Ri kqabʼano rech ri utzij ri Dios kopan pa kanimaʼ ri winaq
1. ¿Jas xubʼan chke ri ajtijoxelabʼ ri xukʼut ri Jesús?
1 Are chiʼ ri Jesús xutzijoj ri utzij ri Dios ri xutzijoj xopan pa kanimaʼ ri xetatabʼenik, rumal laʼ, pa neʼ xa pa jumul, ri Biblia kubʼij che ri ajtijoxelabʼ «xnikow ri kanimaʼ» (Luc. 24:32). Rajawaxik che ri nimanik che ri Dios kkʼiy lo pa ri animaʼ; rumal laʼ, ¿jas kqabʼan che kitoʼik ri ajtijoxelabʼ rech kkichomaj ukʼexik ri kikʼaslemal? (Rom. 6:17.)
2. ¿Jasche rajawaxik kqachomaj ri kqabʼij xuqujeʼ ri kqabʼano rech kopan ri utzij ri Dios pa kanimaʼ ri winaq?
2 Qas chqachomaj ri kqabʼan che kitoʼik ri winaq. Kʼi chke ri winaq kkikʼex ta ri kikʼaslemal xaq xiw rumal che kqabʼij chke ri utz xuqujeʼ ri man utz taj. Qastzij wi, usikʼixik kʼi taq versículos chuwach ri winaq che kukʼutu che qastzij ta ri ukojonik, wariʼ weneʼ kubʼano che kraj ta chik kutatabʼej ri utzalaj taq tzij. Rech keqatoʼ, nabʼe rajawaxik kqetaʼmaj ri rumal che kkikojo xuqujeʼ che kkibʼan jujun taq jastaq. We qas kqachomaj ri pregunta che kqabʼan chke xuqujeʼ kqakoj utz taq tzij kubʼano che qas kkibʼij chqe ri kkichomaj (Prov. 20:5). Xaq jeʼ riʼ kojkun che utzukuxik versículos rech ri Biblia che qas kopan pa kanimaʼ. Rumal laʼ sibʼalaj rajawaxik che kojok il chke xuqujeʼ kkʼojiʼ qapaciencia (Prov. 25:15). Chnaʼtaj chawe che konojel ta ri winaq xaq junam ukʼiyik ri kikojonik. Rajawaxik tiempo rech ri uxlabʼixel kchakun pa kichomanik xuqujeʼ pa kikʼaslemal (Mar. 4:26-29).
3. ¿Jas kqabʼan che kitoʼik ri ajtijoxelabʼ rech kkʼojiʼ utz taq kibʼantajik?
3 Rukʼ ri qatobʼanik kkʼojiʼ utzalaj taq kibʼantajik. Rilik jujun taq textos rech ri Biblia che kchʼaw chrij ri rutzil ukʼuʼx xuqujeʼ uloqʼoqʼenik ri Jehová kukʼ ri winaq keʼutoʼ rech kkʼojiʼ utzalaj taq kibʼantajik. Rech kkilo che qas kok il ri Dios chqe, utz che kasikʼij uwach Salmos 139:1-4 xuqujeʼ Lucas 12:6, 7. Are chiʼ jun winaq qas kumaltyoxij ri rutzil ukʼuʼx ri Jehová, ri uloqʼoqʼenik xuqujeʼ ri uqʼijilanik kkʼiyik (Rom. 5:6-8; 1 Juan 4:19). Xuqujeʼ, are chiʼ kketaʼmaj che ri kkibʼano nim ubʼanik chuwach ri Jehová, kubʼano che kkibʼan ri jastaq che kuya kikotemal xuqujeʼ uqʼij ri Dios (Sal. 78:40, 41; Prov. 23:15).
4. ¿Jas kqabʼan che resaxik uwach ri Jehová are chiʼ kqatijoj nikʼaj chik che ri qastzij?
4 Ri Jehová kojutaqchiʼj ta che unimaxik ri e utaqomal, are kʼu kukʼut chqawach che are utz unimaxik ri e upixabʼ (Is. 48:17, 18). Kqabʼan qe ri kubʼan ri Jehová we kqabʼan chke ri ajtijoxelabʼ che pa kitukel kkilo che ri kukʼut ri Biblia are ri qastzij. Rukʼ wariʼ, ri kkikʼex pa kikʼaslemal qas kuchʼijo (Rom. 12:2). Tekʼuriʼ keqebʼ más rukʼ ri Jehová, ri kril ri qas kʼo pa ri animaʼ (Prov. 17:3).