
12 Nawinkunapis pasaypa kuyaylapaqmi kaykan.
Lëchiwan armakushqa ishkay paluma pözu kuchuncho jamaraykaqnömi nawinkuna kaykan.
13 Qaqlanpis ali asyaq* waytakuna huertacho pashtaraykaqnömi kaykan.
Shiminpis liriu waytapita mïrra perfümi jutuykaqnömi kaykan.
14 Makinkunapis jacinto rumikunawan adornashqa qori sortëjanömi kaykan.
Cuerpunpis zafiro rumikunawan adornashqa kuyaylapaq *marfilnömi kaykan.
15 Chankankunapis qoripita rurashqa jawiräkunan janancho marmolpita* rurashqa tusha ichiraykaqnömi kaykan.
Líbanucho kaykaq mas jatun cedru yöranöraqmi kuyaylapaq kaykan.
16 Rimakuynin maypis mayakuylapaqmi kaykan.
Paynöqa manami pipis kantsu.
Jerusalén jipashkuna, tsaynömi kuyashqä mözuqa.
Tsaynömi kuyaynïqa.
Yanasankuna:
6 Pïmaypitapis mas kuyaylapaq jipash, ¿maypataq kuyashqayki mözu aywashqa?
¿Maypataq aywanan kashqa?
Wilapäkamay ashïshinäpaq.
Jipash:
2 Kuyamaqnïqa huertanmanmi urashqa.
Ali asyaq wayta huertanmanmi yaykushqa.
Huertakuna kaqcho mikunanpaqmi aywashqa.
Tsaychömi liriu waytakunata palanqa.*
3 Kuyaynïqa noqalapaqmi kaykan.
Noqapis paylapaqmi kaykä.
Payqa liriu waytakuna kaqchömi mitsikun.
Pitsqa kaq cantakuna
Mözu:*
4 Qamqa Tirsa markano y Jerusalén markanömi kuyaylapaq kaykanki, mamïta.
Atska soldädukuna pelyaman aywashqan espantaypaq kashqannömi kuyaylapaq kashqaykipis kaykan.
5 Amana rikapämaynatsu.
Rikapämashpaykiqa löcutätsimankimi.
Aqtsaykipis atska cabra malwakuna Galaad jirkakunapa pañar puriqnömi kaykan.
6 Kiruykikunapis majädacho tsayraq armatsishqa yoraq uyshakunanömi kaykan.
Parninpa parninpa kuyaylapaqmi kaykan.
Manami juklaylapis pishintsu.*
7 Vëluyki rurincho qaqlaykipis granädanömi ishkan lädu kuyaylapaq pukaraykan.
8 Mandaq reypa soqta chunka (60) warminkuna kaptinpis
pusaq chunka (80) *concubïnankuna kaptinpis
y yupaytapis mana atipaypaq jipashninkuna kaptinpis
9 kuyashqä palumalämi lapanpitapis mas kuyaylapaqqa kaykan.
Paytami mamanpis pasaypa kuyan.
Jipashkunapis kuyaylapaq kashqanta rikarmi alabapäkun.
Reypa warminkunapis y concubïnankunapis ali warmi kashqantami rimapäkun.
Yanasankuna:
10 Manami pipis kantsu kuyashqayki jipashnöqa.
Waraq lucëru atsikyaqnömi y killa kuyaylapaq kashqannömi kaykan.
Inti chipchipyaykaqnömi kuyaylapaq kaykan.
Atska soldädukuna pelyaman aywashqan espantaypaq kashqannömi kuyaylapaq kashqanpis kaykan.
Mözu:
11 Nogal yörakuna kaykashqan huertamanmi yaykushqä.*
Tsayman yaykushqä mayu kuchun pampa verdiraykaqta rikanäpaq,
üva tsintsiraykaqta rikanäpaq
y granäda tukturaykaqta rikanäpaqmi.
12 Tsaychömi elaqpita rikakushqä reypa carrëtancho kaykaqnöraq.
Yanasankuna:
13 (7.1) ¡Kutikamuy, Sulamita, kutikamuy!
¡Qamta rikaytami munarkaykä!
¡Kutikamuy! ¡Kutikamuy!
Jipash:
¿Imano kaykaqtataq rikamayta munarkaykanki?
Yanasankuna:
¡Campamentucho qatswaykaqtanömi rikayta munarkaykä!
Mözu:
7 (2) Reypa tsurinnöraq mamïta, sandaliaykita jatikurkuptiki chakikipis kuyaylapaqmi kamaran.
Adornu rurayta yachaqkuna rurashqan adornunömi tseqlaykipis kuyaylapaq kaykan.
2 (3) Pupuykipis ali vïnu juntaraykaq cöpanömi kaykan.
Pachaykipis liriu waytawan intëru kuchunpa tsapashqa trïgu qoturaykaqnömi kaykan.
3 (4) Chuchuykipis milïshu luychu malwakunanömi kuyaylapaq kaykan.*
4 (5) Kunkaykipis *marfilpita rurashqa törrinömi kuyaylapaq kaykan.
Nawikipis Hesbón markacho kaykaq Bat-rabim punku nawpancho ishkay yaku estanquinömi kaykan.
Senqaykipis Damascuman rikaraykaq Líbanucho kaykaq törrinömi kuyaylapaq kaykan.
5 (6) Umaykipis Carmelo puntano kuyaylapaqmi kaykan.
Aqtsaykipis fïnu hïluno karmi reytapis löcutätsin.
6 (7) Qamqa kanki pasaypa kuyaylapaqmi, mamïta.
Mana kachaypa maypis kuyakuylapaqmi kaykanki.
7 (8) Palma yöra ichiraykaqnömi kuyaylapaq jatunkaray kaykanki.
Chuchuykipis palma yörapa wayuynin warkuraykaqnömi kaykan.
8 (9) Wayuyninta palanäpaq palma yöramanmi witsayta munä.
Tsaychömi tarishaq sartanpa üvano chuchuyki kaykaqta,
jämayniki poqushqa manzänano ali asyaykaqta*
9 (10) y shimiki ali kaq vïnuno pasaypa mishkiykaqta.
Mutsamaptikimi vïnuta upuptï kirüpa y qallüpa mishkir pasarpuqno kaykan.
Jipash:
10 (11) Noqaqa kuyayniläpaqmi kaykä.
Paypis nawpalächo kaytami munaykan.
11 (12) Markapita jukla yarqushun, papïtu.
Kuyaylapaq waytakunapa chawpincho warämushun.
12 (13) Patsa wararkuptinnami üva chakrakunapa aywashun.
Tsaycho rikamushun üvakuna murkuraykannakush y granädapis tukturaykannakush.
Tsaychömi munashqaykita yawatsishayki.
13 (14) Tsaychömi mandrägorapis ali asyaykämun.
Tsaychöqa tukuy casta frütakunami kaykan.
Reqishqayki y mana reqishqayki frütakunatapis tsaychömi yawatsishayki.*
Jipash:
8 ¡Alimi kanman mamäpa chuchunta chuchur qeshpiq turï kaptiki!
Tsayno kaptikiqa cällicho tinkushpantsi mutsarkuptïpis manami pipis jamurpämanmantsu.
2 Makipita janchakurkurmi mamäpa wayinman pushäman.
Tsaychömi kuyakuq kayta yachatsimankiman.
Granädapita qaptsishqa yakunwan talurkurmi noqapis alinnin kaq vïnuta qaräman.*
3 Itsuq kaq rikraykita jawnapämay.
Alawqa kaq rikraykiwan makalarkamay.
Mözu:
4 Jerusalén jipashkuna, promitiykalämay kuyaynï punukuqta mana rikchatsinaykipaq.
Punuyta yamashqanyaq* punukutsun.
Soqta kaq cantakuna
Yanasankuna:*
5 ¡Rikapäkuy!
¡Chunyaq jirkapita jipash aywaykämun kuyaynin makalashqa!
Mözu:
Manzäna yöra sikincho punukuykaqtami qamta rikchatsishqä.*
Tsaychömi mamayki qeshyaq rikakushqa.
Tsaychömi mamaykita wachay nanay tsarishqa.
Jipash:
6 Imaypis yarparämänaykipaq shonquykiman churaykalämay.
Mana qonqamänaykipaq rikraykiman jutïta qelqaykulay.
Kuyanakuytaqa wanuytano manami pipis tsapantsu.
Waylunakuypitapis sepultürapitano manami qeshpintsitsu.
Kuyanakuyqa Tayta Diospita shamuq nina karmi imaypis mana upintsu.
7 Kuyanakuytaqa manami ni lamarpis ni mayupis upitsiyta kamäpakuntsu.
Kuyanakuqkuna kachanakunanpaq rïcu runa lapan riquëzankunata munatsipaptinpis manami chaskipantsu.
Jipashpa turinkuna:
8 Panintsipaqa chuchunpis manami yurinraqtsu.
Pipis payta ashiq shamuptinqa ¿imatataq nishun?
9 Panintsi murällano kaptinqa qellaypita palaciuta ruratsiqnöchi adornashwan.
Adornuynaq punkuno kaptinqa cedru tablakunawan adornaqnöchi adornashwan.
Jipash:
10 Noqaqa murällanömi kaykä.
Chuchükunapis rikachakuna törrikunanömi kaykan.
Kuyamaqnïpa nawpanchöqa pasaypami kushikü.
11 Baal-hamónchömi Salomónpa üva chakran karqan.
Tsay chakrantami runakunata arriendakuykurqan.
Cada wata cosëchata usharkurmi cada ünun waranqa (1,000) qellayta arrindunpita pägapäkuq.
12 Salomón, tsay runakunapita waranqa qellayta chaskiptikipis
y chakra rikaqkunata ishkay pachak (200) qellayta pägaptikipis
noqaqa üva chakräta kikïmi rikaykä.*
Mözu:
13 Huertakunacho jamakuq reina, amïgükuna mayaq mayaqlami karkaykan rimashqaykita mayananpaq.
Noqapis mayanäpaq imalatapis rimarkalämuy.
Jipash:
14 Luychuno karpis o tarushno karpis ali asyaykaq* jirkakuna jananpa cörrimuy, papïtu.
1.1 1Rey. 4.32; Cant. 3.9-11.
1.3 Wakin runakunaqa mushkuynin nipäkun.
1.4 Tsay witsanmi warmi runanta kuyar tayta rey niq.
1.5 Cedar runakunapa toldunkunaqa yanami karqan.
1.6 Kikïpa üva chakräta mana täpashqätsu ninanqa cuerpüta cuidashqätsu ninanmi.
2.4 Ali alita mikukunayki wayikimanmi pushamashqanki ninanqa kuyanakunantsipaq pushamashqanki ninanmi.
2.5 Päsasnikita y manzänaykita jukla qaramay ninanqa jukla kuyamay ninanmi.
2.7 Wakin runakunaqa ajashqanyaq nipäkun.
2.13 Wakin runakunaqa mushkuynin nipäkun.
2.15 Üva yörantsikunaqa tuktuykanmi ninanqa kuyanakushqantsi kushikuypaqmi kaykan ninanmi. Cuidädu atuq malwakuna ushanman ninanqa cuidakushun kuyanakushqantsita imapis mana malogrananpaq ninanmi.
2.16 Liriu waytakunaqa kikin jipashmi. Mitsikun ninanqa noqata kuyaman ninanmi.
2.16 Cant. 6.3.
2.17 Hebreo idiömacho Beter ninanqa ishkayman rakishqa ninanmi. Beter puntakunapaq parlarqa kikinpa chuchunpaq o cuerpunpaqmi jipash parlaykan.
3.6 Wakin runakunaqa mushkuykämun nipäkun.
3.7 Andasqa reyta jamarkatsir runakuna puritsinanmi kaykan. Cortïnayuq, sillëtayuq y lantuyuq shumaq adornashqami kaykan.
Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
4.1-2 Cant. 6.5-6.
4.5 Cant. 7.3.
4.6 Mïrra perfümi kashqan jirkapaq parlar y inciensu kashqan jirkanpaq parlarqa jipashpa cuerpunpaqmi parlaykan.
4.8 Líbanuqa karu nacionmi karqan. Manami Líbanucho kashqanpitatsu jipash shamunanpaq mözu nirqan, sinöqa paypita juk läducho kashqanpita shamunanpaqmi. Nawpancho mana karqa tsay jipash maycho karpis mözupaqqa karuchönömi karqan.
5.1 Wakin runakunapa ajashqaykiyaq nipäkun.
5.2 Punkuykita kichapaykalämay nishqanqa jipashpa cuerpunpaqmi niykan. Shulya yakumi umäpitapis jutuykan nishqanqa mözupa cuerpunpaqnami niykan.
5.4 Tsay nishqanqa ishkay sentïduyuqmi kaykan. Wayi punkupa makinta jatimushqanta nishqannölami jipashman mözu yaykunanpaq kashqantapis niykan.
5.5a Tsay nishqanpis ishkay sentïduyuqmi kaykan. Punkuta kichapänanpaq sharkushqanta nishqannölami mözuwan kakuyta munashqanta niykan.
5.5b Tsay nishqanpis ishkay sentïduyuqmi kaykan. Makincho y punkupa trancancho perfümi kashqanta nishqannölami mözuta munapar jipashpa cuerpun ushmashqana kaykashqantapis niykan.
5.7 Tsay witsan kikilanqa warmi manami tsakaypa puriqtsu. Tsaymi wayrapakuq warmi kashqanta yapar maqapäkurqan tsayno mana purinanpaq.
5.11 Cuervuqa yukishpita mas jatun yana pishqumi kaykan.
5.13 Wakin runakunaqa mushkuq nipäkun.
marfil Marfilqa elefantipa waqshunmi kaykan (\xt 1Rey. 10.18; 22.39; Sal. 45.8; Cant. 5.14; 7.4; Amós 3.15; 6.4; Apoc. 18.12).
5.15 Marmol nishqan rumitaqa runakuna lushuyätsin kuyaylapaq kananpaqmi. Marmolpitami runakuna rurapäkun pïsukunata, columnakunata, grädakunata y imayka adornokunatapis.
6.2 Tsay huertaqa y liriu waytakunaqa kikin jipashmi kaykan.
6.3 Cant. 2.16.
6.5-6 Cant. 4.1-2.
concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
6.11 Nogal yörakuna kaykashqan huertamanmi yaykushqä ninanqa jipashman yaykushqä ninanmi.
7.3 Cant. 4.5.
marfil Marfilqa elefantipa waqshunmi kaykan (\xt 1Rey. 10.18; 22.39; Sal. 45.8; Cant. 5.14; 7.4; Amós 3.15; 6.4; Apoc. 18.12).
7.8 Wakin runakunaqa mushkuykaqta nipäkun.
7.13 Frütacunatapis tsaychömi yawatsishayki ninanqa tsaychömi qamwan punushun ninanmi.
8.2 Tsay ninanqa noqapis qamwan punuküman ninanmi.
8.4 Wakin runakunaqa ajashqanyaq nipäkun.
8.4 Cant. 2.7; 3.5.
8.5 Manzäna yöra nishqanqa warmiwan runa kuyanakushqantami niykan. Qamta rikchatsishqä ninanqa kuyakuyta noqami yachatsishqä ninanmi.
8.12 Jipashpa üvas chakranqa kikinpa cuerpun kashqantami niykan. Tsaynöpami jipash nirqan juk runa aykata pägayta munaptinpis cuerpunqa kuyashqan mözulapaq kashqanta.
8.14 Wakin runakunaqa mushkuykaq nipäkun.