Cheqakʼamaʼ che kʼutbʼal ri e ajqʼaxal tzij: Nahúm
1. ¿Jas kqetaʼmaj chrij ri wuj Nahúm?
1 Ri uchʼaqapil ri ojer tinamit Nínive kukʼutu che, junam rukʼ ri xubʼij kan ri Nahúm, Jehová xukʼajisaj kiwach ri e ukʼulel. Pa neʼ taneʼ ri ukʼulel che más nim ubʼanik xkun taj xutakʼabʼa ribʼ chuwach (Nah. 1:2, 6). Unikʼoxik ri xuya kan ubʼixik ri ajqʼaxal tzij Nahúm kuya jun kʼutbʼal chqe che kqakojo chiʼ kqatzijoj ri utzij ri Dios.
2. ¿Jasche kuya utzilal chke ri winaq ri kqatzijoj?
2 Chqayaʼ kubʼsal kʼuʼx. Qʼalaj che ri wuj Nahúm xaq xiw kchʼaw chrij ri ukʼajisaxik uwach Nínive, ri itzelalaj unimal ri nimalaj tinamit Asiria (Nah. 1:1; 3:7). Are kʼu, ri tzij riʼ xuya utzilal che ri utinamit ri Jehová. Nahúm, ri bʼiʼaj riʼ kraj kubʼij «kubʼsal kʼuʼx», xuya ubʼixik chke ri judíos che ksachisax na kiwach ri e kikʼulel. Xuqujeʼ, xubʼij chke che ri Jehová are «jun panibʼal pa ri qʼij rech ri riqoj kʼax» (Nah. 1:7). Are chiʼ kqatzijoj ri utzij ri Dios, oj xuqujeʼ kqaya ubʼixik utzalaj taq tzij xuqujeʼ kqatoʼ ri winaq rech kkitzukuj ri utobʼanik ri Jehová (Nah. 1:15).
3. Junam rukʼ ri Nahúm, ¿jas kqabʼano rech kqakoj kʼutbʼal xuqujeʼ wachbʼal chiʼ kqatzijoj ri utzij ri Dios?
3 Chqakojoʼ kʼutbʼal xuqujeʼ wachbʼal. Jehová rukʼ ri uxlabʼixel xubʼij che Nahúm che kukoj ri kʼutbʼal rech Tebas (o No-amón), jun tinamit rech Egipto che xsachisax uwach kumal ri asirios, rech kukʼutu ri kbʼan na che Nínive (Nah. 3:8-10). Chiʼ kojtzijon kukʼ ri winaq chrij ri usachisaxik uwach ri itzel taq jastaq, chqakojoʼ ri kuya ubʼixik ri utzij ri Dios rech kqakʼutu che Jehová qas kubʼan ronojel ri kubʼij. Jun kʼutbʼal, konojel ri ajchʼojabʼ babilonios xuqujeʼ ri medos xkichʼak ri tinamit Nínive pa ri junabʼ 632 nabʼe chuwach ri uqʼij ri Jesús. Xkʼiy ri nimaʼ ubʼiʼ Tigris rumal ri nimaʼq taq jabʼ, xuqujeʼ ri nimaʼq taq tapya re ri tinamit xetzaqik. Je waʼ xbʼan che uchʼakik ri Nínive, junam che xubʼij ri Jehová (Nah. 1:8; 2:6).
4. ¿Jas kqabʼano rech qas ktatajik xuqujeʼ kchʼobʼ ri kqabʼij chiʼ kqatzijoj ri utzij ri Dios?
4 Chqakojoʼ tzij che kʼax ta uchʼobʼik. Ri Nahúm xutzʼibʼaj ronojel ri xtaq che utzʼibʼaxik rukʼ tzʼaqat taq tzij, sibʼalaj utz utaʼik xuqujeʼ qʼalaj ri kubʼij (Nah. 1:14; 3:1). Junam rukʼ ri xubʼan ri areʼ, rajawaxik che chiʼ kqaya ubʼixik ri utzij ri Dios qas qʼalaj ri kqabʼij (1 Cor. 14:9). Chiʼ kqasolij nabʼe mul jun winaq, qas chqabʼij ri rumal che kqasolij. Xuqujeʼ rajawaxik qas kqatoʼ ri winaq rech kkowir ri ukojonik chrij ri Jehová xuqujeʼ chrij ri Utzij xuqujeʼ rajawaxik kqakʼut chkiwach jas keʼutoʼ wi ri tajin kketaʼmaj (Rom. 10:14).
5. ¿Jas kubʼan ri xutzʼibʼaj kan ri Nahúm che ukubʼsaxik qakʼuʼx?
5 Nahúm qas retaʼm che Jehová qas kubʼan ri kubʼij, wariʼ qʼalaj pa ri wuj che kojom ri ubʼiʼ che areʼ xtzʼibʼanik. Chiʼ naqaj chi kʼo wi ri kʼisbʼal re ri itzel taq jastaq re ri Satanás, sibʼalaj kukubʼsaj qakʼuʼx ri ubʼim kan ri Jehová: «¡Man kʼo ta jun kkunik kutakʼabʼaʼ ta ribʼ kamul che ukʼulelaxik!» (Nah. 1:9).