¡Qas utz chqabʼanaʼ che ukʼutik chrij ri Biblia chkiwach ri winaq!
1. ¿Jas rajawaxik kqabʼan qonojel ri keqatijoj nikʼaj chik chrij ri Biblia?
1 Kʼot nijun winaq kkunik kupatanij ri Jehová we man areʼ ta «kakʼam uloq» (Juan 6:44). Pa neʼ are ri Dios kkʼamow lo ri winaq oj rajawaxik kqakoj qachuqʼabʼ rech keqatoʼ che kkachilaj ri Qatat che kʼo pa ri kaj (Sant. 4:8). Rumal laʼ rajawaxik che qas kqatijoj qibʼ che ukʼutik. Rech keqatoʼ che uchʼobʼik ri kubʼij ri Biblia xuqujeʼ kkibʼan pa kikʼaslemal, xaq xiw ta rajawaxik che kqabʼij chke che kkisikʼij uwach ri párrafos xuqujeʼ kkibʼij ri kbʼix chrij ri preguntas che tzʼibʼam pa ri párrafos.
2. ¿Jas rajawaxik kqabʼano rech qas utz kqabʼan che ukʼutik chkiwach ri winaq chrij ri Biblia?
2 Rech qas utz kqabʼan che ukʼutik chkiwach ri winaq chrij ri Biblia, rajawaxik kqabʼan wariʼ che utoʼik ri ajtijoxel: 1) qas kretaʼmaj chrij ri kukʼut ri Biblia, 2) kukojo che qastzij ri kubʼij xuqujeʼ 3) kubʼan pa ri ukʼaslemal (Juan 3:16; 17:3; Sant. 2:26). Ubʼanik ri jastaq riʼ weneʼ kukʼam bʼi kʼi ikʼ, are kʼu ronojel wa taq jastaq riʼ rajawaxik rech ri ajtijoxel qas kux rachiʼl ri Jehová xuqujeʼ kraj kujach ri ukʼaslemal che.
3. ¿Jasche are utz kqataʼ che ri ajtijoxel ri kuchomaj?
3 ¿Jas kuchomaj ri ajtijoxel? Rech kqilo we ri winaq tajin kuchʼobʼo xuqujeʼ kukoj ri kubʼij ri Biblia, rajawaxik kqabʼij che, che kubʼij ri kuchomaj xaq xiw ta oj kojchʼawik (Sant. 1:19). ¿La kkun ri ajtijoxel che uchʼobʼik ri kubʼij ri Biblia chrij ri kʼutunem che tajin kqilo? ¿La kkunik kuya ubʼixik ri tajin kretaʼmaj? ¿Jas kuchomaj chrij ri pixabʼ? ¿La krilo che ri kubʼij ri Biblia kʼo upatan xuqujeʼ kʼax ta ubʼanik? (1 Tes. 2:13.) ¿La kuchʼobʼo che rajawaxik kukʼex kʼi jastaq pa ri ukʼaslemal? (Col. 3:10.) Rech kqetaʼmaj ri kʼo pa ranimaʼ ri ajtijoxel, rajawaxik kqabʼan preguntas che qas qachomam xuqujeʼ che kukʼutu che nim kqil wi ri winaq, xuqujeʼ qas kqatatabʼej ri kubʼij (Mat. 16:13-16).
4. ¿Jas kqabʼano we ri ajtijoxel qas ta kkun che uchʼobʼik xuqujeʼ che ubʼanik pa ukʼaslemal jujun taq pixabʼ rech ri Utzij ri Dios?
4 Ri kkichomaj xuqujeʼ ri e naqʼtajinaq ri winaq che ubʼanik weneʼ sibʼalaj opanaq pa ri kanimaʼ, rumal laʼ weneʼ rajawaxik tiempo chke rech kkikʼex ri kikʼaslemal (2 Cor. 10:5). ¿Jas kqabʼano we ri ajtijoxel aninaq taj kukojo xuqujeʼ kubʼan ta pa ri ukʼaslemal ri tajin kretaʼmaj? Rajawaxik qapaciencia xuqujeʼ kqaya tiempo che rech ri Utzij ri Dios xuqujeʼ ri uxlabʼixel kchakun pa ranimaʼ (1 Cor. 3:6, 7; Heb. 4:12). We kkun ta che uchʼobʼik xuqujeʼ che ubʼanik jujun chke ri pixabʼ re ri Utzij ri Dios, chqakʼutuʼ chi jun chik kʼutunem chuwach. We rukʼ paciencia xuqujeʼ rukʼ loqʼoqʼenik kqakʼut chuwach chrij ri Biblia, weneʼ chiʼ keqʼax ri qʼij krilo che rajawaxik kukʼex ri ukʼaslemal.