Bʼantajik 108
Pa bʼe rech Damasco
¿LA AWETAʼM jachin laʼ ri achi kʼo pulew? Are ri Saulo. Are xuchajej ri täq katzʼyaq ri achijabʼ xkekamsaj ri Esteban. ¡Chawilampeʼ pa ri wachbʼäl ri jun nimalaj saqil! ¿Su tijan kbʼanik?
Chiʼ kamnäq chi ri Esteban, Saulo tijan keʼutzukuj ri täq rajtijoxel ri Jesús rech kubʼan kʼäx chike. Xok pa täq kachoch tekʼuriʼ xeʼuresaj loq xeʼuya pa täq tzʼapibʼal. Kʼi chike ri täq ajtijoxel xeʼanmaj bʼi pa nikʼaj chik tinamit chilaʼ xkeya ubʼixik ri «utzij ri Dios». Xuqujeʼ Saulo xbʼe pa nikʼaj chik tinamit che kitzukuxik ri täq rajtijoxel ri Jesús. Kimik xbʼe Damasco. Tekʼuriʼ chiʼ bʼenäq pa bʼe, kʼo jun nimalaj xbʼantajik:
Xaq kʼateʼ, xpe jun saq pa ri kaj xqaj lo chirij Saulo, tekʼuriʼ ri Saulo xtzaq pa ulew, junam che kqil pa ri wachbʼäl. Tekʼuriʼ jun chʼabʼal xubʼij wariʼ: ‹¡Saulo, Saulo! ¿Suche kabʼan kʼäx chwe?› Ri täq achijabʼ e kʼo rukʼ Saulo xkil ri saq xuqujeʼ xketa ri jun chʼabʼal tekʼuriʼ xkechʼobʼ täj su tijan kubʼij.
‹¿At jachin laʼ?› Xchaʼ Saulo. ‹In Jesús, che tijan kabʼan kʼäx chwe›, xchaʼ ri chʼabʼal. Jesús xubʼij wariʼ rumal che chiʼ ri Saulo kubʼan kʼäx chike ri rajtijoxel ri Jesús, Jesús kunaʼo che areʼ tijan kbʼan wi kʼäx.
Saulo xuta chi wariʼ che: ‹¿Jesús, su rajawaxik kinbʼan kimik?›
‹Chatwaljoq jat Damasco›, xchaʼ Jesús. ‹Chilaʼ kbʼix chawe su kabʼano.› Chiʼ Saulo xwalajik xuqujeʼ xutor ri ubʼaqʼwach, kkun täj krilo. ¡Kkaʼy ta chik! Rumal laʼ, ri täq achijabʼ e kʼo rukʼ xkekʼam bʼi che uqʼabʼ pa Damasco.
Kimik ri Jesús xuchʼabʼej jun rajtijoxel kʼo Damasco, xubʼij wariʼ che: ‹Chatwaljoq, Ananías. Jat pa ri bʼe ubʼiʼ Recta. Pa rachoch Judas chatzukuj jun achi ubʼiʼ Saulo. Xinchaʼo rech kubʼan jun ajpatanel we, nim ubʼantajik›, xchaʼ.
Ananías xubʼan wariʼ. Chiʼ xril uwäch Saulo, xuya ri uqʼabʼ puwiʼ tekʼuriʼ xubʼij: ‹Ri Jesús xinutaq loq rech katkaʼy chi na xuqujeʼ katnoj che rixlabʼixel ri Ajawaxel›. Tekʼuriʼ pachaʼ kkaʼy soloʼt xtzaq lo che ri ubʼaqʼwach ri Saulo, rukʼ wariʼ xkun chik xkaʼyik.
Saulo xubʼan sibʼalaj nim upatan rech kuya ubʼixik ri utzij ri Ajawaxel chike kʼi täq winaq pa jalajoj täq tinamit. Tekʼuriʼ xbʼix apóstol Pablo che, kqetaʼmaj na kʼi täq jastaq chirij. Nabʼe chqilaʼ su xubʼan ri Ajawaxel rech kubʼan Pedro.
Hechos 8:1-4; 9:1-20; 22:6-16; 26:8-20.