«Chebʼamulij konojel ri winaq»
1. ¿Jas kjunamataj wi ri nim riqbʼal ibʼ rech oxibʼ qʼij rukʼ ri xkibʼan ri israelitas chiʼ kʼateʼ xeʼel lo pa Egipto?
1 Chiʼ maja naj elenaq bʼi ri israelitas pa Egipto, ri Jehová xubʼij che ri Moisés che keʼumulij ri israelitas pa ri juyubʼ ubʼiʼ Sinaí rech kkitatabʼej ri utzij, rech kkinimaj xuqujeʼ kkikʼut ri ubʼe chkiwach ri kalkʼwal (Deut. 4:10-13). Qastzij wi wajun riqbʼal ibʼ riʼ sibʼalaj xubʼan ko che ri kikojonik ri israelitas. Pa kebʼ oxibʼ ikʼ, ri utinamit ri Jehová xuqujeʼ kkimulij kibʼ pa ri nim riqbʼal ibʼ rech oxibʼ qʼij rech kkitatabʼej ri upixabʼ ri Jehová. ¿Jas rajawaxik kqabʼano rech qas kqetaʼmaj ri pixabʼ?
2. ¿Jas rajawaxik kqachomaj rech kojkunik kojbʼe pa ri nim riqbʼal ibʼ rech oxibʼ qʼij?
2 Rajawaxik kqachomaj ri kqabʼano. Ri Jehová xubʼij chke ri israelitas che rajawaxik kkichomaj ri kkibʼano rech kekunik kebʼe pa ri riqbʼal ibʼ che xbʼan pa ri juyubʼ Sinaí (Éx. 19:10, 11). Xaq junam rukʼ ri xbʼantaj ojer, ri kebʼe pa ri nim riqbʼal ibʼ rech oxibʼ qʼij xuqujeʼ rajawaxik kkichomaj ri kkibʼano, xaq xiw ta ri keyaʼow ri chʼabʼal. Jun kʼutbʼal, e kʼi chke ri qachalal rajawaxik kkitaʼ kiqʼij pa ri kichak. Weneʼ katjunamataj rukʼ ri Nehemías. Ri Nehemías kraj che kel bʼi jujun qʼij pa uchak rukʼ ri ajawinel Artajerjes rech kbʼe pa Jerusalén che uyakik ri tapya, are kʼu retaʼm che weneʼ ri ajawinel man kuya ta bʼe che. Rumal laʼ ri Nehemías xubʼan uchʼawem che ri Dios, tekʼuriʼ qas xuchomaj na ri xubʼij xuqujeʼ xubʼan ko che ri ranimaʼ xutaʼ che ri ajawinel we kuya bʼe che. Ri ajawinel xuya bʼe che rech kbʼek xuqujeʼ xusipaj bʼi jastaq che rech kyak ri tapya (Neh. 2:1-9). Xaq xiw ta rajawaxik kataʼ aqʼij che ri ajchaqʼe ri chak, ¿la xawil ri chʼichʼ katbʼe wi xuqujeʼ jachiʼ katkanaj kan wi? Ri e ajkʼamal bʼe rech ri congregación kkaj kkitoʼ ri kajwataj waʼ taq jastaq riʼ chke xuqujeʼ qas chachomaj ri kabʼano rech chanim katopan pa ri nim riqbʼal ibʼ, xuqujeʼ qas chakojoʼ achuqʼabʼ che utatabʼexik ri kbʼixik (Heb. 2:1).
3. ¿Jas kojtowik rech kqasukʼumaj ri qanimaʼ che ri nim riqbʼal ibʼ?
3 Rech kojkunik kojbʼek, xuqujeʼ rajawaxik kqasukʼumaj ri qanimaʼ rech kojkunik kqataʼ xuqujeʼ kqetaʼmaj ri kbʼixik (Esd. 7:10). Ri kibʼiʼ ri chʼabʼal che kyaʼ pa ri nim riqbʼal ibʼ kriqtaj pa Internet jw.org xuqujeʼ jujun taq textos che kechʼaw chrij ri chʼabʼal. Sibʼalaj utz riʼ we keqil pa ri Qʼijilanik pa ri familia pa ri semanas nabʼe chuwach ri nim riqbʼal ibʼ. Jujun chke ri qachalal kkibʼan imprimir ri kibʼiʼ ri e chʼabʼal riʼ rech kekunik kkitzʼibʼaj jujun taq jastaq chrij chiʼ e kʼo pa ri nim riqbʼal ibʼ.
4. ¿Jas kkibʼan ri nan tat che ukojik ri nim riqbʼal ibʼ che ukʼutik chkiwach ri kalkʼwal?
4 Chikʼutuʼ chkiwach ri iwalkʼwal. Jun rumal che xbʼan ri nim riqbʼal ibʼ pa ri juyubʼ Sinaí are che ri israelitas kkikʼut chkiwach ri kalkʼwal chrij ri Jehová (Deut. 4:10). Ri nim riqbʼal ibʼ re oxibʼ qʼij xuqujeʼ keʼutoʼ ri nan tat rech kkikʼut chkiwach ri kalkʼwal. Ri e nan tat rajawaxik kekubʼe kukʼ ri kalkʼwal pa ri riqbʼal ibʼ xuqujeʼ kekitoʼ rech kkitatabʼej ri kbʼixik. Ri familia kekunik kkitzijoj ri xketaʼmaj chiʼ kkʼis ri qʼij o chiʼ kkibʼan ri kiqʼijilanik pa ri familia.
5. We kojbʼe pa ri nim riqbʼal ibʼ re oxibʼ qʼij ¿jas kojutoʼ wi?
5 Ri nim riqbʼal ibʼ che xbʼan pa ri juyubʼ rech Sinaí xeʼutoʼ ri israelitas rech nim xkil wi che e kʼo pa ri utinamit ri Dios (Deut. 4:7, 8). Ri riqbʼal ibʼ che kbʼan pa kebʼ oxibʼ ikʼ bʼanom rech kojutoʼ rech nim kqil wi che oj kʼo pa ri utinamit ri Dios. Oxibʼ qʼij kojkunik kojel chkixoʼl ri winaq che e kʼo pa uqʼabʼ ri Satanás, che junam taneʼ rukʼ jun chaqiʼj ulew, rech kyaʼ qachuqʼabʼ xuqujeʼ kqachilaj utz taq achilanik pa ri utinamit ri Dios (Is. 35:7-9). Rumal che naqaj chi kʼo wi ri kʼisbʼal, kqaj taj che mat kqabʼan wajun riqbʼal ibʼ ronojel junabʼ rech kqaya qachuqʼabʼ chbʼil qibʼ (Heb. 10:24, 25).