Bʼantajik 96

Jesús xeʼukunaj täq yawabʼ

CHIʼ Jesús kbʼe pa täq tinamit, xeʼukunaj täq winaq e yawabʼ. Wa täq milagros xyaʼ ubʼixik pa täq nikʼaj chik tinamit. Rumal laʼ, ri winaq xkekʼam bʼi che ri Jesús ri täq winaq kamnäq kibʼaqil, ri täq kekaʼy täj, xuqujeʼ ri kekun täj kebʼinik, xuqujeʼ e nikʼaj chik yawabʼ. Jesús xeʼukunaj konojel.

Qʼaxnäq chi más che oxibʼ junabʼ chiʼ ri Juan xubʼan uqasanjaʼ ri Jesús. Tekʼuriʼ Jesús xubʼij chike ri apóstoles che kbʼe na Jerusalén, jachiʼ kkamsax wi, tekʼuriʼ kwalaj che kixoʼl ri kamnäq. Xuqujeʼ tijan keʼukunaj ri täq winaq.

Pa jun qʼij ri Jesús tijan kuya kʼutunem pa jun sábado. Ri qʼij sábado kkekoj ri täq judíos rech uxlunem. Wajun ixoq kawil pa ri wachbʼäl ukʼamom bʼi 18 junabʼ che umejom ribʼ, o uqʼochom ribʼ. Rumal laʼ, ri Jesús xuya ri uqʼabʼ puwiʼ ri ixoq rukʼ wariʼ, ¡xkuntajik!

Wariʼ xubʼano che ri ajkʼamal täq bʼe rech ri tinamit sibʼalaj xpe koyowal, o kiwal. ‹Kʼo waqibʼ qʼij rech ri chak›, xchaʼ jun chike, chike ri winaq. ‹¡Are täq ri qʼij riʼ rech kubʼan kunanik, are ta ri qʼij sábado!›

Tekʼuriʼ Jesús xubʼij wariʼ: ‹¡Ix itzel täq winaq! Iwonojel we kʼo jun ibʼur kikiro tekʼuriʼ kiya ujaʼ pa sábado. Rumal laʼ, ¿la mat kinkunaj wajun ixoq, che ukʼamom bʼi 18 junabʼ rukʼ wajun yabʼil?› Ri xubʼij Jesús xeʼuya pa kʼixbʼal ri itzel täq achijabʼ.

Tekʼuriʼ, Jesús xuqujeʼ ri täq apóstoles xebʼe Jerusalén. Chiʼ e kʼo chi naqaj che ri tinamit Jericó, kebʼ achijabʼ kekaʼy täj xkebʼij wariʼ: ‹Jesús chojatoʼ›.

Jesús xeʼusikʼij wa kebʼ achijabʼ, tekʼuriʼ xuta chike: ‹¿Su kiwaj kinbʼan chiwe?› Tekʼuriʼ ri achijabʼ xkebʼij: ‹Jesús, are kqaj kojkunik kojkaʼyik›, xechaʼ. Jesús xuchap ri kibʼaqʼwach, tekʼuriʼ ¡xekaʼyik! ¿La awetaʼm suche ri Jesús xubʼan ronojel wa täq milagros? Rumal che keʼuloqʼoqʼej ri winaq, xuqujeʼ kraj kkekubʼsaj kikʼuʼx chirij. Wariʼ kubʼij chaqe che nijun chik winaq yawabʼ chik chiʼ ri Jesús kubʼan qʼatbʼaltzij cho ruwäch ri Ulew.

Mateo 15:30, 31; Lucas 13:10-17; Mateo 20:29-34.