Ri xkitzʼibʼaj lo ri Jupuq Ajkʼamal bʼe cho ronojel uwach Ulew

Loqʼalaj taq qachiʼl:

Sibʼalaj kojkikotik kojtzʼibʼan bʼi chiwe pa umajibʼal wajun junabʼ riʼ che min ubʼanik. Pa ri junabʼ 2014, ktzʼaqat 100 junabʼ che ri ajawinel Jesucristo tajin chi kajawin chkixoʼl ri ukʼulel (Sal. 110:1, 2).

Pa ri riqbʼal ibʼ che kbʼan chjunabʼ rech ri Watch Tower Bible and Tract Society of Pennsylvania, che xbʼan pa ri octubre rech ri junabʼ 2013, ri Comité rech ri Traducción del Nuevo Mundo xresaj ri jun kʼakʼ Biblia pa ingles che are jun utzalaj traducción che kʼo pa ri uwach Ulew. Ri Jehová xukoj ri winaq che echaʼom che kebʼe pa ri kaj rech xkil ri utzʼibʼaxik ri Traducción del Nuevo Mundo ojer (Rom. 8:15, 16). Rumal laʼ sibʼalaj nim ubʼanik, ¿la je kichomaj ix?

Ojer chik, ri Comité rech Redacción rech ri Jupuq Ajkʼamal bʼe cho ronojel uwach Ulew sibʼalaj nim kril wi ri Utzʼibʼaxik ri utzij ri Dios. Kimik, ri Traducción del Nuevo Mundo bʼanom, pa tzʼaqat o pa nikʼaj, pa 121 chʼabʼal. Kqabʼij chiwe che kikʼut chuwach ri Jehová che sibʼalaj kimaltyoxij che kʼo wajun Biblia riʼ iwukʼ. Rumal laʼ chisikʼij xuqujeʼ chixchoman chrij ronojel qʼij; rukʼ waʼ, kixqebʼ más rukʼ ri xbʼanowik, Jehová Dios (Sant. 4:8).

Sibʼalaj bʼisobʼal chiʼ kqata chiʼ kʼi loqʼalaj taq qachalal keqʼax pa kʼax, xuqujeʼ kqachʼobʼo che kʼo jujun taq mul che kekikot ta kukʼ ri nikʼaj chik. Jun kʼutbʼal, ri kʼax che xqʼax pa kikʼaslemal jun familia rech Asia, are chiʼ ri nan xaq kʼate xkam ubʼaqil. Ri kunanelabʼ che nim ketaʼmabʼal, rukʼ bʼis xkibʼij che kekun taj kkikunaj. ¡Sibʼalaj bʼisobʼal riʼ ri xkʼulmatajik! Ri rachajil xuchajij chi pa qʼij chi chaqʼabʼ, ri oxibʼ ral xkiya jun utzalaj kʼutbʼal chiʼ xkitoʼ ri kitat. Junam rukʼ wajun utzalaj familia riʼ, xuqujeʼ ix, ix qʼaxinaq pa kʼi kʼax xuqujeʼ iriqom ri kikotemal che kuya chiʼ ichʼijom ri kʼax rumal ri kojonik (Sant. 1:2-4). Pa neʼ kojbʼe pa ri kaj o kojbʼe taj, Jehová utzujum chqe che pa ri petinaq sibʼalaj kojkikot riʼ rumal che qachʼijom ri kʼax, ri areʼ kojutewchij rukʼ ri kʼaslemal che kʼo ta ukʼisik (Sant. 1:12).

Pa ri junabʼ 2013 xeʼopan 19.241.252 winaq che unaʼtasaxik ri ukamikal ri Jesús. ¡Sibʼalaj xojkikotik che kʼi winaq xeʼopan che uyaʼik uqʼij ri Jehová xuqujeʼ ri Jesucristo are taq chiʼ xeʼopan pa ri riqbʼal ibʼ che nim ubʼanik chkiwach ri winaq che kkipatanij ri Dios! Xuqujeʼ sibʼalaj xuya kikotemal che pa ri ikʼ marzo xuqujeʼ abril sibʼalaj xbʼan nim che ri Jehová are taq chiʼ más che kebʼ millones qachalal xkibʼan ri precursorado auxiliar. Xuqujeʼ kojkikotik rumal che ri kkibʼan ri precursorado auxiliar are taq chiʼ kopan ri ajsolinel rech circuito kekunik kekʼoji’ pa ri riqbʼal ibʼ che kbʼan kukʼ ri precursores regulares, xuqujeʼ jeʼ kbʼan waʼ pa neʼ ri ajsolinel kopan ta pa marzo o abril. Ri kʼo kinojibʼal kkichʼobʼ riʼ che sibʼalaj nim ubʼanik che kqatzijoj ri utzij ri Dios xuqujeʼ nikʼaj chi qachak rech ri qakojonik. Are waʼ ri kakowirisan ri qakojonik xuqujeʼ ko kojtakiʼ chuwach ri Itzel che kraj kujorobʼisaj ri qakojonik xuqujeʼ che kraj kojresaj pa ri utzalaj bʼe (1 Cor. 15:58).

Xuqujeʼ, uyaʼom kikotemal chqe che pa ri junabʼ 2013 e 277.344 winaq che xkijach ri kikʼaslemal che ri Dios xuqujeʼ xkibʼan ri kiqasanjaʼ, kimik e kachiʼl ri kachalal cho ronojel uwach Ulew kitaqem ri bʼe che kakʼaman bʼi pa ri kʼaslemal che kʼo ta ukʼisik (Mat. 7:13, 14). Ri e qachalal riʼ che kʼateʼ xkibʼan ri kiqasanjaʼ rajawaxik che keqatoʼ rech ko ketakʼiʼ pa ri kikojonik (Col. 2:7). Chqakubʼsalaʼ qakʼuʼx chbʼil qibʼ rech kqachʼij ri kʼax kʼa pa ri kʼisbʼal (Mat. 24:13). Ri Biblia kojutaq che ubʼanik wariʼ: «Chikuʼbʼisaj kikʼuʼx ri kubʼan kiʼebʼ kikʼuʼx. Chebʼitoʼ ri man kʼo ta kichuqʼabʼ. Makʼistaj ikʼuʼx che kitoʼik konojel» (1 Tes. 5:14). Kʼisbʼal re, maqaya kan utaʼik pa qachʼawem: «Chpet ri ajawibʼal la» (1 Tes. 5:17; Mat.6: 10).

Kqaj che rukʼ kikotemal kisikʼij uwach ri Anuario 2014, xuqujeʼ jumul chik kqabʼij chiwe che sibʼalaj kixqaloqʼoqʼej pa ijujunal, ri ix ri kiloqʼoqʼej ri Jehová.

Ri iwachalal,

Jupuq Ajk’amal b’e cho ronojel uwach Ulew kech ri Testigos rech Jehová