Bʼantajik 52

Gedeón rukʼ 300 achijabʼ

CHAWILAMPEʼ su tijan kbʼan pa ri wachbʼäl wa täq achijabʼ riʼ e rajchʼoj Israel. Ri e xukulik are tijan kketij kijaʼ. Ri juez Gedeón takʼal che kinaqaj. Tijan krilo su kkebʼan che utijik kijaʼ.

Chawilampeʼ ri jalajoj kkebʼan che utijik kijaʼ ri achijabʼ. Jujun chike xkeqasaj kipalaj pa ri jaʼ. Tekʼuriʼ jun chike xiw xukʼam rukʼ uqʼabʼ ri jaʼ rech xutijo, rech kkunik krilo su tijan kbʼanik. Wariʼ sibʼalaj nim ubʼantajik, rumal che Jehová xubʼij che Gedeón che xiw keʼuchaʼ ri achijabʼ che tijan kekaʼyik chiʼ kketij kijaʼ. Ri nikʼaj chik rajawaxik che ketzalij pa kachoch. Chqilampeʼ suche.

Ri täq israelitas e kʼo chi pa kʼäx rumal che xeniman ta che Jehová. Ri täq madianitas sibʼalaj xubʼan nim kichoqʼabʼ che kiwäch ri israelitas xuqujeʼ tijan kbʼan kʼäx chike. Rumal laʼ ri täq israelitas xketa toqʼobʼ che Jehová che keʼutoʼ, Jehová xeʼuto.

Jehová xubʼij che Gedeón che kutzukuj nikʼaj achijabʼ rech kebʼe pa chʼoj, rumal laʼ Gedeón xeʼumol 32.000 achijabʼ. Tekʼuriʼ e kʼo 135.000 ajchʼoj rech kechʼojin rukʼ Israel. Rukʼ wariʼ Jehová xubʼij che Gedeón: ‹E kʼo sibʼalaj kʼi achijabʼ awukʼ›. ¿Suche xubʼij wariʼ?

Are rumal che, we ri täq israelitas kkechʼak ri chʼoj, kkebʼij che rumal rech kichoqʼabʼ xechʼakanik, weneʼ (patneʼ) kraj kkebʼij che rajawaxik ta ri utoʼnik ri Jehová chike. Rumal laʼ xubʼij che Gedeón: ‹Chabʼij chike jachin täq kkexibʼij kibʼ che ketzalij che kachoch›. Chiʼ Gedeón xubʼan wariʼ, 22.000 achijabʼ xebʼek. Xiw xekanaj 10.000 achijabʼ rech kechʼojin rukʼ 135.000 ajchʼoj.

Tekʼuriʼ, ¡Chatampeʼ! Jehová xubʼij: ‹Kʼo na kʼi achijabʼ awukʼ›. Rumal laʼ xubʼij che Gedeón che kubʼan chike ri achijabʼ che kketij jaʼ pa ri nimalaj jaʼ tekʼuriʼ keʼutaq bʼi che kachoch ronojel ri kkeqasaj kipalaj pa ri nimalaj jaʼ chiʼ kketij kijaʼ. ‹Kinya ri chʼakanik chiwe rukʼ ri 300 achijabʼ che tijan kekaʼyik chiʼ kketij kijaʼ›, xchaʼ ri Jehová, jelaʼ xutzujuj.

Xopan ri qʼij che ri chʼoj. Gedeón xubʼan oxibʼ jupuq chike ri 300 achijabʼ. Xuya jujun rukʼaʼ chij chike konojel, xuqujeʼ xuya jun xaro kʼo qʼaqʼ chupam chike. Chiʼ jubʼiqʼ (jbʼe) kraj na che nikʼaj chaqʼabʼ, konojel xkeriq kibʼ chirij ri tinamit rech kikʼulel. Tekʼuriʼ, konojel, xkexutʼuj ri täq ukʼaʼ chij xuqujeʼ xkepaxij ri täq kixaro, tekʼuriʼ xkebʼij wariʼ: ‹¡Ri chʼoj rech Jehová xuqujeʼ Gedeón!› Chiʼ ri ajchʼoj xketa wariʼ xewaʼlajik, xkeriq täj su xkebʼano xuqujeʼ xkexibʼij kibʼ. Konojel xeʼanmajik, rumal wariʼ ri täq israelitas xechʼakanik.

Jueces 6 kʼa kopan 8.