Bʼantajik 98

Pa ri juyubʼ rech täq Olivos

WARIʼ are Jesús kʼo pa ri juyubʼ rech Olivos. Ri kajibʼ achijabʼ e kʼo rukʼ e are täq apóstoles. Are ri Andrés xuqujeʼ ri rachalal ubʼiʼ Pedro, xuqujeʼ Santiago rukʼ Juan xuqujeʼ kachalal kibʼ. Ri jun nimalaj ja kʼo naj chike are ri loqʼalaj ja rech ri Ajawaxel pa Jerusalén.

Qʼaxnäq chi kebʼ qʼij che ri Jesús xok bʼi pa Jerusalén puwiʼ jun bʼur. Martes chik. Nabʼe chuwäch wajun qʼij riʼ Jesús xopan pa ri loqʼalaj ja. Chilaʼ ri täq ajkojol tabʼal toqʼobʼ xkaj xkekamsaj ri Jesús. Tekʼuriʼ xkexibʼij kibʼ, rumal che ri winaq utz kkil ri Jesús.

‹¡Ix kumätz, kalkʼwal ri täq kumätz!› Xchaʼ ri Jesús chike ri ajkʼamal täq bʼe. Tekʼuriʼ xubʼij chike che ri Ajawaxel kukʼajsaj na kiwäch rumal ri täq itzelal xkebʼano. Tekʼuriʼ, Jesús xbʼe pa ri juyubʼ rech Olivos, tekʼuriʼ wa kajibʼ apóstoles xeʼok che utaʼik täq jastaq che. ¿La awetaʼm su xketa che?

Ri täq apóstoles tijan kketa chirij ri petinäq. Ketaʼm che ri Jesús kresaj rojonel ri itzelal cho ruwäch Ulew. Tekʼuriʼ kkaj kketaʼmaj jampaʼ kbʼan wariʼ. ¿Jampaʼ kpe Jesús rech kubʼan qʼatbʼaltzij xuqujeʼ kubʼan ajawinel?

Jesús retaʼm che ri täq rajtijoxel e kʼo cho ruwäch Ulew kekun täj kkilo chiʼ ktzalij cho ruwäch Ulew. Rumal che ri Jesús kʼo pa ri kaj, tekʼuriʼ kekun täj kkil chilaʼ. Rumal laʼ xubʼij chike ri täq apóstoles jujun täq jastaq che kbʼan na cho ruwäch Ulew chiʼ areʼ kubʼan ajawinel pa ri kaj. ¿Sulaʼ jujun chike wariʼ?

Jesús xubʼij che kpe na nimaʼq täq chʼoj, sibʼalaj kʼi täq winaq e yawabʼ, o iwabʼ xuqujeʼ kpe na wiʼjal, xuqujeʼ kpe täq itzelal xuqujeʼ nimaʼq täq kabʼraqan. Xuqujeʼ xubʼij che ri utzij ri Ajawaxel kya ubʼixik cho rojonel uwäch Ulew. ¿La qilom ronojel wariʼ che tijan kbʼan che wa täq qʼij riʼ? ¡Jeʼ! Rumal laʼ qetaʼm che ri Jesús kimik tijan kubʼan qʼatbʼaltzij pa ri kaj. Naj ta chik che kresaj na ri itzelal cho ruwäch Ulew.

Mateo 21:46; 23:1-39; 24:1-14; Marcos 13:3-10.