Bʼantajik 91

Jesús xukʼut pixabʼ pa jun juyubʼ

CHAWILAMPEʼ pa ri wachbʼäl ri Jesús kuʼlik, o tʼulik. Tijan kukʼut chike konojel ri winaq ri utzij Ajawaxel pa jun juyubʼ rech Galilea. Ri e kʼo naqaj che, are täq rajtijoxel. Xeʼuchaʼ 12 rech kkebʼan uʼapostoles. Ri täq apóstoles e ajtijoxelabʼ sibʼalaj nim kibʼantajik rech ri Jesús. ¿La awetaʼm su kibʼiʼ?

Nabʼe, Simón Pedro xuqujeʼ ri rachalal ubʼiʼ Andrés. Tekʼuriʼ, Santiago xuqujeʼ Juan, e kachalal kibʼ. Jun chik apóstol ubʼiʼ Santiago, xuqujeʼ jun chik Simón ubʼiʼ. Kebʼ apóstoles kibʼiʼ Judas. Jun ubʼiʼ Judas Iscariote, jun chik Judas xuqujeʼ kbʼix Tadeo che. Tekʼuriʼ ri Felipe xuqujeʼ ri Natanael (kbʼix Bartolomé che), tekʼuriʼ Mateo xuqujeʼ Tomás.

Chiʼ ri Jesús xtzalij lo pa Samaria, xok che uyaʼik ubʼixik ri utzij ri Ajawaxel nabʼe mul: ‹Ri ajawbʼäl rech ri kaj naqaj chik kʼo wiʼ›. ¿La awetaʼm sulaʼ wajun ajawbʼäl? Are ri qastzijalaj uqʼatbʼaltzij ri Ajawaxel. Ri Jesús are rajawinel. Ri Jesús kubʼan lo qʼatbʼaltzij pa ri kaj xuqujeʼ kukʼam lo uxlunem cho ruwäch ri Ulew. Ronojel ri uwäch Ulew kubʼan na jun kotzʼiʼjalaj uwäch rumal rajawbʼäl ri Ajawaxel.

Ri Jesús tijan kukʼut chike ri winaq chirij ri ajawbʼäl. ‹Jewaʼ kibʼano chiʼ kibʼan ichʼawem›, xchaʼ. ‹Qatat atkʼo pa kaj, nim kbʼan che ri abʼiʼ. Chpet ri ajawbʼäl. Chabʼanaʼ ri kawaj pa ri kaj, xuqujeʼ cho ruwäch Ulew. Wariʼ are jujun täq tzij kʼo chupam ri chʼawem che xukʼut kan ri Jesús. ¿La katkunik kabʼij ronojel ri chʼawem?

Ri Jesús xuqujeʼ tijan kukʼut che kiwäch ri winaq su rajawaxik kkebʼan che kichʼabʼexik kibʼ che kixoʼl. ‹Chabʼanaʼ chike ri winaq su kawaj kbʼan chawe›, xchaʼ Jesús. ¿La utz kawilo che nikʼaj chik winaq utz kibʼan chawe? Rumal laʼ rajawaxik kqabʼan utz kukʼ nikʼaj chik. ¡Sibʼalaj utz kubʼan na ri kotzʼiʼjalaj uwäch Ulew chiʼ konojel kkebʼan wariʼ! ¿La jewaʼ?

Mateo 5 kʼa kopan 7; Mat. 10:1-4.