Bʼantajik 90
Jun ixoq chuchiʼ jun kʼwaʼ
JESÚS xtakʼeʼ chuchiʼ jun kʼwaʼ pa Samaria rech kuxlanik. Ri täq rajtijoxelabʼ xebʼe pa ri tinamit che uloqʼik täq ktijowik. Ri ixoq tijan kchʼaw rukʼ Jesús xa xpe che uresaxik jaʼ. Ri Jesús xubʼij che: ‹Chaya nujaʼ›.
Ri ixoq sibʼalaj xuxibʼij ribʼ. ¿La awetaʼm suche? Rumal che Jesús are Judío, tekʼuriʼ ri ixoq are samaritana. Kʼi chike ri täq judíos utz ta kkil ri täq samaritanos. ¡Xaneʼ kkechʼabʼej täj! Tekʼuriʼ ri Jesús keraj konojel ri winaq. Xubʼij wariʼ che ri ixoq: ‹Wet awetaʼm jachin laʼ tijan kuta jaʼ chawe, at kata jaʼ che, tekʼuriʼ areʼ kuya ri jaʼ rech ri kʼaslemal chawe›.
‹Tat›, xchaʼ ri ixoq, ‹ri kʼwaʼ sibʼalaj naj, tekʼuriʼ at kʼo ta akʼolbʼal rech kawesaj ri jaʼ. ¿Jachiʼ kariq wi wajun jaʼ che kuya kʼaslemal?› Xchaʼ che.
‹We katij ri jaʼ rech wajun kʼwaʼ kuya na chaqijchiʼ chawe›, xchaʼ Jesús. ‹Tekʼuriʼ ri jaʼ kinya in kubʼano che ri winaq kʼo ukʼaslemal che kʼot ukʼisik.›
‹Tat›, xchaʼ ri ixoq, ‹¡chaya wajun jaʼ chwe! Rech kchaqij ta chi nuchiʼ nijun mul. Tekʼuriʼ kinpe ta chi waral che ukʼamik jaʼ›, xchaʼ.
Ri ixoq xubʼij che ri Jesús tijan kchʼaw chirij ri qastzij jaʼ. Tekʼuriʼ ri Jesús tijan kchʼaw chirij ri qastzij rech ri Ajawaxel xuqujeʼ ri ajawbʼäl, che xujunamisaj rukʼ jaʼ che kuya kʼaslemal. Kkunik kuya kʼaslemal che kʼot ukʼisik.
Tekʼuriʼ Jesús xubʼij wariʼ che ri ixoq: ‹Jat chasikʼij ri awachajil tekʼuriʼ chattzalij loq›.
‹In kʼot wachajil›, xchaʼ ri ixoq.
‹Xabʼij ri qastzij›, xchaʼ ri Jesús, ‹tekʼuriʼ e kʼolinäq jobʼ awachajil, xuqujeʼ ri achi kʼo awukʼ pa awachoch, atkʼulnäq ta rukʼ›.
Ri ixoq xuxibʼij ribʼ, rumal che ronojel ri tijan kubʼij qastzij. ¿Suche retaʼm wariʼ ri Jesús? Rumal che ri Jesús are Yaʼom loq, are xtaq lo chikaj xuqujeʼ are ri Ajawaxel kbʼin wa täq tzij che. Kimik ri täq rajtijoxelabʼ ri Jesús xetzalij loq, tekʼuriʼ xkexibʼij kibʼ chiʼ xkilo che ri Jesús tijan kchʼaw rukʼ jun ixoq aj samaritana.
¿Su kqetaʼmaj chirij ronojel wariʼ? Che ri Jesús sibʼalaj jun utzalaj winaq kukʼ konojel ri winaq rech jalajoj täq tinamit. Rajawaxik che öj jelaʼ kqabʼano; utz täj che kqabʼij che jun winaq xa itzel xaq xiw rumal che petinäq pa jun chik tinamit. Jesús kraj che konojel ri winaq kketaʼmaj ri qastzij che kukʼam bʼi pa ri kʼaslemal che kʼot ukʼisik. Rumal laʼ öj rajawaxik che kqaj keqatoʼ ri täq winaq rech kketaʼmaj ri qastzij.