¿Jasche kaya ta kan retaʼmaxik chirij ri Loqʼalaj Pixabʼ?

1. ¿Jas katutoʼ wi we kaya ta kan retaʼmaxik chirij ri Loqʼalaj Pixabʼ?

Qastzij wi, ri nabʼe täq kʼutunem rech ri Loqʼalaj Pixabʼ xubʼan chawe che kaloqʼoqʼej más ri Jehová. Tekʼuriʼ, rajawaxik kaya uchoqʼabʼ wajun loqʼoqʼenik riʼ (1 Pedro 2:2). Rech kariq jun akʼaslemal che kʼot ukʼisik are utz che kaya ta kan rachilaxik ri Jehová chiʼ kawetaʼmaj chirij pa ri Utzij. Chasikʼij uwach Juan 17:3 xuqujeʼ Judas 21.

Chiʼ más kawetaʼmaj chirij ri Ajawaxel, ri akojonik kubʼan ko, rukʼ wariʼ katkunik kaya kikotemal che (Hebreos 11:1, 6). Ri kojonik kubʼan chaqe che kqaya kan ubʼanik ri qamak xuqujeʼ kqabʼan ri utz pa ri qakʼaslemal. Chasikʼij uwach Hechos 3:19.

2. ¿Jas kabʼan che kitoʼik nikʼaj chik?

Weneʼ kawaj kabʼij chike nikʼaj chik ri xawetaʼmaj, rumal che qonojel kqaj kqaya ubʼixik chirij utz täq jastaq. Chiʼ más kawetaʼmaj chirij ri Loqʼalaj Pixabʼ, katkunik kakoj ri Utzij ri Ajawaxel rech kakʼut chkiwach ri winaq chirij ri Jehová xuqujeʼ chikij ri utz täq jastaq che kuya chike ri winaq. Chasikʼij uwach Romanos 10:13-15.

Katkunik kachaplej ubʼixik chike ri afamilia xuqujeʼ chike awachiʼl. Chiʼ kabʼan wariʼ are utz kabʼan rukʼ utzilal. Are ta kabʼij chike che utz ta ri kikojonik, are chabʼij chike ri utz täq jastaq ubʼim ri Ajawaxel, xuqujeʼ masach chawe che ri kabʼano are kkʼutuw ri jastaq are ta ri kabʼij. Chasikʼij uwach 2 Timoteo 2:24, 25.

3. ¿Jas utz kuya kabʼano?

Retaʼmaxik chirij ri Loqʼalaj Pixabʼ katutoʼ rech katkunik kabʼan rachiʼl ri Jehová. Xuqujeʼ katkunik katkʼejeʼ pa ri ufamilia ri Ajawaxel. Chasikʼij uwach 2 Corintios 6:18.

4. ¿Jas katutoʼ rech kawetaʼmaj más?

Mayaʼ kan retaʼmaxik chirij ri Utzij ri Ajawaxel rech kubʼan ko ri akojonik (Hebreos 5:13, 14). Chabʼij che jun testigo rech Jehová rech katutoʼ che retaʼmaxik chirij ri Loqʼalaj Pixabʼ rukʼ ri wuj ubʼiʼ ¿Jas qas kukʼut ri Biblia? Chiʼ kawetaʼmaj más, qas kuya kikotemal pa ri akʼaslemal. Chasikʼij uwach Salmo 1:1-3 xuqujeʼ 73:27, 28.

Chnaʼtaj chawe che ri utz täq jastaq rech ri Loqʼalaj Pixabʼ petinaq rukʼ ri Jehová, «ri Ajawaxel che kkikotik» (1 Timoteo 1:11, NM). Katkunik kabʼan rachiʼl ri Ajawaxel we keʼawachilaj ri e sukʼ rajpatanelabʼ (Hebreos 10:24, 25). We kakoj achoqʼabʼ che ubʼanik ri kraj ri Jehová, kariq ri qas kʼaslemal: jun kʼaslemal che kʼot ukʼisik. Qastzij wi, ri utz kabʼano are kakoj achoqʼabʼ rech utz ri awachilanik rukʼ ri Ajawaxel. Chasikʼij uwach 1 Timoteo 6:19.